තෝරා.. පන් මාළු

ප්‍ර වාද විප්ලව ..වාද

අඬහැරය

නළාකරුවෝ

යථාර්තය පිරිසිඳිමි

ජීවිතය ගෙවී යයි..
හිරු නැගී බැස යන්නා සේ..
බාල වියෙන් තුරුණු වූ සිත කතර මැදින් වියපත් බවට පා නගනා සැටි..
පාට උලා සායම් පොවා වසා ගත නොහැකි ලප කැළැල්ද රැළි පෙරළිද නොමැති කිසිවෙකුත් නැත මෙ මිහිපිට..
දහස් ගණනින් අප එකිනෙකා හමුවූ ලෝකයේ දීම අප එකිනෙකාගෙන් සමුගන්නට නියමිතය..
අප කුඩා කළ ඇසු දුටු බොහෝ දේ අද වියපත්ය..
එදා සජීවී ඇත්තෝ සමහරෙක් අද මළවුන් අතරය..
අප පියවර මැන ගිය නගර මංමාවත් අද නැවුම් සළුපිළිවලින් සැරසී නව ජීවයක් ලබලාය..
එහෙත් නැවුම් පිළියෙන් සැරසී නැවුම් ජීවයෙන් පිබිදෙන්නට අපට නොහැක..
අපි වියපත් වන ජීවීන් වන්නෙමු..
බාල වියේ එකිනෙකා හා සුරතලයෙන් කෙළිදෙළෙන් හුන් කාලය යළි නොලැබෙන්නේය..
බැක් ටු ස්කූල් වූවාට ජීවිතය යළි ආපසු නොහැරෙන්නේය..
අපි ජීවිතයේ එක් පරිච්ඡේදයක් අවසන් කළ බව හැඟේ..
කවර ලෙසින් කොතැන කොයි තරාතිරමෙන් සිටියත් සමකාලීනයන්ට ඒ මානසික පෙරළිය දැනේ..
තුරුණුවියට එළඹෙන්නන් සේම එයින් නික්මෙන්නන්ද ලබන්නේ අලුත් අත්දැකීමකි..
වටහා ගන්නේ ලෝකයේ තවත් ලෝකයකි..
එය ජීවිත ආලෝකය පිණිස වන්නේ නම්, ජීවිත අවබෝධය පිණිස වන්නේ නම්,
ස්තූති වේවා....!
සකළ ලෝක වාසීන් හා මෙතෙක් අප නිර්ලෝභීව පෝෂණය කළ ස්වභාව ධර්මයාට..
තවත් ලෝකයක් දකින තෙක් අප මේ ලොව අවබෝධයෙන් පියමං කළ යුතුය..
බොහෝකොට කතා නොකරන යථා බව හඳුනා අවසරයි එසේ නම් යන්න තව ඉදිරියට..

පොල්පිති...සහ පොල්ලෙලි

නුඹ....!

අහස යනු ඇගෙ හිත නම්
හඳ යනු සිසිල වේ එහි
හිරු යනු එළිය නම්
තරු යනු වරුණ වේ එහි

වැහි වළා යනු දුක නම්
නිල් ගගන සතුටම වේ මැයි
අකුණු ත්‍රාසය වේ නම්
ගිගිරුමද බිය දේ මැයි

වැසි බිඳුව කඳුළක් වේ නම්
සිනහ පවනේ රැළිමයි
තත්පරයකුත් පාසා
එක ලෙසට ඉන්නට බැරි ඇයි

සිතින් විඳ විඳ හුන්නත්
අතින් අල්ලනු බැරිවෙයි
දිනෙක නැළැවෙන නිළඹේ
සොරා ගනු රිසි නුබමැයි

(තනිකරම කතාවක්)2

උඹ මීඩියා කාරයා.. මෙච්චරට අච්චරක් දේවල් ලියන්න තියෙද්දි උඹ කුණුගොඩවල් අයිසින් කරනවා විකුණන්ඩ.. දාහක් ඇත්ත මිනිස්සුන්ගෙ උත්සාහයන් තියෙද්දි උඹ සෙප්පඩ යාළුවන්ගෙ කුකුල් කටු වෙනුවෙන් කහිනවා.. මේකව ඇදල දාපන් අතනට..
මට කතාකරන්න දෙන්න ඒක මගේ අයිතිය...
උඹේ පැටික්කිරිය බලලයි උඹව මෙතනට ඇද්දේ..උඹේ කුපාඩිකම් වහගන්න ජනතාවාදී වෙන්ඩ හදන්ඩ එපා ටින්කිරෝ...ටිකිරි මොළේ තියාගණින් කෙල්ලන්ව රවට්ටන්න, ඒත් උඹට ආයෙ ඒවට වෙලාව දෙන්නෙ නෑ මම.
අනිකව ගණින්..
මූ කලාකාරය..කොහොමද ආයුබෝවන්ඩ.. ගෙදර දොරට නම් වැඩ කරගත්තා, තවම කලාවට යමක් කරන්න තමා බැරිවුණේ නේද..කතාකරමුද කණට පාරක් පිරිනමන්නද...
එහෙම කතා කරන්ඩ එපා. අපි තුට්ටු දෙකක් හම්බ කරන්නෙ මිනිස්සුන්ව කොච්චර සතුටු කරලද...
අම්මප. මට නම් පේන්නෙ හැම අතටම කලාවට වනල තමුන්ව සාධාරණීකරණය කරගන්න එකයි තමුසෙගෙ කලාව..
ඊර්ෂ්‍යාවෙන් කතා කරන්ඩ එපා...
ඊර්ෂ්‍යාව..ඈ.. බොල උඹල කරන්නෙ කලාවද, මුළාවද.. මිනිස්සු හිතන පතන දේවල්වල නිවැරදිකමට බලපාන්න උඹල කරපු කලාව මොකද්ද...කැපකිරීම මොකද්ද..ගලන ගඟටම අතු ඉති පාහිනව මිසක්..
එහෙම කියන්ඩ එපා කලාව කියන්නෙ සමාජෙට පණිවිඩ දෙන දෙයක් නෙවේ. අනික අපි කොච්චරනං කැපවෙනවද.. නිකං නොදැන කතා කරන්ඩ එපා.
ඔව්..මම දන්නෑ.. හැම බඩකඩත්තුවම විවේචනයේ කරන උඹලට කිසිම සමාජ වගකීමක් නෑ.. කැප වෙනව තමන් ගොඩ යන්ඩ නම් ...කොහොම හරි එල්ලිලා ඇවිත් තැනක් හදාගෙන හම්බුකරනවා..උඹල අනිත් උන්ට වැඩිය විශේෂයි වැඩිපුර මිනිස්සු අඳුනන නිසා. උඹලත් ඒ පානෙන්ම  එළිය බලනව. උඹලත් මිනිස්සුද, මහලොකුවට කියන්නෙ කලා කාරයො...
එහෙම කියන්ඩ එපා..
උඹල කලාව කරේ උඹලගෙ ගුරුවරු දෙයක් මිහිපිට ඉතුරු කරපු නිසා... දැන් උඹල මොනවද ඉතිරි කරල තියෙන්නෙ..
ලබ්බ තමයි උඹලගෙ කලාව.. උඹල දේශපාලනේටයි දොස්තරලටයි කොන්දොස්තරලටයි බැන බැන දවසෙ ගාණ කපනව, ඊළගට ප්රතිරූප, තත්වෙ මේන්ටේන් කරනව..වියදම කරන එවුන්ට රෙදි නැතුව කඩේ යනව.. නම දාගත්තු පොරවල්ගෙ වළං හෝදනවා ...ඔන්න බොලාගෙ කලාව...කෝ බොලාගෙ ඇට්ටකුණා නොවුන අලුත් වැඩ. මං අහන්නෙ බොලාගෙ සමාජේ කොළඹට එහා කෝ... කෝ දැන් කට.. පිටිසරින් ආපු වස්සො ටිකත් අවසානෙ බොලාගේ ගොබ්බ රැඩිකල් ආතල් එකට උම්බෑ කියනව. උන්ට එතනින් එහා කොන්දක් තියාගන්න ඉඩක් නෑ.. රැඩිකල් තත්වෙ මේන්ටේන් කරනව..වැදගත්කමට..ඒකද බොල අපි නොදන්න කලාව..ටෙලිවිෂන් වලට ජීවත්වෙන්න උඹල කලාව සිල්ලරට විකුණනව. වර දාන ගිලින්ඩ දේශපාලුවන්ට නොදෙවෙනියි උඹලත්..
තමුසෙ දන්නෑ අපේ ගැන. මේ අපේ කට වහන්න තමුසෙට බෑ හරි. අපේ මීඩියා එකෙන් මං තමුසෙව නැති කරලම දානවා.. කොහෙද ඕයි විදග්ධ සමාජෙකට ගැලපෙන්නෙ උඹ වගේ හරක්..
ටීඉඉඉඉඉංංංංංංංංං
ටීඉඉඉඉඉඉංංංංංංංංංං
කණටයි කටටයි බෙහෙත් දා ගන්නවා ඉස්සෙල්ලම....
තව කට්ටිය එහා පැත්තෙ, මෙතනට ගේන්ඩද...පොලිටික්කොද, කලවැද්දොද, බොරු වීර කාලකණ්ණි ඔක්කොම ඉන්නවා..
පොඩ්ඩක් ඔහොම හිටපන්කෝ..  එක එකා ගමු අපි..

-ඉදිරි කොටසින් හමුවෙමු-

(තනිකරම කතාවක්)1

මං මූට ඇත්ත කියන්න කීවා.. ඒත් ඇත්ත එළියට එන්නෙ නෑ, තත්වය නිසා උගුරෙ හිරවෙලා.. මොකද්ද තත්වෙ... මේ මහාචාර්ය කෙනෙක්.. ලංකා රත්න කියන්නෙ.. ගහපන් කන පුපුරන්න...ටීඉඉඉඉඉංංංංංංංංංං ලංකා රත්න ගේ කන් අඩියට දෙවියන්ගේම පිහිටයි. ඒත් කට ඇරුණා..
මං කියන්නම්.. අදින් පස්සෙ පාරෙ හිඟා කන්න උනත් කමක් නෑ.. මම ඇත්ත කියන්නම්.. (ප්රකාසන විකාසන ප්ලොට් අයිතිය තනිකරම මා සතුය©®)
හැමදේම නන්නත්තාරයි තමා, අපි තත්වෙ කළමණාකරනය කරනවා. ඉගෙනගත්තු හැම මිනිහට වගේ මමත් ... වතුර ටිකක්.. අ අ...මමත් කළේ ඉහළට ගිය එක. ඉහළම තැන ඉඳන් විවේචනය කරපු එක. අපි කියල වෙන මොනව කරන්නද, එක එක කාලෙට එන එන දේශපාලනයක් එක්ක වෙනසක් හොයනව ඇර මොනව කියල කරන්නද, මේක ගොඩදාන්න බෑ..
මේ මහාචාර්යතුමෝ, අපි අහන්නෙ තමුන්ගෙ දුක ගැන නෙවෙයි..අපේ දුකට හේතුව හරි...
හරි හරි මම කියන්නම්, මමත් පිටිසරින් ආපු මිනිහෙක් තමයි. අද ඉන්න ගොඩක් කොල්ලො කෙල්ලොන්ට වගේ ඒ කාලෙ මටත් ඕන වුනා ඇමරිකන් යුරෝපියන් හීන දකින්න...
උඹලත් එක්ක එකට හිටපු ගොඩක් දෙනා තමයි දැන් රට කරන් යන්නේ  දෙපැත්තෙන්ම....ඒකයි තත්ව කළමණාකරණෙ ඈ.... පොඩ්ඩක් ඔහොම හිටපං. ඔය අනිත් කෙඳිරිගාන එකා අරන් වරෙන්...
කංසා බිව්වම... ඔව් බිව්වම..ගංජා ගැහුවම.. ඔව්... අරක ප්‍රාණවත් වෙනවා කියලා අයියා කෙනෙක් කීවා..
අරක, ඈ බොල උඹට ප්‍රාණවත් නොවන ලෙඩක් තියෙනවද..කතාකරපං...නෑ.. නැත්තං තොට මංඤංද, පංඤංද ... ඉහ මොළේ කරකරගන්නේ.. ලෙඩක් තියෙනව නං මං බේත් අරන් දෙන්නං ඉස්පිරිතාලෙකින්, පොඩි කමට පිස්සෙක් නොවී ඉඳපං ඇච්චෝ...
අනිත් එකා ගෙනෙන් ..
මූ රැඩිකල් චින්තනේ වෙනුවෙන් බොන එකෙක්, සියළුම මත් බීම වර්ග, මත් ඉරීම්..මත්..
ඇති..
මහාචාර්යතුමා උඹල මේවට වගකියන්න ඕන..... මේ රැඩිකල් තුමා, බලන්න කියපං කවියක්...
මං කියන්නං..
උඹ..උඹ මීඩියා කාරය නේද, ඕන දේකින් උම්බලකඩ විජිටේරියන් සම්බෝල හදන එකා, උඹ තොත්ත බබා..
මං ගාව තියෙනවා ගංජාලංකාරගෙ කවියක්,එයා පේස් බුකි දාපු
කියවපං ..
දණ ගහන්නෙ නෑ..
මං කවි කියන්නෙ නෑ
මට ගැහුවොත් උඹෙ
කණට ගහනවා
මම ගංජ ගහනවා
මේ තිරිසන් සමාජයේ
රති කෙළි යයි දූ
කෙළිය මගේ
ඇගේ සිනිඳු කොපුල් තලේ
උඹෙ මළෙවි කරළිය ඇයි ඌට අලෙවි කළේ...
වසන්තයේ එන සති අන්තයේ
නඩුවට මට කොටුවෙ යන්ඩ තියේ...
විශිෂ්ටයි නේද, මං කීවෙ ශෘංගාරාත්මකයි නේද..
නඩුවද..උඹෙ ගෑනිද..බොගෙ මීඩියා ඇම්මද
දැන් අපි සේරම මේවායින් ගැහුවා ම චින්තනේ හැදෙයිද, කාමය රතිය සාංදෘෂ්ටිය, මොළේට ලේ උනයිද, නැත්තං ඒක කරවෙලා ගිහින් අර මහාචාර්ය ඉහළ අතින් කොරපු දේ උඹල පහළ අතින් නොකරයිද.. දාපන් මේ මළ ජරාව කුණු ගොඩට, ඒක ගිනි තියල දාපං.
ඔක්කොම කාලකණ්ණි.. කොටසක් තමුන්ගෙ තත්වෙ වෙනුවෙන් නැහෙනවා..කොටසක් තමන්ගෙ දුර්වලකම විඳවනවා..හැබැයි සේරම හිතාන ඉන්නේ තමන් තරම් ජීවිතේ විඳින සකීර්ල නෑ කියල..
...ඊලඟට...ආ උඹ

-ඉදිරි කොටසින් හමුවෙමු -

පෞද්ගලීකකරණය

ඉර යි තරුයි
විතරයි තව
නොඇල්ලුවේ අප
හඳත් පයින්
පාගාලා
ඇත්තේ අපෙ අය
සිහිල් ජලය
ගුවන් තලය
උණුහුම් කළෙ අප
රළුව වදින
පවන් දහර
හැදුවේ අපෙ අය
සොබාදහම
ඔබට බැරිය
පාඩු විඳින්නට
ඔබෙ දේපළ
අපට දෙන්න
ලාභ ලබන්නට

Point n joint

හිට්ලර් සෙවීම

අමුතු බණ

අතුරු සිදුරු

මදුරුවෝ වගේ නොවන අලි කොටි වග වලසුන් අතින් තලා විනාශ කළ හැකි හෝ පරිසරයේ පිරිසිදු කමෙන් යාමනය කළ හැකි හෝ සත්ව කොටසක් නොවේ. සතුන් මරා දමා පරිසර සමතුලිතතාව බිඳ තිරසාර විසඳුම් ලද හැක්කේද නොවේ. ඩෙංගු මැලේරියා නොහැදුවද අලියා මිනිහා අතර ඇති අරගලය, ඉඳ හිට වාර්තා වන කොටි වලස් කතාවට වඩා සමාජයේ ගැඹුරට ගිය එකකි. වරද අලියාගේද මිනිසාගේද යනුවෙන් වදවීමට වඩා වග වීම සපුරා ඇත්තේ මිනිසා සතුව බව වටහාගෙන ක්‍රියා කිරීම නොවෙද කළ යුත්තේ.
බලය සහිත වූ පමණින්ම බලධාරී හෝ නිලය දැරූ පමණින් නිළධාරී බව දරන්නන් නොව මොළය සහිත මොළධාරීන් පිරිසක් රටේ මහජනයාට නිරන්තර බලපාන ගැටළු සඳහා දිගු කාලීන දේශපාලනමය නොවන සමාජමය ප්‍රතිපත්තිමය විසඳුම් ලබාදීමට තෝරාගත නොහැක්කේ ඇයි. පත් නොකරෙන්නේ ඇයි.
අණ සහ බණ පටලවාගත් එකතැන පල්වන සමාජයක් හිට්ලර් සොයා අතීතයෙන් අනාගතය දකින්නට හදන්නේ පල්වීමෙන් කුණුවන මොළගෙඩි වලට ඉන් එහා කල්පනාවක් ඇති නොවන්නේ මෙ බැවින්මයි.
වරද පෙනෙයි, දැනෙයි. ඒත් අපි එකතැනයි. උත්තර සරලයි. අපේ අමනෝඥකම ඉහළයි. එකඟතාවයන් හීනයි, මතවාදයන් බහුලයි. අවසන් ප්‍රතිඵලය උදාසීනයි, නිෂ්ක්‍රීයයි. බොහෝ ස්ඵෝටනයන්ගේ සද්දෙයි දුමයි විතරයි. මිනිසුන් අනෙකා නසා සතා සීපාවා මරා දමා හෝ තිරශ්චීනව විසඳුම් සෙවීමේ එක්තරා හේතුවක් එතැනයි.
අප රටක් හැටියට නිවැරදි කාල රාමුවකට පිවිසෙන්නේ කවදාද.. අප්පමාදෝ අමත පදං.. මතුබුදුවන බුදුන් දැක නිවනටත් ප්‍රමාදය පතන අපි අඩු තරමින් යහ ජීවනයක් උදෙසාවත් අප්‍රමාද නොවන්නේ මන්ද.. කාලකණ්ණි කම යනු එයයි.

අත බලා, පොත බලා, මූණ බලා, අහක බලා කියම්!

👳ඔබට අවශ්‍ය අද දවස කොහොමද දැනගන්න
👷නෑ, මම දන්නවා මට අද කරන්න තියෙන දේ
👳එහෙනම් ඔබ කැමතියි ඔබේ හෙට දවස ගැන දැනගන්න
👷ජීවිතේ අනියතයි හෙටයි කියල වෙනසක් නෑ මගෙ හිතේ
👳ඔබ ආසවෙයි ඔබේ වාසනාව හොයාගෙන යන්න
👷හොයාගෙන යන්න වෙන එක අවාසනාව නේද, ඕක උත්සාහය
👳සුදුසු රැකියාව ගැන දැනගමුද
👷සුදුසු දේ මම තීරණය කරොත් ඒක ප්රශ්නයක්ද
👳විවාහය ගැන, දරුඵල ගැන..
👷ඒක මට බලාගන්න පුළුවන්, වදවෙන්න එපා ඒ ගැන
👳අපල උපද්‍රව නොසළකන එක හොඳ දෙයක් නෙවෙයි නේද
👷මම කොහොමත් සිහි කල්පනාවෙන් ජීවත් වෙන්නෙ, ඒක හොඳයි නේද
👳එහෙනම් මම යන්නද
👷ස්තූතියි මං ගැන වද වුනාට, නැකතක් නැතුවම තේ එකක් බීල යන්න..

අණද බණද(ප්‍රාඥයා අඥ්ඥාන දායකත්වයට කිසිවිට බිය නැත)

අණට බය නිසා බණවත්
බණ සැර මදි නිසා අණවත් නොවේ
අවැසි තැන අණය
අවැසි තැන බණය
පැවැත්ම එතැනය
කොන්ද කෙළින් නම්
හිට්ලර්ලාද ඇඳ යට
රිංගන තැනට වැඩ ඇත
(හිට්ලර් යනුවෙන් අදහස් කළේ ඔහුම තමා)

සේපියන්ලාගේ සේපියන්

කොන්ද කෙළින් කරන තරමට
පපුව ඉස්සරහට දාන තරමට
කොටු කරන්න උස වැටක් ඕන නම්
සී සී ටී වී හතරත වනන්න ඕන නම්
බුලට් ප්රූෆ් අඳින්න ඕන නම්
විද්‍යාත්මක නාමය මොක වේවා
ශතවර්‍ෂය විසිඑක වේවා
සත්තයි
ඒ මිනිස්සු නම් වෙන්න බෑ

මාද්දිය හර්දයට රිපීට් නොකරනු (හාර්ට් ෆුල් හර්ට් ෆුල්)

තිරිසනා කෙළෙසුවා ඇති, උගෙ වේදනාව විකුණාගෙන කන්න එපා. ඒව හිට්ලර්ට විරුද්ධ මිනිසුන්ට තරම් නෑ. පෙන්නන්න නැවත වධය නොව වධ විඳි බව පමණක්. මිනිස්සුන්ට නම් ඒ ඇති මයෙ හිතේ...යුද්ධෙට පස්සෙ මේ මිනිස්සුන්ගෙ තිරිසන් කම් අලෙවි කර ගැනීමත් ප්රවෘත්ති කලාවක් වෙලා.. ස්ත්‍රී දූෂණයක් විතරයි තව වීඩියෝවකින් දමල නැත්තෙ ටී වී නිවුස් වල..මේවට විසඳුම් ඉල්ලන්ට සිද්ධිය ඒ ටු ඉසෙඩ් විස්තරේ පමණ නොබලා නැවත නැවත දැමීම තවත් ජන මනස කෙළෙසීමක් නොවෙන්නෙ නෑ. අවකෙළි දහයකට උඩ ගෙඩි දෙමින් එකක් බේරා ගන්න හදනව කියන්නෙ ඔළුවයි මුට්ටියයි දෙකම විනාශ කරගන්න වැඩක් කියලයි කියන්න වෙන්නෙ. එහෙම තැන්වලයි හිට්ලර්ලත් හිටගන්නෙ.(හිට්ලර් යනුවෙන් අදහස් කළේ හිට්ලර්වම තමා)

කැලේ ඇතුළට

මෙහෙමයි,

චීවරය ගලවන එක ගැන කතාකරන්න පළමුව කතා කළයුත්තේ චීවරය පොරවා ගැනීම, එහි වටිනාකම රැක ගැනීම ගැනයි. භික්ෂුත්වය රංගනයක් කරගත්තම චීවරය ඩ්‍රාමා කොස්ටියුම් එකක් ගණනට වැටෙනව..එතකොට රංගනය අවසානයේ ඒක ගලවල දමන්නම වෙනව. වටිනාකමක් තියෙන්න නම් තමන් පොරවගන්නෙ තම ශාස්තෘෘවරයාගේ නමින් එන චීවරය කියන එක හද පතුලෙ විතරක් නෙවෙයි තම ඥානය පුරාවට සාරයක් වගේ පැතිරිලා තියෙන්න ඕන. ත්‍රිවිධ හමුදා ඇඳුම, පොලිසියේ ඇඳුම අවභාවිතයට ගැනීමට වඩා දරුණුයි ආගමික පූජ්‍ය, පූජක ඇඳුම් අවභාවිතයේ ගියොත්.. කට ඉස්සර වුනු ගමන් හිට්ලර්ටත් ඒ ඇඳුම දාන්න තරම් ජන ප්‍රජාවත් තොරතුරු සන්නිවේදනය සමඟ ප්‍රබල උත්කර්ශයකට යනව. අන්තිමටම අපි අත දිග ඇරල අඩිය රත් වෙන්න ගහගෙන තියෙන්නෙ අපේම කණට.
අපි බණ අහනව මිසක් කියන්න සුදුසු නෑ.. කියන්න ඕන අය බයිලා, සිංදු, කතන්දර කියන්නෙ නැතිව අදාළම කාර්යයේ සතිය පිහිටුවා වැඩ කරනව නම් ඔය ප්‍රශ්නත් නෑ..
දැන් කියන්න වෙන්නෙ වෙච්ච දේට එන්න සෙයියදු..
රෙදි කරට ගන්න කලින්, අඩු තරමෙ සරම උස්සගෙන ගිරි ගෝරියට යන්න කලින් ඇත්තටම තියෙන ප්රශ්නෙට හරියටම උත්තර දෙන්න ඕන කියන එක හැම විටම දෙතුන් පාරක් හිතන්නට සතිපට්ඨානය ටිකක් හෝ වැඩිය යුතුයි...ගිහියෙක් හැටියට මම ගැනත් මට හිතෙනව..

හිඳුවන කවි (හීතලට)

සාර භූමිය මාර වෙස්ගෙන වනසනා
කෘෘර කල්ලිය දනන් මන ගිනි අවුලනා
වනන්නේ නැති කඩුත් අරගෙන කොස් කොටා
බත් ගසින් වත් රට නගාපන් මැතිතුමා

කටින් බතලත් අලත් මල්පැල සිටවනා
කලත් පසුවී බබත් ලොකු වී ඇත මෙදා
තවත් කාලය බලන් ඉන්නට බැරි නිසා
මැජික් මරලා රටත් නළවා ගනු සොඳා

එදා සිට ඒ පැවතෙනා ගරු නම රකිව්
රෑට රෑටම අවකෙලිය මන්තිරි පැටව්
ගැටව් සේරම නුඹලගේ මග ඇදට යව්
අනේ අම්මප කක්කුටුය මුන්ගේ අඩව්

සාධු...සාධූ...සාධූ!

වෙෙරය වගුරවා
ත්‍රාසය උතුරවා
භීතිය පතුරවා
කෝපයෙන් ගුගුරවා
කියව් කියව්
දියව් දියව්
අපිට
තොපිට
ඔව් අපිට
සාධු ජන සමාජයක්!
වැඩ වරා
දන පෙළා
හණ ගසා
කඩ වසා
පතමු අපි
ප්‍රගමනික සමාජයක්!
මාවතේ ඇවිද
ලේ හලා ඇවිල
කාලය නසා හනික
හෙට එළි දක්වමු
අධ්‍යාපනික සමාජයක්!
තව දුරටත් බෙදෙමු
නිල බලය බදා ගමු
තනි තනිව බෙදා ගමු
ලද හැකිය
සමානාත්ම සමාජයක්!
ඔව් ඉතිං, අපි පතමු
එහෙව්
මෙහෙව්
සීමා රහිත
පීඩා සහිත
අසාධු
සාධු ජන සමාජයක්.

කැලේ..!

බැලු⚽වම

රියලිටි තුළ රියලිටිය

රාමුව හතරැස්ය වාහිනියේ රූප
කොහොමද හැමදේම හතරැස් කරන්නේ ඕක
ඔළුවත් රවුම් සැටලයිට්ය දැන් ඒක
කලාව රවුම් නැත්නම් අටපට්ටම්ද

මට්ටම් නැති නමුත් ඔපමට්ටම් දාලා
විකිණිමු අපිත් බොරුවත් අයිසින් දමලා
රස කර ලුණු මිරිස් පදමට දෙහි දාලා
අත පය නළවනමුද කොරියෝ ග්රැපි දාලා

අද්ය යාපනේ වගේය යද්දි යාපනේ
ඒ නයින්ය ගියෙ උඩින්ය ඕ ලෙ වෙල් වගේ
මඩත් කරිය බඩත් වැඩිය කලටිපොල් වගේ
නටාපන් උඹත් නටන්නෙම් මාත්
බිංකුණ්ඩො බොල බිංකුණ්ඩෝ....

තෝත් නටාපිය මාත් නටන් නම්....
රියලිටියේ බොල කුංබිංඩෝ
කීයක් එනවද කීයක් දෙනවද
නැගලම වනමුද ජිට්කුංඩෝ

ලේ සුවඳ (කුඩ මසු පිළී ගඳමය)

ලෝකයම මස් මාර්කැට්ටුවකි
විටෙක අපි පාරිභෝගිකයාය
විටෙක කඩයට මස සපයන
තැරැව්කරුවාය
විටෙක දඩයම කරන මස් වැද්දාය
නැතහොත් දඩයම අපම
එවිට විකිණෙන රස මස අපය
නැතහොත් නොවිකිණෙන කුණු මස අපය
ඔබ විජිටේරියන්?
මා බාබේරියන්?
අවසන අපි මැරෙන තුරු කිරට මිරිසට මස් මර මරා බුදින්නන්
කීයද මේකෙ ගාණ?
මේකෙ ගාණ කීයද?

මූණ - හංගන්නෙපා(ඒත් ලැජ්ජයි නම් කමක් නෑ)

මම කැමති මූණ මට නෑ කියල හිතුනම මිනිස්සු වෙනස් මූණකට තමන්ගෙ මූණ මාරු කරනවා, ඒකට තේරෙන සිංහලෙන් කියන්නෙ ප්ලාස්ටික් සැත්කම.
ඇත්තටම හදවතේ තියන දේ මූණෙන් පේනවා කියල සමහරු කීවත් ඒක අන්ලිමිඩට් ලෝකයක හංගන්න, බොරු කරන්න වෙන කතාවක්. මූණෙන් තියා වීදුරු බෝල වගේ ඇස් අස්සෙන්වත් අද හදවත් දකින්න අමාරුයි. ඒකට ස්කෑන් කරන්නම වෙනව.
එහෙම කාලෙක උනත් තාමත් පුංචි පුංචි සිඟිති තැන්වලදි, රිංගලා ගියොත් හිර වෙන්න වෙන තැන්වල දි ඇස් වලින් මූණෙන් දෙන්න වෙන අවංක කම සමහර විට කැමැත්තෙන් හෝ අකමැත්තෙන් අපිට දෙන්නම වෙනව..දැන් රියලිටි ෂෝ වල නැතත්.
 සාත්වික අභිනය ප්රගුණ කරයි කියල ඒක තත්පරේකට හැඟීම වහගත්තත් ඇත්ත හැඟීම මුදා ගන්න නාන කාමරේ හරි ළිඳ ළඟ හරි අඬන්නත් වෙනව.
රබර් බොලේ දිය යට ඔබල තියන්න බෑ.. ඒත් ජීවිතේ සුළඟෙ පා කරල අරින්නත් බෑ. සරුංගලේට නූලක් තියෙන්නෙ ඒකයි. මූණයි, ඇස් දෙකයි හැඩ කරන ඔළුව ඇතුළෙ මොළයක් තියෙන්නෙ අන්න අර හදවත සරුංගලේ වගේ හුළගෙ පියාඹන්න ගත්තම කූරිය ගහන්නෙ නැතිව අහසෙ ඉහළටම ඒක අරන් යන ඕන කරන නූල ඔතපු නූල් පන්දුව කර ගන්නයි.
ඒ නිසා ඒ පන්දුවෙන් සෙල්ලම් කරන්නෙ ප්රවේශමෙන්..මොකද පටල ගන්න ලේසි උනත් පැටළුණු නූල්බෝල ලෙහාගන්න එක ගොඩක් දෙනාට ලේසි වෙන්නෙ නෑ..   එතකොට ආපහු මූණ මාරු කරන්න හිතෙන්න පුළුවන්..
ඇත්තටම ලස්සන තියෙන්නෙ කොහේද? මූණෙ, හදවතේ? මොළේ? සමහරු කියන්නෙ බලන කෙනාගෙ ඇස්වල.. තේරුම් ගන්න පුළුවන්නම් හැමදෙයක්ම නිර්මාණය වෙන්නෙ ලස්සන අවලස්සන දෙකම එකට එකතුවෙලා කියල..
ගොහොරු මඩේ පිපෙන නෙළුම් වගේ දෙපතුලේ මඩ තැවරුණත් හදවත බුද්ධියෙන් ඔසවා ගනීවි මූණේ මඩ නොගෑවෙන්නට....
එතකොට ආපහු මූණ හංගන්න ඕනම වෙන්නෙ නෑ.

අස්සයා ඉස්තාලේ නෑ, ඌ වැසිකිළි ගිහින්..(ඉස්නානය කර ඌ එනතුරු ඉස්තානේ රැකගන්)-මරු මරේ

හැමතැනම සිංහලෙන් කීවොත් මැකැනිසම් ප්රශ්නය. ඉංග්රීසියෙන් ගත්විට කැවුමේ ප්රශ්නය. දෙමළෙන් ගත්විට පොලිටිකල් ප්රශ්නය... මේ අනුව කරුණු ප්රක්ෂේපණය කර උද්දීපනය කළ විට පෙනෙනුයේ පාර භෞතික අධෝ භෞමික තත්වයකි. සිංහලෙන් නම් ප්රශ්නයට විසඳුම් දීමට හොඳ ගරාජ් බාස් කෙනෙක් රජ කරවිය යුතුය. ඔහුට මැකැනිසම් හොඳින්ම ප්රැක්ටිකල්ය. ඉංග්රීසියෙන් ගත්විට කැවුම් තහනම් කළ යුතුය. අසවලා මෝඩයා කැවුම් කණ්ඩ යෝධයා යන්න එමඟින් වෙනස් කළ හැකිය. ඒ වෙනුවට අවැසි නම් මැන්දිස් වැනි පානයක් හඳුන්වා දිය හැකිය. දෙමළෙන් විසඳුමක් ගැනීමට නම් අදියරෙන් අදියර ෆඬරැල් පොලිටිකල් විසඳුමකට අප යා යුතුය.
මගේ යෝජනාව නම් බන්ධු-ටෙනිසන් ආරේ ප්රහසන කලාව වර්ධනය කිරීම මඟින් අපට බොහෝ ප්රශ්න වලට සරල පහසු විසදුම් කරා ලේසියෙන් ආ හැකි බවයි. රට පෙත්තටම නැංගිය හැකි බවයි. සිනාවෙන් ජොලියෙන් වදයක් නැතිව දෙපා උඩ තබාගෙනම ජනයාට සංවඩ්ඩණය විය හැකි බවයි.

ගුරු-මරු මරේ

(අරුත පහක් දාන්න, යටින් පෙනෙන අවස්ථාවට සම්බන්ධයක් හදන්න, මල් වඩන් ලෙඩා බලන්න යන්න, ගත හැකි ආදුරුසය ලිප තබන්න, නැතිනම් ශිශිර තරණයේ තබා පසුව ලිප්බොක්කේ පැළ කරන්න)

ගුරු මුෂ්ටිය ද
ගෝලයාට දුන් පසු
ඩබල් එකේ
ඒ ඔළමොල ගෝලා
සිතා එය යෂ්ටියක්
ඩබලක් සේ
අමුණා දෙකොන
නන්චකුවක් සේ
වනා දුහුනන් ඉදිරියේ
වෙන්නට සිතා පොරක්
වැදුනාලු සොම්බටම
ඩබල් එකේ
වැනුවාවු වේගයේ
දැන් ඌ ඉස්පිරිතාලයේ
හදිසි අනතුරු ඒ කකේ
ඌ තේරුම් නොගත් දේ
ඩබල් එකේ
වන්නා හැටිය
කූල් එකේ

ගෝඩ් එනකං! (කොමන් මෑන් නිකං හිඳීද???)

බොරු පණ පිහිටුවා ඇවිදිද්දී
සත්‍ය කනත්තේ මර නින්දේද?
බොරු වේ සදාකාලික සතුරා
සත්‍යයේ පුත්රයා හෙට උපදින්නට නියමිතය..

ගොම රිටි මිටි පිටින්
උඩ දමති හරි තුටින්
ලැජ්ජාව වැඩි කමිං
සත්‍යත් රෙදි ඇඳන්..

මං තරම් අශුද්ධ මිනිසෙක්!

රැවුල කොණ්ඩය නිසා වූවා නොවේ
ස්නානය අකුරට කළ නිසා හෝ එක්තැන් වීමෙන් වූවාද නොවේ
යහමින් පෝෂණ සත්කාර ඇති බව නොදැනීමෙන් බිනුවාද නොවේ
ශුද්ධ වූ මිනිසුන් දැක්මෙන් ම සිතෙන්නක්ද නොවේ
මා ගැන අනුන්ට වඩා දන්නා නිසා සිතෙන්නකි
රංගනය සන්නිවේදනයට මිස ජීවිතයට ආලෝකයක් නොවන බව දැක කියන්නකි
නමුත්, ඔබට වඩා අහිංසක මිනිසෙකි මා
එලෙසම දරුණු මිනිසෙකි මා
එනිසාම එතරම් අශුද්ධ මිනිසෙකි මා
එනමුත්, තවමත් චෝදනා පත්රයක් නොමැත
යෝජනා පත්රයක්ද නො දමනු මැනවි
මා කුප්රකට ඇලෝසියස් හැර තවත් ඇලෝසියස්ලා කිහිපදෙනෙකු නම් හඳුනමි
ප්රකට මහින්ද, ගෝඨාභය තබා රනිල් මෙෙත්රීත් නොහඳුනමි
යමරජ, සාතන්, යමයන් හැර සමයන් ගැනද අසා ඇතිවා පමණය
එනමුත්, නැවත කියමි
මම අශුද්ධය
සෙම්, සොටු, කිලි, බලි, බිලි නිසා නොවේ ඔබට සාපේක්ෂවද නොවේ
නිරපේක්ෂව මිනිසෙක් ලෙස
පවිත්‍රත්වය පෙනෙන තැනක
දැනෙන තැනක
අවැසි තැනක

ආදරය නොහඳුනන මිනිහෙක් මා තරම්

කළ නොකළ බොහෝ දනා බොහෝ දේ ලියූ බැවින් නොලීමි, නොවේ
ආදරය නොදන්නා බැවින් නොලීමි, මෙතැන්හි
කල්තබා ලියූවක් වී නම් ඉල්ලා අස් කර ගනිමි, මෙකල්හි
නොදැන කළ වරදට සමා වුව මැනවි
බැඳීම යන්න හැර එහි දෙබෙදුම් නන්වැදෑරුම් සූචි නොදනිමි
එහෙයින්ම අහිංසක මිනිසෙකි මම
අලවංගුවකින්ම උදුරා දැමු ලෙස මුලුත් අල,
ආල මුල් හෝ අල දැන් සාර පොළොවේ නැත
තල මෙනේරි කුරහන් ටිකක් වත් වපුරන්නට දැන් හැකිය
කුරුල්ලන් අලින් නෙක වන සත්තු ඇසුරට බාධා නැතිය
හේනක් කොටා ගෙන පැලක් හදාගෙන කුඹුරක් කර ගෙන ....
හිතුවාට එසේ, හුළඟේ ගසා යන වරා මලක්  වත් දඬුවැටට උඩින් පියඹා එන්නට බැරි නැත
තරහ අවසර..
ඒවා ඉවත ඇදෙන්නේත් සුළඟින්මය
නොසිතමි එවග, පලාඵල කුමට .. ආලය නොහඳුනනම මා හට

ඔව්...නෑ...බෑ...රජෙක් ඔටුන්න පූජාසනේ තබා නහයෙන් හැඬීය. (මටත් කඩුවක් නෑ, මමත් හඬමි)

මේ රටේ සුදුස්සාට, සුදුසු තැන කවදා ලැබේවිද? බලෙන් ගත්තොත් මිස කවදාවත් නොලැබේ වි...මේ බලෙන් ගැනීම ත්‍රස්තවාදය නම් ඒ ත්‍රස්තවාදයට උඩගෙඩිදෙන්නේ කව්ද? මේ රටේ ඒ චින්තනය වඩන්නේ නගන්නේ පැලකරන්නේ කව්ද? බලය ගත්තු ඉහළම පුරවැස්සා අප ඉදිරියේම නහයෙන් අඬනවා නම්...
මෙෙත්රී බලය ගත්තේ නහයෙන් අඬන්නටද? බලය ක්, විධායක බලයක් නුඹ සතුව ඇත්තේම නැතිද, මහත්තයෝ... කඩුව වනනවා කීවා, අවිචිය නරකාදිය ගැන කිවා..තව බොහෝ දේ ඔබම කීවා...ඒව සියල්ල අර මහින්දගේ වගේ "අපෙ  හාමුදුරුවනේ" කථාද? සිංහයෙක් පරිදි සටනට ආවා නම් කුක්කෙකු පරිදි කෙඳිරි ගෑ යුතුද? අපි විශ්වාස කළ යුත්තේ නුඹලා බලය ගන්නට  පෙර දාන ගර්ජනාද? පසුව දමන කල්පනාද? මහින්දගේ මග හරවන්නට නුඹට දුන් බලය රනිල්ගේ බලයට යට බවද නුඹ නොකියා කියන්නේ.. කව්රුන් හෝ නිසා වේවා නුඹලාගේ නාඩගම් තව දුරටත් විනාශ කරන්නේ මේ රටේ යහ ජනතාවගේ හදවතේ විශ්වාසයයි. මේ රටේ හදවතේ සාක්ෂියට කොලොප්පම් කරන පාර්ලිමේන්තුවත් සමයං දේශපාලන උගුඩුවෝ රැළත් ඊටම සරිලන ඒ පස්සේ වැටෙන ඉඳුල් බත් කන බත්බැලයින් රැසත් දැන් සිටින්නේ එකම වැසිකිළි පෝච්චියකය. මට නම් පෙනෙන්නේ එපමණයි. එතැනින් එන කවරෙකුගෙන් එන්නේත් එකම ගඳ නොවන්නට නම් පරණ වළෙන් නාලා ඇවිත් බැරිය. ඒ වළ දැන් අසුචි වලකි.

අලුත් අලුත් දෑ නොතකා, නොතනා නූල් සූත්‍ර වලින් ජනතාව නටවා යන්නට ගියෝතින් නුඹලා හැම ඔය පෝච්චියෙන් වළට යන්නට ඉක්මන් සුදුස්සන් වනු ඇත.

කණගාටුව නුඹලා ගැන නොව අප ගැනමය. රට ගැනමය. හැමෙකා අවංකව හිතන්නේ රට ගැන නම් නැත්තේ ක්රමයක්ද? වතුර බිඳක් නැති, සාර බිඳක් නැති පොළව ඇති රටවල් සිය ඉරණම් කණපිට ගහද්දී.. අපි පාපෝච්චාරණය කරමින් හඬා වැටෙමු බලය හා බලවතුන් ඉදිරියේ..

වැටි සියයක්! ම දල්වමු..

ඕනෑ කුමක්ද
වැටියක්ද
දුමක්ද
දල්වන්න
එනවාද
එයින්
තව
වැටියක්ම
එහෙනම්
දල්වන්න
වැටියක්ම
පහන්
දල්වන්න
තව
එයින්
වැටියක්ම
පහන්..

අධි පොසොන් දා අධි න්‍යායන් නැති අධික ඇත්ත අධිකව කියමි (එහෙම යකෙක් වෙයන්)

පාදමක් නැතිව ගෙයක් හදන්නට බැරිය. හැදුවත් එය පවත්වාගෙන යන්නට බැරිය. මුළක් නැතිව ගසක් නැති සේම මූල පද්ධතිය කුණුවූදා ගස ඇද වැටෙන බවද සත්‍යය. එසේනම් අසම්පූර්ණ පාදමක්, කුණු වූ මූල පද්ධතියක් ඇති රටකට තවදුරටත් ඒමත පැවැත්මක් නැති බව නොකිවමනාය. පැහැදිලිවම මුක්කු ගසා රට නොවැටී තබාගන්නට තවදුරටත් කිසිවෙකු සමත් වන්නේද නැත. එසේ හැකි උන් සෙවීම වත්මන් දේශපාලනය නඩත්තු කරන එක් සර්වාංග කුපාඩිකමක් පමණි.

යුද්ධයක් නිමා කළේය. එය ශරීරයේ කොටසක් වණවී කුණුවී ගැලවී යන්නට ගොස් යන්නම් නොකපා බේරා ගත්තා හා සමානය. නමුත් නොසෑහෙන වියදමක් දරා ගොඩදමාගත් ශරීරය ප්‍රකෘතිමත් කර වැඩක් ගන්නවා වෙනුවට අපි ඒක සමරන්නට ඇඟ පුරා පච්ච කොටා ගතිමු. වැදගත් විදිහට අතේ පයේ වශයෙන් පටන්ගත් ටැටූ නැටුම ජය බෙදාගැනීමේ තණ්හාව මත කටේ, පිටේ, මුහුණේ පමණක් නොව බඩේ, පපුවේ, පශ්චාත් භාගයේද ටැටූ ගසා ගතිමු. දැන් ඇත්තටම තවත් වණයක් හැදෙන තරමටම ඒ ටැටූ කෙළිය අවකෙළියක් වී ඇත.

මේ සියල්ල අස්සේ ගතවූ කාලය පුරාවට සිදුවූයේ ලාවට ලාවට අටවාගෙන තිබූ රටේ පාදම බිඳී හැලීමයි. ඇද වැටීමයි. අවුරුදු ගණනාවක් තිස්සේ ඒ ගරාවැටීමේ හේතුප්‍රත්‍යය සම්පාදනය වූයේ උතුරු නැගෙනහිර යුද්ධය නාමයෙනි. ඊළඟට දකුණේ භීෂණය නාමයෙනි. සියල්ල ගිණුම්කරණයෙන් විසඳා බැලූ විට එක එකාගේ නමට ලියා ගත් හර බැර හැරුණුකොට අද රටට ඉතිරි වී ඇත්තේ පාසල් පෙළ පොත්වල ඇති දැනුමත්, පරිගණක වල ඇති ඩේටා, දවස් හතරක් කඩින් කඩ වැස්සත් නාසයෙන් ඉහළට වතුර නගින හා ගිලාබහින පොළොවක්, දවස් පහක් තවදුරටත් ගොඩ ගැසීමෙන් ගිනි ගන්නට අරඅදින කුණු කඳු හා ජාතිවාදයේ, ආගම්වාදයේ ආස්වාදයෙන් මනදොළ සපුරන ඇල්මැරුණු මුත් බඩගෝස්තරයේ අයිතිය වෙනුවෙන් නම් මරාගෙන මැරෙන, කැපවීමෙන් තොරව කේතුමතියක් පතන, කඳ ඊස්ටන් ඔළුව වෙස්ටන් කකුල් ලතින් ඇමරිකන්, නන් දොඩවන හුදී ජනතාවක් පමණි.

දැන් අපට ඇත්තේ පැහැදිලි විකල්ප දෙකකි. උපන් බිම ගෙඩිය පිටින්ම කුණු කොල්ලයට විකුණා දෙකෝටියටම කීය කීය හරි බෙදා ගැනීම එකකි.
නැත්නම් මේ අභියෝගයෙන් ගොඩ ඒමට ත්‍රස්තවාදයෙන් සමඟ කළ යුද්ධයට එහා යුද්ධයකට යා යුතුය. අනාගතය උදෙසා වාදබේදයෙන් තොරව අති දරුණු කැපකිරීමක් කළ යුතුය.

නමුත් ඊට පෙර මේ ටික නම් නිරාකරණය කර ගෙන සිටිය යුතුමය.

අපි පෙර යුද්ධයක් දිනුවා තමා. එහෙත් ඒ ත්‍රස්තවාදයට එරෙහි යුද්ධය දිනුවේ මහින්දවත්, ගෝඨාභයවත්, ෆොන්සේකාවත් ද? එසේ නැත. ඔවුන් කළේ වගකීමක් ඉටු කිරීමකි. ඒ වෙනුවෙන් කැපවීම් කළේ මහජනයාය. දිවි දුන්නේ ද රටේ ජනතාවය. හමුදාව යනු ජනතාවගේ දරුවන්ය. සතුරන්ද ඒ ජනතාවගේ දරුවන්ය.  දිනුවේ යහපතය, පැරදුනේ අයහපතය. එපමණකි.
භිෂණ සමයේ සිදුවූයේ කුමක්ද? එයත් සටනකි. යම් අරමුණක් උදෙසා පෙළගැසුණු සමූහයක් හා රජයක් ගැටිණි. සමස්ථ රටේ ජනතාවටම විනාශය අත්විය. සටනක අරමුණ කවරක් වුවත් අවසන රටට ලැබුණු ජය කුමක්ද? කවර භීෂණයක වුව අවසන් ප්‍රතිඵලය රටක පරාජය යි. යුද්ධයේදී මෙන් බර අවි නොදැරුවත් ගිනි අවි ගන්නා කවර අරගලයකදීත් ප්‍රතිඵලයේ බර මැනෙන්නේ ජීවිත වන්දියෙනි. දේපළ හානි, පරිසර හානි පසෙක වේවා..
ඒ නිසා රට නගන්නට යුද්ධ කළයුත්තේ සැබෑවටම කවර අවි ගෙන දැයි ඔබම කල්පනා කළ යුතුය. කව්රුන් දිනවීම සඳහාද යන්න ඔබම තීරණය කළ යුතුය.

කලක පටන් අප පරිසරය හා කරන මුග්ධ යුද්ධය උදෙසාද අද අපි වන්දි ගෙවන්නේ  ජීවිත වලිනි. නමුත් හැමදේටම තාවකාලික පැලැස්තර ගසන අපි දැන් නහයට උඩින් වතුර යෑමද නොදැනෙන තරම් මළකඳන්ව සිටිමුද?
පරිසරය හා යුධවැදීම යන්න තරම් වන ගොන් කමක් තවත් වෙත්ද?
ඒ නිසා අපි අපේ විකල්පය, ශුද්ධ වූ යුද්ධය  පටන් ගත යුත්තේ පරිසරය නැමති පාදමෙනි. ඒ ගොඩනැගීම සඳහා කටයතු කළ යුත්තේ දුර දකින බුද්ධියෙනි. ඊට ප්‍රාග්ධනය හා ව්‍යවසාය විය යුත්තේ ද අපේ බුද්ධිය, කැපවීම හා පරිත්‍යාගයමයි. අප රට ගොඩ නගා ගත යුත්තේ අප සඳහාමයි.    ජීවිතයෙන් රට වෙනුවෙන් වන්දි ගෙවූ මිනිසුන් හිටි රටක අපට අපේ ජීවිත කාලයෙන් කොටසක් රට වෙනුවෙන් පරිත්‍යාග කළ හැකිනම්.. රට නැඟුමේ විකල්පය එයමයි. නැවත කිව යුත්තේ අප  පළමුව හදාගත යුත්තේ පරිසරයයි. එතැනින් පටන්ගෙන රටම අලුතෙන් හැදිය යුතුය. අලුත් රටක් තැනිය යුතුය. අප ඒ අලුත් රටේ මිනිසුන් හැටියට අභිමානයෙන් ජීවත්වීම තබා මිය යාමටවත් සිතන්නේ නම් අධිකව ඇත්ත කතා කරන්නට පටන් ගත යුතුමය. නිවට කම හෝ ගැතිකම නිසා මහින්දගේ, ගෝඨාභයගේ, රනිල් හෝ මෙෙත්රිගේ, අනුරගේ තබා සම්බන්ධන් හෝ විග්නේශ්වරන්, හකීම්, තොණ්ඩමන් හෝ දිගම්බරන් ගේ වත් පාට පක්ෂ වලිග වල එල්ලෙන්නට නොයා යුතුය. මේ රටට දැන් අවශ්‍ය වැඩපිළිවෙළකි. අද ඊයේ නොවේ, යුද්ධය නිමාවේදීම අපිට අවශ්‍ය වූයේ ඒ වැඩපිළිවෙළයි.  මහින්ද ඒ පිළිවෙළට නොපිළිපන්නේය. මෙෙත්රී රනිල් දැන් ඕසෙ අදින්නේය. මිනිස්සු පිල් බෙදී වල් වැදී දැන් බඩගෝස්තරය නගාගැනීමේ පිස්සුවෙන් ය. රට භෞතික ගුණයෙන්ද  මිනිසුන්ගේ මිනිස් ගුණයෙන්ද සීග්රව පිරිහේ. වෘද්ධයෝ නන් දොඩති. උගත්හු තර්ක දමති. අවශේෂ දේශපාලුවෝ සිය අනාගතය සොයති. දුර්වලයෝ පලා යති. ආත්මාර්ථී නැණත්තෝ කැපවීමට නොහැක්කේ පලා යති. දිළින්ඳෝ මිහිපිට දෙවියන් යදිති. ජන මාධ්‍යය දේව දූතයාගේ සිට දෙවියන්වහන්සේටම අඳිති.

දැන් අප කළයුත්තේ අපට කළහැකි දේ කිරීමය. නිවැරදිවම කළ යුත්ත නිවැරදි කිරීමය. බොරදියේ මාළු බාන්නට හදන අඳ බාලයන් දැන්වත් තේරුම් ගත යුත්තේ බොර දියේ තමන්ට බා ගන්නට මාළු කිසිවෙකුත් දැන් නොමැති බවය. දිය බොර වීමෙන් තව දුරටත් වන්නේ අපට ගෙඩිය පිටින්ම මඩේ ගිලී  මියැදීමට ඉඩ සැලසීම පමණි.

ඒ නිසා දැන් කාලය නසන න්‍යාය ශාස්ත්‍ර මත්තේ නැහීමද අත්හැරිය යුතුය. මොන නැටුම නටන්නටත් ගිලෙන නැවක් මත්තේ අවකාශ නැත. අරක මේක කියා තම තමන්ගේ කොටස බේරාගන්නට සමස්ථය ගිලෙන නැවක ඉඳන් බැරිය. ගල්පරයකට හෝ හේත්තුවක් දමා වරායකට ඇදගෙන යන්නට කටයුතු සලසාගතහොත් නැව අලුතෙන් හදාගත්ත හැක. එච්චර හරියක් බැරි නම් නැව අතහැර ඉතිං පැනපන් මුහුදට තමා..

සද්භාවයෙන්ම ඔළමොලයින්ගේ කණට ගසා හිස් බිමට ඔබා නැගිටිය යුත්තෝ දෙපයින්ම කොඳු කෙළින් කොට නැගිටිත්වා!

මේ රට හැදෙන්නට නම් වැඩ කරන කරවන යකුන් මිස තමන් හැදෙන තම පරපුර හදවන උන්ගෙන් වැඩක් නැත.
කාගේත් දැනගැනීමට උවමනාව ඇතුවා නැතුවා, අභිමානයට කියා, කරපන්.. මම එහෙම යකුන්ගේ ගොඩට එක්වෙමියි, කියා.

එ..නිසා....උපන් නාද

අසීමිත ආශාවන්
සීමිත ඉඩ කඩ
පරාද වනු අකැමැතිය
නිති පැරදුම හිමිය
එය මුදු වෙද
රළු වෙද
සුදුමුදුව නොපවතිනු ඇත
අබිමුව සලිතවද දුර්මුඛවද හඬා වැටෙත්
දෑත් විදා වැළඳගනිත්
කළ දේ මෙතෙක් තබා යත්
රැස්කළ දේ දමා යත්
හය හතර ගැබ තුළ
සැතපෙත් ගොළුවෙත් දැවී හළු වෙත්
එහෙත්...
ඊට මොහොතක් කලින්
අවසන් සුසුම් අග්ගිස්සෙන්
නැගෙනා වු විත්තක්ෂණයක්
ඇසිල්ලකටත් කලින් පියඹා
මතුවී තවත් තැනකින්
පැමිණෙන්නේලු ආපසු
නැවුම් නෑඹුල් වෙසකින්
අසීමිත ආශාවෙන්
සොයා සීමිත ඉඩකඩක වාසයක්
අත්හරිනු නොහැකිව
සසර බැමි
බැඳි වීණා හඬවමින්..

වැස්ස, අකුණු, ආපදා - ඔව් - ස්වභාවිකයි තමයි..

ස්වභාවය බොහෝ දේ කර තිබේ. අදත් බොහෝ දේ කර තිබේ. අපත් බොහෝ දේ කර තිබේ. කඳු නාය යද්දී රට සමතලා වෙද්දී වතුර දෙගොඩ තලද්දී ... අවුරුදු කීපයක් ආපස්සට යද්දී, අවුරුදු කීපයක් ඉදිරියට හිතද්දී... මිනිස්සුන්ගේ දිරිය එදිරිය සමඟ නොනවතින අරගල මැද... තවමත් වාසි සොයන්නේ කව්ද? යුගයෙන් යුගයට කරුමය උරුමය කොට ගන්නා, එතැනම ලගින වරද කාගේද? වැස්ස වසී, අව්ව පායයි, පායන කළ ගී ගයා තුටින් වෙසෙන තණකනපෙත්තෝ අපි වම්හ.. එක අතකට එය වැරදිය. පායන කළ අප මර ගී ගයන්නේ වැඩි පංගුව දිනා ගන්නටය. වැඩි පංගුව නැති ජීවිතය තිත්තය. ඒ අනුව අපි එක එකා හැටියටත් ලක්ෂ ලක්ෂ ගණනින් ලෝකෙට ණයකරුවෝය. වැසි සමය වෙනස්ය. බාධා වැඩිය. ඒත් ආධාරයේ වුව වැඩි පංගුව අපට ඕනෑමය. එනිසා අහස ට දෑත පා මුහුද දෙස බලා මාධ්‍ය චැනල් වීරයන් අප ගලවා ගන්නට එන මෙහෙයුමට වසරක් පාසා අපි දැන් හොඳින්ම සූදානම්! සුදුපිරුවට අඳින අයත් පව් මඩ වතුරෙන් හෝදාගන්න සූදානම්!
මේ ආපදා සමයයි! ස්වභාවයේ ස්වභාවයට නිගරුකොට ඇනගන්නා සමයයි.
කාළගුණය හරි ස්වභාවිකයි තමයි. ඒත් අපේ ජීවිත දැන් හරිම අස්වාභාවිකයි.
(මේ අපේ රට නොව ඈත රටක ස්වභාවයක් නිසා අපිට අපි ගැන හිතා හැම කලකම කොතරම් නම් සොමිබරව සිටිය හැකිද, ප්‍රීති බොහෝ වේවා!)

මැරෙන්න පැලෙන්න ගොඩ ගොඩාක් ආදරේ... යි (අන්ධ භක්තිය නොහොත් ප්‍රණාමේ සමඟ හෙලුවෙන්)

අපි රණවිරුවන්ට පුදුම විදිහට ආදරෙයි, ඒ නිසයි උතුර ගැන ආඩපාලි කිය කියා දකුණෙදි බෙදි බෙදී දේශපාලන වාසි හොයන්නෙ.. ඒ වාසිය අරගෙන උතුරට තවත් දුර්මත වපුරන්න ඉඩ හදල දෙන්නෙ.. එහෙම වුනාම රටක හමුදාවක් කරපු අතිශය කැපවීමෙන් රැකුණු රට තව දුරටත් ඉදිරියටම යනව.. යුද්ධය ඉවර කරපු තැන ඉඳලම දකුණ වාසි තකා පිල් බෙදුණ, ඒකයි අපේ ඉහළම රණවිරු ප්‍රණාමේ. ඒ බෙදීම් අතින් කොයි කවදත් අපි හරි ඉහළයි. ඒ බෙදීම් සඳහාම පහළ වුණු දකුණ බෙදීමේ පාරමිථා පුරන වීරයො මෙහෙ ඉන්නව. මෙහෙ බෙදි බෙදී රට බෙදන්න දෙන්න බෑ කියල පාරට බැහැල සටන් කරන්න තරම් අපි මාර නුවණක්කාරයි.. දකුණෙ අපි පුහු වාද භේද මත නොබෙදෙන තරමට අපේ රට ශක්තිමත් රටක් වෙනව කියන මතයට එන්න, රණවිරුවන්ට නිසි ඇගයීම ලැබෙනව කියල හිතන්න බැරි තරමට අපි නම්බුකාරයි. ඒක තමයි හැමදාම රට ගැන අපිට තියෙන ආඩම්බරේ. ඒ බෙරේ ගහන් තව තවත් බෙදි බෙදී දකුණෙන් වාසි ගන්න ගිහින් අපි විහින්ම උතුරේ දුරාබෝධ තවතවත් ශක්තිමත් කරත්වා! ඔය බෙදීම් දැක දකුණේ නින්දිත අවස්ථාවාදයන් දැක රට වෙනුවෙන් දිවි දුන් රණවිරුවෝ ආසිරි සෙමර සලාවි අපි හිතනව... තවදුරටත් ඒ මියගිය සියලුදෙනා වර්ග බේදයකින් තොරව එකම කොටසක් ලෙස අපට නොපෙනෙන මානයක උපදින්නට පැතුම් පතා වි.. මට හිතෙනව.
තෙල් පහන් දහසක් දල්වන තැන එක නැණ පහනක් දල්වාගන්නට අසමත් ජාතියක් වෙනුවෙන්, දිවි දුන් මියගිය සියලු දෙනා පමණක් නොවේ ජීවත්වන අපත් අනේ අනිච්චං!
දෙවියන්වහන්සේ අප රැක ගනිත්වා!
බුදුදමින් නම් අශ්වයන් පුහුණු කරන්නා අතරැ දමන නොහික්මෙන අශ්වයන් සේ අප සළකනු ඇත්තේ නොරකින සිල් නැවත නැවතත් ගන්නා අප සරණේ වරුණ ගැන කීමට ඇති උදාරම නිසාම වනු ඇති. එනිසා මම බුදුසරණ ම කියමි.
(පොසොන් සඳහා සූදානම් කළ ඥාන කතා දන්සලේ පස්සා දොරෙන් කලින්ම උස්සා මේ විසිකරන්නේ කාගේ හෝ චිරස්ථිතියක් උදෙසාය, වැටෙන්ට පෙර බිමට අල්ලා දමා ගන්න සුදුසුම තැනට)

ඔපරේෂන් බයිපාස්-ෆො ජෙනරේෂන් නෙක්ස්ට් (full fun & fun full)

ජීවිතය විඳින්න ඕනේ..හැමදේම ලස්සනට වෙන්න ඕනේ.. අපි තේරුම් ගන්න ඕන මෙච්චරයි, කවුරුත් වැරදි නෑ එච්චරයි..
ටියුෂන් ගුරුවරුත් හරි, රජයේ ගුරුවරුත් හරි, වෙෙද්‍යවරුත් හරි, හෙදියොත් හරි,  දේශපාලකරොත් හරි, දේශමාමකයොත් හරි, ප්‍රයිවට් බස්, සී ටී බී, පෘතුගීසි, ලන්දේසි, ඉංග්‍රීසි, මල්වතු, අස්ගිරි, සීගිරි ගියෙ නැති, කොටින්ම ප්‍රභාකරන් විතරක් නෙමෙයි, හිට්ලර් වුනත් වැරදියි කියල අපි කියන්නෙ කොහොමද?
අතීතය පැත්තකින් තියලා ආපහු අපි ඉන්න තැනට එමු. මේ ඉන්න ටික කාලෙ ජොලියෙන් ෆුල් ෆන් එකේ ඉන්න නෙමෙයිද කොයි කව්රුත් කැමති, ඉතිං හැම දෙනාටම තම තමන් කැමති විදිහට ජීවත්වෙන්න ඉඩදෙන්න බැරි ඇයි?
රට යන්ට, රට කන්ට, හොරා කන්ට, හම්බ කරන්ට, දූෂණයට, වංචාවට, උද්ඝෝෂණවලට, මැරකම්වලට ඇයි මේ නොයෙකුත් බාධා.. මොකටද රටේ නැති නීති, ඕව තියෙන එකෙන් වෙන්නෙ මිනිස්සුන්ට ජීවිතේ විඳින්ට තියෙන කාලෙ නිකං හාන්සිවෙලා නැති නාස්තිවෙලා යන එක විතරයි. පගාවක් දීල වැඩක් කර ගත්තම මක් වෙනවද? ජාතීන් හැටියට ආගම අනුව බෙදිල ගහ ගත්තම, පක්ෂ හැටියට බෙදිල මරා ගත්තම ඒක කොච්චර නම් කික් ද? ඉපදුණු දා ඉඳන් අපි ගන්න මේ ආතල් එක තව තවත් වැඩි කරන්නයි අපි ජනතා නියෝජිතයො පත් කරන්නෙ.. මම කියන්නෙ මිනිස්සුන්ව මිනිස්කමෙන් බඳින්නෙ නැතුව ඔය නීතිය කියන දම්වැලෙන් ලෙහල අරින්න.. ඒක හොරාට කරන්නෙ නැතිව ප්‍රසිද්ධියෙ කරන්න.. අපි අත් දෙකම උස්සල කාල බීල මැරෙන්න ලෑස්තියි.. මම කියන්නෙ ඒකයි, හිතට හොරා මඟුලක් කතා නොකර අපි අර ළඟදි නම වෙනස් කරපු රට ස්වාසිලන්තෙටත් වඩා කොර කරමු මෙහේ.. රාජපක්ෂද, මෙෙත්රිද, රනිල්ටත් පුළුවන්, නැත්තම් අනුර හරි.. මොකා හරි.. අපි මේ ගේම එළිපිට ගහ මු.. මොකෙක් වත් කැප වෙන්න ලෑස්තිත් නෑ, කැප වෙන්න ඕනත් නෑ, කැපවෙන්න ගිහිල්ල කැපිල යන්න ඕනෙත් නෑ, හැබැයි හැම දෙනාටම, රටටම අාතල් පිට ඉන්න තියෙන්න ඕනා.. ඒක කරන එක රට කරවන උන්ගෙ වගකීම, හැබැයි එහෙම නොකරයි කියල අපි උන්ව මරාගෙන මැරෙන්නෙ නෑ.. සද්දයක් දානව, එතකොට උන් අපිට ආතල් එකක් දෙනව, පට්ට.. ඒක හරහා අපි පොර වෙනව, බොක්කෙ ෆිට් එක තමා, උන් හරියට කරන්නෙත් නෑ, අපි කරන්නෙත් නෑ, දෙගොල්ලම එක එකාට හොරා දාන ලව් සීන් තමා.. නමුත් කට්ට ලව් එක.. මං කියන්නෙ දැන් තාක්ෂණයත් දියුණු නිසා හංගලා ගහන එක එළිපිට ගහ මු කියල.. යටින් දෙන ගේම නෝ රූල්ස් ෆ්රීස්ටයිල් කියල ඒක ලිංගික, සම ලිංගික බැරිනම් ව්‍යභිචාරී කියල සත්තු දාල හරි එළියෙ ගහමු.. කාලයක් දැකපු එක්ස් කණ්ඩායම් වෙනුවට විකල්ප වයි කණ්ඩායම් හරි හැදිල, ප්‍රභාකරණ් වෙනුවට තවත් කව්රු හරි හැදිල, දකුණෙන් දියසෙන්ල නැවත හැදිල, 71,88 බැරි වුණ දේ 2020,21හරි අාපිට ගහල රටම හොට් කරල රොක් කරල රත්කරල ගිනිහල් කරල හරි මේක හොට් ඇන් ස්පයිසි ෆුල් ෆන් රටවල් අතර කූට ප්‍රරාප්තියට ඇවිත් ගිනි ගොඩවල් මැද්දෙ ෆුල් ආතල් පිට මැරිල යන්න අපි බලාන ඉන්නව... අපිට වඩා වැඩිහිටියන් ගෙන් කරන්න තියෙන ඉල්ලීම ඔබලාගේ නහින දෙහින කාලේ උපරිම ෆන් එකේ ෆුල් ඔප්ෂන් විගඩන් ටික කරපල්ලා.. පුළුවන් තරම් මේක කාපල්ලා...අපිට මාර සතුටුයි, කවද හරි ඉතිරියක් තිබුණොත් ඒ ටික අපි කන්නෝ...
අපෙ හාමුදුරුවනේ අපිත් කලින් පරපුර වගේ තනිව කන් නෑ.. මුල් පංගුවෙන් කොටහක් හරි, කාට නැතත් මල් වත්තට හරි, අස්ගිරියේ හරි දීලයි අපි කන්නේ...
මොකද, බුදු හාමුදුරුවන්ටත් වැඩිය ඔබ වහන්සේලා ගැන අපි අපමණ පැහැදීමෙන් ඉන්නේ...
කාටකාටත් දෙවි පිහිටයි, කවදාවත් නැතිව අද මං ටිකක් විතර වැඩිපුර බිව්වා
(alwater-non asanic label)

Scrap

විලි තේර...ඉල්ලෙෙ

පොත් පිරෙන්න ලකුණු දමාගෙන
සේප්පු පිරෙන්න සල්ලි දමාගෙන
ලිපිගොනු මිටියක් සල්ලි මිටියක් මවිල්
එනකම් කිහිල්ලෙ ගසාගෙන
කව්දැයි බොලේ යන්නේ මේ වටේ රට?

අපි ගත්තා අපි දුන්නා ලකුණුත් අපිටම ලැබුනා
චෝදනාද යෝජනාද නඩු අවනඩු බඩුම තමා
කළු සල්ලියි අපෙ මල්ලියෙ පිහිට තමා පිනම තමා පෙර කරුමය තොපට තමා
එන්නම් මල්ලි ආයෙ පාරක් යමුකො වටේ වැඩම තමා

තරමට

නිවැරදි කමට එකඟවිය යුත්තේ ලකුණු දමා ගැනීමට නොවේ.
වැරැද්දට එරෙහි විය යුත්තේ වාසි තකා ද නොවේ.
එසේ කරන්නවුන් ඉන්නා තැන අපත් පිරිහේ, රටත් පිරිහේ.
අද සිදුවන්නේ එයයි. සිදුවෙමින් පවතින්නේ එයයි.
කිසිදා කිසි විට පගාව නොදුන්නවුන් අත් ඔසවන්න..
කිසිදා කිසිවිට පගාව නොගත්තවුන් අත් ඔසවන්න..
ඔවුන්ගේ පුරවැසි පොතට එක් ලකුණක් හිමිවේ.
තව කරුණු විමසන්න.. පුද්ගල, පක්ෂ, පාට, පිල් වාසි තකා කරුණු නොවිමසන්න. තමන් රවටා ගන්නට උත්තර නොදෙන්න, මම දන්නා හැටියට හෘදය සාක්ෂිය අවැසි කෝටු පහර ලබන පාසල් වයසේ නොව වමතට නොදැනෙන්නට දකුණෙන් මිනීමරණ මහ වැඩිහිටි වයසටය.
කරුණු කරළියට එන විට අවසන තම තම පුරවැසි පොතේ ඉතිරිවන ලකුණ ඔබ රට වෙනුවෙන් කළ ආයෝජනය බව තේරුම් ගන්න, අපගේ වයස අනුව ඒ ඒ පමණට අප මේ භුක්ති විඳින්නේ ඒ ආයෝජන ප්‍රතිලාභ බව වටහා ගන්න. ඡන්දය යනු ඒ පොතේ සටහන් වන තවත් එක් ලකුණක් පමණක් බවද සිහියට ගන්න.

මෙහෙව් රටක නපුංසක අඩව් (කාලකණ්ණින් කවුරුද)

මීඩියා රට හදති
රට හරක් ගොම දමති
ගොම ගොඩෙන් දේශපාලුවෝ නැගෙති
රටට වින හෙණ දෙවා තම පක්ෂ උන් නගති...
කැළණි විහාරය නොවැඳම විපක්ෂයෙ වාඩිලා සියළු පව් උන් නසති
හුරේ ලා කරේ ලා ඇරගනිව් උන් ලවා
කේතුමතියේ වැසිකිළි දොරක්වත්...
දනා දද දම දමා
හපා ගනිති තම තමා
කළ යුත්ත නොතකනා
තෙක් තාන තම් දෙනා

මම ඉගැන්වීමටම උපන්නෙමි (පළමු දිනය නොමිළේ, ශාලාවේ ඒ සී ඇත.)

මගේම කියා දෙයක් ඇත්ද?
මගේම කියා මම හිතනා සිතිවිලි මගේමද?
මගේ කාය මනෝ කාය කියා මා ආත්මය කොට ගන්නේ කිමෙක්ද?
මගේ ඇලීම ඇලීමක් කොට ගැනීමක් පමණක් නොවෙද එය...
සුළඟෙන් හුස්ම උරාබොන්නේ කෙසේද? පසෙන් ගසත් ගසෙන් සත්වයාත්, සත්වයාගෙන් සත්වයාත් පෝෂණය වන්නේ යම්සේද මොළයේ ස්නායු සංජානනය කරන ඉන්ද්‍රිය ගෝචරයන්ගේ පිළිබිඹු මොළයේ ඉන්ද්‍රියන්ගේ හෝ මගේ වන්නේ කෙසේද? නැතිනම් ඉන්ද්‍රිය ගෝචරයන්ගේද ඒවා?
මේ සියල්ල ගැන දැනගන්න
ජීවිතය ජයගන්න
එන්න මගේ පාසලට

ලෝකෝත්තරයෝ සිතක සතියට විදිති? (බඩගෝස්තර ලාබ බාල වෙසක් මැද)

වෙසක් තොරණේ පෙන්වන්නේ බණ කථාය. අපේ ප්‍රබුද්ධත්වය මත අපි සාධු.. සාධූ.. නොකීවත් කීවත් බණ කතාවෙන් සමාජය පිරිහෙන්නේ නැත. ජාතක කතාවේ සතුන් කටින් කතා කළත්, හිතෙන් කතා කළත් එයින් වන්නේ සමාජ සංස්කෘතික පෝෂණයකි. ආගමිකයාගේ පහන් ශ්‍රද්ධාව ඉහළ නැංවීමකි.
එතකොට ටී වී තොරණ්.. ඒවායේ පෙන්වන්නේ බණ කථාද? ඥාන කථාද? මාධ්‍ය ප්‍රවර්ධන කථාද? ලාබයි, ලාබයි අපෙන් ගන්න කියන කථාද?
වර්තමාන මාධ්‍ය ව්‍යාපාර මෙහෙවර අතකින් හරි වටිනවා සේම මුදල් බෙදා මිනිසුන්ගේ කටින් තමන්ගේ වෙළඳ දැන්වීම ප්‍රචාරය කර ගන්නා බොහෝ මාධ්‍ය හැබෑ ලෝකයේ ලෝකෝත්තර ගේමක් මේ දිනවල ප්‍රවර්ධනය නොකරයිද? යන්නත් විමසනු වටින්නේය.

කව්ද මේ ලෝකෝත්තරයා... සැබෑවටම නම් ලෝකය පිළිබඳව ආධ්‍යාත්මිකව උත්තර සොයායන්නා සරලවම ලෝකෝත්තර මාර්ගයක යන්නෙකු යැයි කිව හැකි. නමුත් අපේ ව්‍යවහාරයේ ලෝකෝත්තරයා යනුවෙන් හඳුන්වන්නේ එහි සැබෑ අර්ථයට ප්‍රතිවිරුද්ධ අර්ථය දරන්නාය. එවිට ලෝකෝත්තරයා යනු ශූර කපටියෙකි, කෛරාටිකයෙකි. ඒ අරුතින් බොහෝ මාධ්‍ය මේ දින දෙකේ ලෝකෝත්තරයාගේ භූමිකාව කරති. ඊටම සරිලන බඩගෝස්තරවාසීන් පිරිසක්ද මාධ්‍යට ආල වඩන සඳ බුද්ධාලම්බන ප්‍රීතිය ලාබ වී බාල වී අදට වඩා හෙටට අඳබාල වෙසඟක පෙර ලකුණු පෙනී පෙනී නොපෙනී යයි.
අර මහා ජාති මාමකයෝ, නායකයෝ මේ දින දෙක වෙසක් නිවාඩු පිට නොහිටියා නම් අදම ඔවැනි මාධ්‍ය විරෝධී තවත් සිංහල බොදු බලවේගයක් රටේ අනාගතය වෙනුවෙන් හදනවා නිසැකය.

ඒ සියල්ල පසෙක තිබේවා! මේ රටේ සියල්ල අර්ථයෙන් බැහැරට යන්නේය. අධ්‍යාපනයේ අරුත, අධ්‍යාපනයේ නැත. ආරෝග්‍යයේ අරුත සෞඛ්‍යයේ නැත. කලාවේ අරුත කලාවේ නැත. දේශපාලනයේ අරුත දේශපාලනයේ නැත. ඉතිං දහමේ අරුතත් එයින් ගිලිහුණු පසු කාට බැන්නත් ඵලක් ඇත්තේද නැත. එනිසා  වඳින්න, පුදන්න බුදුන් බුද්ධියෙන් ශ්‍රද්ධාවෙන්, මාධ්‍ය සරණං ගච්ඡාමි නොකියා. ඒ අදාළ දුරස්ථ පාලකය පාලනය කරන්නේ ටී වී එක පමණක් නොවේ. සමාජයක ඉරණමට බලපාන සිකුරු, සෙනසුරුත් ඔබේ අතයට, හිතයට බව තේරුම් ගන්න.

ස්පෙල් (සිම්පල් නැති සරලත්වයේ කැපිටල් දහම)

ලෝකයේ ලොකුම මැජික් කරු නොහොත් මායාකරු  ස්වභාව ධර්මයාය. අප ඔහුගේ ඉත්තන්ය.
ඒ මැජිකකරුට නැතිනම් මායාකරුට  තුන්කල් අභියෝගයක් වූ එකම තැනැත්තා බුදු රජාණෝය. උන්වහන්සේ ස්වභාව ධර්මයාගේ ඉත්තෙක් හෝ ගැත්තෙක් නොවීමට මාර්ගයක් කියාදුණි.
නවීන විද්‍යාව යනු ඒ මැජික් කරු නොහොත් මායාකරුගේ නරකම, හොඳම ගෝලයාය.

ස්වභාව ධර්මයා නොනැවතී සදන්නේය. උපදවන්නේය. නොනැවතී නසන්නේය. මරාදමන්නේය. ඔහුගේ කැමැත්ත එයය. ඒ මායාවේ ඉත්තන් අපය.
බුදුරඳුන් ඒ මායාව නැසුවේ කිසිවක් නැවත තැනීමට ඉඩක් නොතබමිනි. මරණයද ඊට හේතුවන උපතද ඉක්මවා ගිය උන්වහන්සේ විඳවීමත් විඳීමත් වදදීමත් වදවීමත් ඉක්මවා ගියෝය. එය ස්වභාව ධර්මයාගේ මහා මායා බන්ධනය කැඩීමක් විය. උන්වහන්සේ තවදුරටත් ස්වභාව ධර්මයාගේ ඉත්තෙක් නොවීය. එනිසා බුද්ධියේ රජාණෝ ගුරුන්ගේද ගුරුවරයා විය. කෙසේ නමුත් බුදුරඳුන් ස්වභාව ධර්මයා හා තිබූ සබඳ කම බොහෝ අගනා එකක් විය.
නවීන විද්‍යාව ස්වභාව ධර්මයා ගෙන් උගත්තේය. ඒ දැනුමෙන් නොයෙක් දේ අත්හදා බැලුවේය. ගුරා අනුමත නොකළ දේ කළේය. ඉන් ගුරාට අත් කළ විනාශය අති මහත් වූ නමුත් නවීන විද්‍යාව නැමති මැජික් කරුවා බිහිවුණි.
මේ විද්‍යාව ගුරාගේ මැජික් හෙළි කරමින් ගුරා අභිබවා යන්නට වූ බැවින් තවදුරටත් ගුරු චරිතයේ වටිනාකම හෑල්ලු වූ අතර නවීන විද්‍යාව පොර වන්නට විය. නමුත් අදටත් ඔය විද්‍යාවට සිය ගුරුවරයා වු ස්වභාව ධර්මයාගේ මහා මායා බන්ධනය විග්‍රහ කර ගන්නවත් හැකියාවක් ඇත්තේ නැත. හෙතෙම කොයිතරම් පාරම්බෑවත් තව දුරටත් ස්වභාව ධර්මයාගේ ඉත්තෙකි. එලෙසින්ම ගුරු උපකාරයෙන් සපුරා මිදී පැවැත්මක් නැති අප වැනිම ගැත්තෙකි

(නවීන විද්‍යාව නැමති මැජික්කරුගේ මායා දැල භාවිතයෙන් සැකසුවෙමි)

එව බලව, කීවා මිස ලාබයි ලාබයි නොකී සනාතන දහම(කාලීන බණ ගැන නොවේ)

සම්බුදු දහම නොතිබිණි නම් අපි, අපේ රට කෙබඳු තැනක් ගන්නට ඉඩ තිබුණාද? හිතන්නට වටින දිනයකි අද. ඒ හේතුඵල ඔස්සේ පමණක් බැලුවත් සම්බුදු උපතක වටිනාකමට අපට විකල්ප ඇත්තේ නැත.

වත හද

තෙල් දමා ලිහිසි - ලිස්සා නොයනු යෙහෙකි (නැකතට මොළේ පොඟවා හෝ...ගත යුතුය ලක් සිරි)

යන්ත්‍ර වලට තෙල් දමන්නේ සුනම්‍යව තියුණුව වැඩ ගන්නටය. තෙල් ගලෙහි නියන පණ පෙවෙන්නේ කැටයම මටසිලිටි කරන්නටය. හැබැයි තෙල් දැම්ම පමණට කිසිවක් සිදුවන්නේ නැත. යන්ත්‍රය මෙහෙය වන්නේ කව්ද? වඩුවා කව්ද? වැඩේ සපුරා ඔවුන් අතය. අත වැරදුණොත් වැඩේ කොට උඩය.
තෙල් දැම්මාට හිසට, හිත ඇත්තේ ඔබ ළඟය. හිත ඇත්නම් හිස ඔසවන්නට මෙන්ම හිත කැත හෝ කැත හිත නිසා හිස ගැස්සෙන්නටත් පුළුවන.
මහ ජනතාවකගේ හිස්, ඒ ජනතාවගේ නියෝජිතයන්ගේ හිස්, පාර්ලිමේන්තුවේ ඔළුගෙඩි, අගමැති, ජනපතිගේ හිස් .. මේ සේරම හිස් ඒ ඒ හිත් අනුව හිස් හෝ පිරුණු ඒවා වෙත්ද, රටේ දියුණුවත් පසුබෑමත් වන්නේ එතැනය.
ඕනෑම ප්‍රශ්නයකට පිළිතුරු එන්නේ හිසෙනි, ඊට ජවය බලය දෙන්නේ හිතෙනි. චින්තනයක් හැදෙන්නේ එබඳු වූ හිසත් හිතත් එක්වීමෙනි. එබැවින් රටකට ඇවසි චින්තනයක් උදෙසා හිසතෙල් චාරිත්‍රයේ සැබෑ වටිනාකම සොයනු වටී. එය අපේ සෞඛ්‍යයේ සේම සෞභාග්‍යයේ චින්තනයකට දොරගුළු හරින්නක් කර නොගන්නාතාක්, පරම ලාභය ආරෝග්‍ය හෝ පරම ධනය සන්තුෂ්ටිය හෝ අපට උදා වෙතැයි හිතනවා නම් එබඳු වූ ඔළුගෙඩි වලට නැකතට වුව රජාගේ වුව තෙල් උලා ඵල ක්ද නැතී.
එබැවින් හිසේ නැකත රටේ ලකේ ශ්‍රියාවේ  නැකත කර ගන්න.

මැරෙන්න පෙර

නැකත හොඳයි, අවුරුද්ද ලබයි.. සුබම සුබ අලුත් අවුරුද්දක් වේවා! රටටම කිරි ඉතිරේවා!

ජාතිය වෙනුවෙන් මැරෙන හැටි නොපෙන්වා මරණ හැටි පෙන්නූ ජාතිවාදීන්
+
ආගම කියාදුන් ඉවසීම නොතකනා වැනසීමේ මග කියාදෙන ආගම්වාදීන්
+
දේශපාලනයේ ශූරත්වය නොපෙන්වා කූටත්වයෙන් රට නසන දේශපාලකයින්
+
ජනතාවකගේ බලය නොපෙන්වා හිස නවන නිකට කසන පරමාධිපත්‍යධාරීන්
=
උත්තරය බිංදුවයි, දැන් ඒක සිංදුවයි, උදානයේ ගීතයයි, කැවුම් කොකිස් අති රසයි...අවුරුද්දෙ රස රැසයි

අපේ රටේ බලය සැඟවී ඇත්තේ කොහිද?

පිංවතුන්ගේ කතා වස්තුව,(පාපකාරී වූ නූතන අප උදෙසා)

එදා මෙදා කවදා මුත් දමිළ, මුස්ලිම්, සිංහල වශයෙන් ජාතීන් ලෙසින්ද, හින්දු, ඉස්ලාම්, කිතුණු, බොදුනු ලෙස ආගමික වශයෙන්ද අප උදෙසා, රට උදෙසා දිවි දුන් සියළු පින්වතුන්ට මේ පිං අනුමෝදන් වේවා (ලෝක වාසීන්ටද සුදුසු ලෙස වේවා)

70 ගණන් වල සිට ඊයේ පෙරේදා දක්වා වූ නූතන ලක් සමාජයේ කාලකණ්ණින් ගේ පර්යේෂණ උදෙසා නියමින් හෝ අනියමින් පර්යේෂණාගාර මීයන් බවට පත් පාපකාරී  සියළු පිංවතුන් ගේ ජීවිත වේදනාවන්ට  සැනසීම අත්වේවා! (ලෝක වාසී එවැන්නන්ටද ලෝක යුද්ධ කාලේ සිට සුදුසු ලෙස වේවා)

කාලකණ්ණි සතුටෙන් ඉදිමුණු මිනිස් සිත සිහිබුද්ධියේ තියුණු සැතෙන් සැත්කම් කොට ඕජස් හරණය කෙරෙත්වා! (ඇමෙරිකාවද මානව හිමිකම් සුරකිත්වා)

පාපී වූ අප උදෙසා පිංවතුන් මිහිමත ජන්ම ලාභය ලබත්වා! (සිරිලකට වැඩි වැඩියෙන් යේවා!)

කාලකණ්ණි සතුට! (විනාශයක පෙර නිමිත්තයි)

රටක කාලය නාස්ති කරමින්
ජනතාවගේ කාලය නාස්ති කරමින්
සමහර විට අපි ජීවත්වන මීළඟ අවුරුදු 50ත්
අප ජීවත් නොවන ඊළඟ අවුරුදු 50ත්
අද දවසේ වගුරන බේගල් ගොහොරේ ගිල්වමින්
ආණ්ඩුවලට උගුල් අදිමින්
තුච්ඡ ප්‍රයෝග ටොන් ගණන් හලමින්
දේශපාලන පක්ෂ ප්‍රතිරූප තර කරමින්
ජනතාවගේ පෙට්රෝලියම් තෙල් නිකරුනේ පුළුස්සමින්
නැති වාද හදමින්
ඇති ප්‍රශ්න ගටමින්
තම ජාම බේරාගනිමින්
තව ජීවිත බිලිදෙමින්
උන් සොයන්නේත්
අප පතන්නේත්
දරුවන්ට උරුම කරන්නේත්
අපේ ප්‍රවේණිගත
ඒ
ආත්මාර්ථී
වි+සාදය යි.

නවතිමි...දැන් ඇති

නිහඬ වෙමි
හඬ වෙමි
හැඬවෙමි
හඬවමි
හැඩ වෙමි
වද වෙමි
වද දෙමි
වද බඳිමි
පොර බදමි
රොද බඳිමි
හොර කරමි
සොරි කියමි
සැක කරමි
සැර කරමි
මහත්මයෙකු වෙමි
ටයි කෝට් පළඳිමි
කෝට් යමි
කෝට් වෙමි
ලෝඩ් වෙමි
ගෝඩ් වෙමි
ගෝට් වෙමි
ෂේප් වෙමි
ෂේක්ස්පියර් වෙමි
නොනවතිමි
අර අඳිමි
අං අදිමි
කන් පලමි
කල් බලමි
වෙඩි තබමි
.....................

දේශගුණික ප්‍රශ්න මෙව්වා! (අපිට ප්‍රශ්න නොවේ)

මහින්ද ගෙ සදාචාරේ
රනිල් ගෙ සදාචාරේ
මෛත්‍රි ගෙ සදාචාරේ
පාර්ලිමේන්තු සදාචාරේ
අපේ සදාචාරේ
රට අනාචාරේ..

ඌරන් ඌරන්ටම ඌරන් කියා අපහාස කරගනිති අද, ඔන්න දැන්වත් පෙනෙනවාද ඌරන් ඌරන්ම බව..

මේ රට හදන්න නම් මකලාම ගන්න වෙයි,

ආ... කා.... හෙට

කියමන්

"දෙදහස් පන්සීය දෙකයි පනහට දැම්ම තිත වාගේ"

වසර 2500 ක එෛතිහාසික අත්දැකීම් තිබුණත් තිතටත් මත ඇති රටක ඒ තිත 2500 වුව 2.50 කරන්නට අතරමැදට පැන්න හැකි බව, තිරසාර දැක්මක්, ඊට සරිලන ප්‍රතිපත්ති ක්‍රියාත්මක නොවන අවිනිශ්චිත, අතීරණ හා අජීර්ණ ජන සමාජයක කිසියම් වැඩපිළිවෙළක් සකස් වෙන්නේද තවත් වැඩපිළිවෙළකට තිත වැටහෙන්නේද සැබෑ තක්සේරුවකින් හෝ අවබෝධයකින් නොවන බවත්, ඉන් සිදුවන විනාශයත් (සරලවම අපේ ආණ්ඩුවල ස්වභාවය) මින් අදහස් වන බව කවරෙක් නොසිතත්ද.........!

පොතේ නැතත්

"නහයට විකල්පය කට වුනා වැනී"

ගන්ධයෙන් හඳුනා ගත යුතු වසුරු මළ සෙම්ප්රතිශ්යාව හේතුවෙන් අනුභව කොට ප්රත්යක්ෂ කරගැන්මට යාම, යමකට විකල්පය හැමවිටම ඊට ආසන්නවම නොවන බවත් යම් විටෙක ප්රබුද්ධ නොවන විකල්පය කොතරම් විනාශකාරීද යන්නත් මෙයින් අදහස් වේ.

අලුත් කියමන් (පොතේ නැති ඒවා)

"කූඹියෝ රහදිව කෑවා වගේ"

සීනි, තෙල් අධිකව ආහාරයට ගත් කෙනෙකුගේ රහදිවේ තැවරුණු සීනි, තෙල් වල ඉවට ඇදුනු කූඹියෝ ඒ දිව හපාකෑවෝය. රහදිව ඉදිමුණු තැනැත්තාට ඉන්පසු දැනුනේ කූඹි රස පමණි. කිසියම් හේතුවකින් කෙනෙකු මෙලෙස එකම රසයක සිරවීම මෙයින් අදහස් වේ.

භාෂාවේ අළුත්ම කියමන් (පොතේ නැති)

"සරම අස්සේ කඩුව වැනුවා වාගෙයි"

දූෂණයට එරෙහිව බලය ක්‍රියාවේ යොදන්නට ආ පිරිසක් තම නොහැකියාව මත දූෂකයින්ට යටවී සියතින්ම තම විනාශය අත් කර ගැනීම , ඔසවා සරඹ කළ යුතු කඩුව සරම අස්සේ වනන්නට ගොස් වරිගය(පුරුෂ නිමිත්ත) නසා ගැනීම ලෙස මෙයින් අදහස් කෙරේ.

වද වෙන්න

යදම් බිඳ දමන්නට
සිපිරි ගේ හරින්නට කාලයයි
පිනෙන් පව් නසන්නට
අකම්පිත අකාලික තාලයයි

දම් සකට අට ලෝ යටව
මිරිකී සැලී බිය වී  පෙළුණු සිත
සිනා සයුරේ සතපවා
නළවා පිනෙන් ඒ නිදි වැදුණු සිත
දකින සිහිනෙන්
පිබිද එන්නට කාලයයි
යදම් බිඳ දමන්නට
සිපිරි ගේ හරින්නට කාලයයි
පිනෙන් පව් නසන්නට
අකම්පිත අකාලික තාලයයි

සෙනෙහෙ ගංඟා හරස් කරවා
තැනු දිය කඳ වේලි උතුරන
වෛර යේ චෛතසික අවුලා
ගිනිකන්ද  දුම් වළලු නංවන
එකට ගැටුමෙන්
නිවී සනහන කාලයයි
යදම් බිඳ දමන්නට
සිපිරි ගේ හරින්නට කාලයයි
පිනෙන් පව් නසන්නට
අකම්පිත අකාලික තාලයයි

වද වෙන්න එපා

 දෙවියන්වහන්සේ, පිස්සෙක් හා මනස්ගාත අතර රීතිය ද? නීතිය

තව තවත් බෙදී මද? (සරලවම වළපල්ලට)

🅾🅾🅾🅾🅾🅾🅾🅾🅾🅾🅾🅾🅾🅾🅾
ද්‍රවිඩ දේශපාලකයෝ තම ජනයා අතර කොතරම් බේදයක් වැපිරුවෝද?
මුස්ලිම් දේශපාලකයෝ තම ජනයා අතර කොතරම් බේදයක් වැපිරුවෝද?
සිංහල දේශපාලකයෝ තම ජනයා අතර කොතරම් බේදයක් වැපිරුවෝද?
අපි බෙදෙද්දී දේශපාලකයෝ වශයෙන් උනුන් එක්ව වසර පහකින් නිර්ලජ්ජිතවම පාර්ලිමේන්තු විශ්‍රාමය ද ගන්නෝ වරප්‍රසාද උපරිමයෙන් භුක්තියට ගන්නේ එය ඡන්දයෙන් ලැබෙන පරම උරුමයක් සේ ගෙනයි.
ආගමික නායකයින් කියනා කොටස් තම ආගමිකයන් අතර යම් බේදයක් වපුරද්ද, ඔවුන් අවසන කරන්නේ තම පුද්ගල අරමුණු වෙනුවෙන් පිරිස් බලය හදාගැනීමට සිය ආගමික කතෘන් බිලි දීමයි.
රාජ්‍ය නොවන සංවිධාන යම් බේදයක් පොදු ජනයා අතර වපුරත්ද, යුද්ධය මෙන්ම සාමය ද ඩොලර් ඉපයිය හැකි තමන්ගේම බූදලයක් කොට පවත්වා ගැනීමයි ඔවුන්ගේ අවශ්‍යතාවය.
තවත් රටක් අපව බෙදන්නට හදනවා නම් ඒ ඉන් ඔවුන්ට වාසි ලැබෙන නිසාමයි.
මේ සියල්ලන්ගේ උවමනාවන් පරිදි අපි බෙදනවා නම් ඒ අපට ලැබෙන වාසිය තකායි.
ඒ වාසි මොනවාද?
සුදුසුකම් වලට එහා රස්සාවක්
නීති විරෝධී අනුමැතියක්
වරදකින් නිදහසක්
සල්ලි
නම්බුවක්
ඉතිහාසගතවීමක්
වෛරය පිරිමැහීමක්
නන්විද කාරණා...
සර්ව සාධාරණ නැති නන්විධ පුද්ගල අවශ්‍යතා මත බෙදි බෙදී අපි රටක දියුණුවක් ගැන කතා කිරීම තව දුරටත් ඵලක් නැති දෙයකි. විද්‍යාත්යාමක නැති දෙයකි. විහිළුවකි. එනිසා කපටින්ගේ ගුණ්ඩු මත නොබෙදීම පමණි රටත් අපත් දියුණුවක් පතන පළමු පදනම විය යුත්තේ, සුද්දා දුන් නිදහසට පෙරද පසුද අප නොහැරුනු හැරවුම් ලකුණ ඔතැනයි.
🅾🅾🅾🅾🅾🅾🅾🅾🅾🅾🅾🅾🅾🅾🅾

තීරණ හා තීන්දු අවශ්‍යයි(මගේ ඉල්ලීම්)

↔රටේ තීරණ, තීන්දු,

අප වෙනුවෙන් රට වෙනුවෙන් විය යුතුයි.

ඒවා නිවැරදි, යුක්ති සහගත හා සාධාරණ විය යුතුයි.

කලට වේලාවට ගන්නා සජීවී ක්‍රියාකාරී ඒවා විය යුතුයි.

මම සිංහල යැයි කීමට, මම මුස්ලිම් යැයි කීමට හෝ මම ද්‍රවිඩට යැයි කීමට, කරට අත දමා ගෙන අපි ශ්‍රී ලාංකිකයැ යි කීමට බාධාවක් නොවිය යුතුයි.

ආගමික නිදහස ඇතිවා මෙන්ම බලහත්කාර හා වංචාකාර පෙළඹුම්, වංචනික අරමුණෙන් ආගමික අල්ලස් දීම්ද වැළැක්විය යුතුයි.

අන්තවාදයකට දඬුවමක් තිබේ නම් සියලු අන්තවාදයටම ඒ දඬුවම පොදු විය යුතුයි.

සිංහල ප්‍රකාශ ගැන සිංහලෙන් වද වෙන පමණටම දමිළ හෝ ඉංග්‍රිසි ප්‍රකාශ ගැන ඒ ඒ භාෂාවලින් අතිශයින් වද විය යුතුය.

සුළු ජාතීන් හා සුළු ජාතික අයිතිවාසිකම් කියා යමක් ඉස්මතු කෙරෙත්ද මහ ජාතිය හා මහ ජාතීය අයිතිවාසිකම් කියා දෙයක්ද නිරායාසයෙන් ඉස්මතුවන බව දත යුතුයි.

එබැවින්, පොදුවේ රට වැසියා සළකා යුතුකම් අයිතිවාසිකම් ප්‍රාථමික අවධියේ සිට සියළු පුරවැසියන්ට එන්නත් කිරීමට කටයුතු කළ යුතුයි.

සැ.යු.-අපට අනන්‍ය, රටට අනන්‍ය අපේ, රටේ එෛතිහාසික සංස්කෘතික පදනම හා පසුබිම විකෘති නොකර අනාගත පරපුර වෙත ශේෂ කළ යුතුයි.

ජේමිස් බංඩෝ, 007(අමුඩෙන් ටයි අදින අභිමානවත් අපේ මීළඟ සන්තෑසියට පෙර දන්න හිංගලෙන්, වදවෙමි)

කියවති, ලියති, පෙරළති.. මුව දෙති
මීළඟ දශකයේම දීමට සිදුවන්නේ පොතට පමණකී???
මුහුණ පොතට දීමෙන් නොනැවතී අදහස්ද පොතට වගුරතී
රටේ ණය පොත තර වේ, අපේ සම්පත් හිඟ වේ.
වර්ගවාදය කටට ගෙන පරිසරය අතට ගෙන ප්‍රතිරූප හදාගෙන, බදාගෙන නොයෙක් දේ හිතාගෙන විනාශය වඩාගෙන කොහෙද මේ යන්නේ,
ඊළඟ දශකයේ පත්තු වෙන්නේ අද හදන බකට් නම්... කූඩු නම්..
නීති හෝ රීති පමණද ඡන්ද කතිරය ඵලක් නැත දෙන්නේ
දාසයේ මාසයේ බෝම්බ - කාගේද වග වීම
හෙට වෙන්න සරුසාර කරනවද පස සාර?
කොහෙද මේ බිංකුණ්ඩෝ..
අඩෝ,
මං දන්නව බෘෘස්ලිගෙ
ජිට්-කුංඩෝ...
ඇප් ටික දීපන් ඩෝ
ප්රී එක දීපන් ඩෝ
අපි කෙළින් ඩෝ
රජ වෙන්ඩෝ
අපේ  ගොන්ඩෝ
අපිට ඕන
අපෙ බංඩෝ
ජයවේවා!

ස/අ-ඵල

 අතීතයේ දැල්වූ සේවානූල වර්තමානය දවා හළු කරත්ද
 අද වපුරන බීජ හෙට ඵල දරනු නැත්තේද
 දශකයක් වැගිරූ දහදිය ශතකයක් ආරෝග්‍ය නොගෙනෙත්ද
පහනින් පහන් සිය ගණනක් දළුලත්ද

බයිට් මිනිස්සුද? ආණ්ඩුවට පිස්සුද? (තාක්ෂණ අන්තවාදය? වයි fly)

ගමන් කෙරූ බෝම්බයට මාර්ග බාධක වැටුනා
ජාල ගතවු බෝම්බයට FB බාධක වැටුනා
මව් රට වෙනුවෙන් හුස්මත් නැවතුණු මිනිසුන් හිටියා
දෙවි පිහිටෙන් මෙහෙව් ජාල ඇදහීමක් මට නැතුවා

එහෙම කියා මට කොයින්ද වෙනම නීතියක්
මාර්ග බාධක වල තිබුණිද වෙනස් නීතියක්
මව් බිම, සාමය හදගත් පළමු තැන අදත්
බාධක නාමෙන් අප නම් හඬනු නැහැ හෙටත්

කිරට හඬති ළමයි...කොහේ

සිහළ ගෙදර උන් බිළිඳා
ද්‍රවිඩ ගෙදර උන් බිළිඳා
මුසළි ගෙදර උන් බිළිඳා
එකම හඬින් ඉකි බින්දා

බිංදු බිංදු ඉරුව බිංදු
කිරට හැරුන රුධිර බිංදු
නැළවිල්ලට ගැයුව සිංදු
වෙනසක් නෑ කඳුළු බිංදු

දායාදය කර පින්නා
දෙමාපියන් බර දන්නා
අනාගතය දුර පෙන්නා
මිනිසුන් වඩපන් ලංකා

මුත්තාගේ අඹ පැළය-මගේ මහ මොළය

මුත්තා මුණුපුරා දෙස බලා යුතුකම ඉටුකිරීම අපි කුඩා කළ බෙහෙවින් රසවිඳි ''මොනවද මුත්තේ” ගීතමය පද්‍ය පංතියෙන් උගත්තෙමු. ඒත් ඒ යුතුකම වෙනුවට අප දුටු දේ කුමක්ද? බලය, නිලය, ආත්මාර්ථය උදෙසා කට දෙකොනින්ම කෙළ වගුරුවන කා කොටා ගන්නා මුත්තන් රොත්තකි. ඒ මුත්තන්ගේ දෑත් ශක්තිමත් කළ ගොට්ටන් රොත්තකි.
අපිට හැබෑවටම පාර වැරදී බොහෝ කල්ය. දැන් ඇත්තටම සිදුවන්නේ කටු අකුල් වලට පැටලීමේදී සිදුවන බෙරිහන් දීම පමණය.
නමුත් බොහෝ දෙනා ඒ සරල වැටහීමට අනුගත වීමට කැමති නැත. ඒ ඔවුන්ගේ දැනුම අප්රමාණ නිසා වෙන්නට ඇත. නැත්නම් බොර දියේ මාලු බෑමට ඇති හැකියාව නිසා වන්නට ඇත. දැන් දැන් දශසීලයම අරගන්නා සමහරුන්ට තමන් අතීතයේ වැපිරූ වැපිරීම මතකයේද නැත.
එදා සිට ජාතික දේශපාලනය කියා තමන්ගේ ජාතියත්, ආගමත්, පවුලත්, පරම්පරාවත්, පක්ෂයත් තනතුරුත් බදාගෙන තමන්ගේ ආත්මාර්ථය උදෙසා ඔවුහු රට බෙදුවෝය. රටේ සාමාන්ය මිනිහාට තම අසැල්වැසියා සමඟ හැමදාම තිබුණේ සරල ප්‍රශ්න ටිකකි. ඒ ප්‍රශ්න රටේ ප්‍රශ්න බවට පත්කොට ඒවා ජාති, ආගම්, කුලමල, පක්ෂ ප්‍රශ්න බවට පත් කළේ කවුරුන්ද?
එය දවසකින් දෙකකින් හෝ දශකයකින් සිදුවූවක් නොවේ.
එහෙව් යුතුකම් නොදන්නා අයිතිවාසිකම් ගැන පමණක් සිතූ මුත්තන්ගෙන් බිහිවූ වූ මුණුපුරන් දැන් හොඳින්ම බුරන වයසේය. එකිනෙකා බුරා ගන්නා විට අහල පහළ රටවල උන් බල්ලෝ එලවන්නට කියා ගල් ගසන්නටද පුළුවන. මන්ද ඔවුන් මෙහේ ඉන්නා වල් බල්ලන්ට වඩා තවත් රටවල දඩෝරියන්ට බයක් දක්වන නිසාය. ඒ බල්ලන්ට ඉන්ජෙක්ෂන් ගසා තිබෙන නිසා ප්‍රශ්නයක්ද නැත.
ඉතිං වල් බල්ලන් ගානට වැටුනත් අපිට දැන් කමක් නැත. ඒවා හුරුය. මගේ අයිතිවාසිකම් මිස මට දැන් යුතුකම් කියා දෙයක් නැත. අඹ සිටුවන්නට ඉඩක්, වෙලාවක් හෝ උවමනාවක්ද නැත. බැරිම තැනක් ආවොත් දඩෝරියන් ඉන්න හෝ සත්තුන්ට බලපත්ර නොදෙන රටකට පනිමි මම. ඉතිං ඒ සඳහා දැන් සිට යොදවමි මගේ මහ මොළය. එහෙමද?

සරලවම, ... (අවබෝධයෙන් යමු)

පුළුල් අර්ථයෙන් හැබෑ විද්‍යාව යනු සියල්ල පිළිබඳ සත්‍යය විග්‍රහයයි. ඒ අර්ථයෙන්ම මිථ්‍යාව යනු විවිධ ධාරාවන් ඔස්සේ පැමිණි විශ්වාසයන් ගොනුවකි. පරිපූර්ණ වශයෙන් විද්‍යාව හා මිථ්‍යාව බෙදා දැක්විය හැකි භෞතික බෙදුම් රේඛාවක් නැති හෙයින්ම වඩා තාර්කිකව විද්‍යාව හා මිථ්‍යාව අතර ගැටුම කවදත් ලෝකයේ පවතීවි. අපි විශ්වාස කළාට මිථ්‍යාව ඵල දරන්නේවත් අවිශ්වාස කළ පමණින් විද්‍යාව යටපත් වෙන්නේත් නැහැ. සිදුවන්නේ නිවැරදි අවබෝධය ලබන තාක් අපි වාසි අවාසි මත විටෙක විද්‍යාවටත් විටෙක මිථ්‍යාවටත් ආවැඩීම පමණයි. නමුත් ලොව පවතින සත්‍ය ඔබටත් මටත් දෙකක් නොව එකක්මයි.
ජීවිත වල වටිනාකමක් ගැඹුරක් අරුතක් නොදකින තරමට අපි ආ වඩන්නේ අපිට කැමති මිථ්‍යාවට යි. ඒ ආස්වාදයට ඇති ලොලීත්වය රැකෙන්නට නම් අපි ඊට අදාළ විද්‍යාවේ ආලෝකය මතුවන්නට ඉඩ නොදිය යුතුයි. නමුත්  විද්‍යාව අවබෝධකොට ගත්තෝ විසඳුමකට මිස ගැටුමට නොයන බැවින් ගැටෙන්නේ ප්‍රතිවිරුද්ධ මිථ්‍යා භක්තිකයෝය. අපේ අන්ධ විශ්වාසයන්ගේ ගැටුම එතැනය. එබැවින් අතිමහත් විනාශයන් ලොවට ගෙනාවේ බුද්ධියෙන් අරගල කළ විද්‍යාව හා මිථ්‍යාව අතර ගැටුම් නොව ප්‍රතිවිරුද්ධ මිථ්‍යාවන් අතර ගැටුම්ය. විවිධ සංස්කෘතික වෙනස්කම් වලට හේතු වුණු ඇදහිලි විශ්වාස ගැටුමට හේතු වන්නේ අපේ මිථ්‍යාව වඩා උසස් යයි කියාපාන්නට යෑමෙනි. තමන්ගේ විශ්වාසය වඩා සත්‍යයැයි ඒත්තු ගන්වන්නට යෑමෙනි.
විද්‍යව අමතන්නේ අවබෝධටයි. මිථ්‍යාව අමතන්නේ හැඟීමටම පමණයි. එබැවින් හැබෑ විද්‍යා අවබෝධය විසඳුම් වෙත පාර කපද්දී මිථ්‍යාව හැඟීම ඔස්සේ විශ්වාසයට පමණක් පාර කපයි. අවසන තවත් විශ්වාසයක් හා ගැටුමට යන්නේ විද්‍යා අවබෝධයෙන් තොර එවැනි අන්ධ විශ්වාසයෙන් යුතු අන්තගාමීයාය.
කුමන විශ්වාසය මත සිටියත් අන්තගාමී, අන්තවාදීන් සියල්ලෝ එකම මිථ්‍යා දෘෂ්ටික පිරිසකි. ඇත්ත වශයෙන්ම ඔවුන් විද්‍යාවකින් පුනරුත්ථාපනය කළ යුතු මනුස්ස කොට්ඨාශයක් බැව් සංවේදීව අප කල්පනා කළ යුතුය. සාමාන්‍යය සමාජයේදී සිරයේ හෝ ඔවුන්ගේ විශ්වාසය ලෙස නිරයේ හෝ මේ පුනරුත්ථාපනයද සිදුවෙනු ඇත්තේමය, මන්ද විද්‍යාත්මක සත්‍ය නම් ක්‍රියාවකට සමාන එහෙත් ප්‍රතිවිරුද්ධ ප්‍රතික්‍රියාවක්ද පවතින බවය.

-මිනිස්සු-නම්, (වගවෙනු ව)

ඒ-
බී-
ඒබී- ඕ-
ප්ලස්,
මයිනස්...
අපි දන්න-
මිනිස්සු ඇතුළෙ-
කකියන්නෙ එච්චරයි..
කාලයක් වපුල බිජුවට මොනවදැයි?
ඒ බැව් වැපිරූ උන්ට අමතකයි?
වෙනසක් අවැසි ගම රට තොට නොවෙයි,
හදවත මනස නුවණැස ඇරඹුමයි.

ජීවිතය යනු,

ජීවිතය යනු අනාගත දැක්මෙන් අතීතයට යුක්තිය පිරිසිඳීමයි

ගමකට රැවටෙන්න කැමතිද? වඩා ලාභදායී ම වට්ටම් දැන්

සීතාම්බර සළුව නැතිවත්
සිඹපල්ලා
නිරුවත කැමති යටිසිත
සඟවාපල්ලා
දුන්න අරන් කැටපෝලයෙන්
විදපල්ලා
අපත් සමඟ තොපි සෙලුවෙන්
සිටපල්ලා

☺😊😃💘💘💘💘💘💘💘💚💛💜♥

නීලහරිත ආදරයක්
වැලන්ටයින් කමිටුවක්
මල්සරා අපේ
අනාගතය ඔබේ අතේ
ඒත්
හැබෑ ආදරේ
සිරිලකටමයි මගේ

බුදුන්ගේ සරණ ද, සොරුන්ගේ සරණද

(නැණස පෑදීම) සත්‍ය වැපිරීම උතුම්ම දානය නම් මිථ්‍යාව වැපිරීම (නැණස වැසීම) තිරශ්චීන ම සොරකමයි.
මිනිසුන්ගේ බුද්ධිය වසා ඒ ගොනුන්ගෙන් තම ගැල් ඇද ගැනීමට කවරෙකු හෝ සිතත්ද නුදුරේ ම ඔවුන්ටද ගොනුන් වී තමන් විසින් නොමඟ යවන්නට යෙදුණු මිනිසුන්ට වන්දි ගෙවන්නට ම සිදුවේවි.

කළ කර්මයේ ප්‍රතික්‍රියා ව ඔබ අප නටවන හැටි ! ක්රිකට් වගේමය..
බලන්න අවසන් පන්දුව තෙක්ම, තවම එක් පිළක් තරඟයේ ලකුණු රැස් කළා පමණය..

මඩ සෝදා ගෙන ගොවියා නැවත රජ විය යුතුය

මඩ සෝදා ගැනීම නම් නිවැරදි වීමයි. රජ වීම නම් අපේක්ෂා ඉටුකර ගැනීමයි. සරලවම කියන්නේ නම් තමා සතු බලතල නිවැරදි ලෙසම භාවිතා කොට රටේ අවකෙළි තුරන් කිරීමට සරල ජනපති දැන් සංකීර්ණ විය යුතුය.
මඩ නැහැවෙන්නේ කුඹුරු කරන්නට යෑමෙනි. නමුත් මඩ කළ කුඹුරෙන් ඵලක් නැත. අතහැරියහොත් එහි වැඩෙන්නේ වල් පැළය. වී වපුරා ඉතිරි වතාවත් සියල්ලම අවසන් කොට අස්වැන්න නෙළා ගතහැකි විය යුතුය. අකලට වගා කරන්නට සිදු වුනත් කලට වැසි නොලැබුණත් වල් ගලවා, පොහොර යොදා, පැල් රැක හෝ වල් (ඌරන්,අලියන් වැනි) සතුන්ගෙන් වගාව බේරා ගෙන, අස්වැන්න ලද හැකි උපරිමයෙන් ගත යුතුය. බලතල ඇත්තේ ඒ වෙනුවෙන්ය.
එක් එක් අභියෝග ජයගන්නට යාමේදී ඇතිවන බාධක ස්වභාවිකය, වැරදි විය හැකිය. දීර්ඝ කාලීන ව සම්ප්රදායට එක් වූ දෝෂ වහා  භංග වී නොයන මුත් ඒ සඳහා සාධාරණ උත්සාහයන් නැවත කළ යුතුය. ඒ සඳහා තිබෙන කාලය උපරිම ලෙස යොදා ගත යුතුය. නොවැටී නොනැගිටිය නොහැක. වැටුනු හැටි අවබෝධ කොට ගතහොත් නැවත නොවැටී සිටිය හැක.

උපුටා ගැනීම, මගේ උපදේශක සභාව පළකල "දේශපාලන ත්‍රිකාස්ථිය නොකඩාගෙන කුඹුරු කරන හැටි" ලිපිය ඇසුරිණි.

ජයවේවා! (දිනුම හා පැවැත්මේ අත් නොහළ හැකි බැම්ම, ඇම්ම හා ගැම්ම...)

ඒක හරීම ප්රණීත අනුරාගයක්, හරිම ජාති   එකක්.. බත් පැකට් එකෙයි බෝතලෙයි ලොල් බවෙන් ජාති අනුරාගය උත්කර්ශයට නැංවීමක් ඒක, තව පොඩි ගතමනාවක්. විශ්වාසය එක්ක එන පොරොන්දු...එතනින් ලැබෙනව මරාගෙන මැරෙන්න හයිය, ඒ හයිය නැති ගැහැණු, පිරිමින්ටත් එතනින් ඒ හයිය ගන්න පුළුවන්. එතනින්මයි රට ගොඩනගන හටනේ පාදම හැදෙන්නේ, සටනට අවශ්‍ය වෙෙරය අවුලුවන්නේ.
කිසියම් දේශපාලන පක්ෂයක් තමන් මහජන මුදල් ගසා කන බව පිළිගෙන, මුත් එහි ප්‍රතිශතයක් පාක්ෂිකයන් අතර බෙදා දෙන බව පැවසුවත් ඒ ගනුදෙනුව නොහොත් ඩීල් එකට ජනමතය ක්ලෝස් කළහැකි දේශ්ප්රේමීන් සිටින රටක්, පක්ෂ සමිතියේ බස් එකේ රැළියට යන ගමනේ... එහෙමයි රටවල් දියුණු කළ චින්තන රැළි නැංවුණේ. එහෙම නැත්නම් ඒතැන පැවැත්මක් තිබිය හැකිද මිත්‍රවරුනි,......
හෝව්..හෝව්..පොඩ්ඩක්.ඩ්රෝන එක ඔහොමම උස්සන්න... අඩි දාහක්, වනන්න දැන් වනන්න තව හයියෙන්, හරි. දැන් හරි..

අපි ඊළඟ පරපුරට නොදීම රට හදමු.

දේශපාලන රදළයින්ට ජඩයින්ට වන්දනාමාන කරන ගාථාවක්, පිංදෙන ගාථාවක් නිර්මාණය කළ යුතුය.
රාජ්‍ය ආයතන වල උදෑසන වතාවතට එය ශුද්ධ සිංහලෙන් සජ්ජායනාව අනිවාර්ය කළ යුතුය.
මෙතෙක් නීතිගත නොවූ ජඩකම් වහ වහා නීතිගත කළ යුතුය.
නීතිගරුක මිනිසුන් වෙත නීතිය නවා බරපතළ වැරදි, ඩීල් කරුවන්ගේ කුජීත නිදහස් අයිතිය සුරැකිය යුතුය.
ජයලලිතාව ඇදහීමට නූගත් ඉන්දියානුවන්
තව තවත් දිරිමත් කළ යුතු අතර දෙවන ලෝක යුද සමයේ ජපන් බෝම්බ වලින් රට ගලවාගත් වීරයන්ගේ පරම්පරා වලට ගම්වර සහ විශ්‍රාම වැටුප් හිඟ දීමනාද සහිතව දිය යුතුය.

(මේ ප්රමුබතාවයන් කිහිපයක් පමණි.)

දේශපාලන රදළවාදය (තොරණ් බලමු, රබන් ගසමු)

නොදැන හා දැනගෙනම දේශපාලන රදළවාදයට  උඩගෙඩි දෙන ප්‍රජාවකට උරුම ධනය, බලය ඇත්තන්ගේ දෙපා සිඹීම් පමණය. ඒ සිඹීමේ වටිනාකම තම ජීවිතයටත් වඩා වටනේ යැයි සිතන්නෝ ඒ උදෙසා මරාගෙන මැරෙන තාක්  වෙෙවර්ණව බබළන්නේ දේශපාලන රදළවාදයේ තොරණයි.
ඉතිං, වෙෙවර්ණව තොරණ් බලන්න, හිතේ හැටියට රබන් ගහන්න... සුබ දවසක් ඒවි ඔබේ තොරණට...

හිටි අයත් ඉන්න අයත් කව්රුත් මට එකමය (රදළයාත්, ගොවියා පුතුත් මේ සිරිලකට පහළය) 👇

රදළ වාදයට එරෙහිව
කැරැල්ලක් ගසමි තනිවම
දළකාර හෝ චණ්ඩින්ට මැර
බිය නැත ඊයෙත් අදත් හෙට වෙද

කුක්කො වී ලතවෙන
සොක්කො සේ ලෙවකන
ගති පුරුදු නැති අප
පි දිය යුත්තන් හැර පියා නැත

මන්ත්‍රී ඇමති ජනපතී
මට නොවේමය අධිපතී
වේ නම් රටට හිතවතී
කරනු කව්රුත් රටට වැඩ නිසී

වා! 👏

ග ම ධ ස රි යේ
සත්‍ය ට ජයවේ
සාධාරණය ඉටුවේ
යුක්තිය ම රජවේ

රතු වීම 💯

යථාර්තයේදී  නිබඳ රතු වෙති මිනිස්සු
උපතේදී රක්තයෙන් නැහැවෙති
විපතේදී එපැහැයෙන් ම තෙත් වෙති
තවද හැබෑවටම වරද නිවැරදිව අවබෝධ කොට ගත් තැන ද විලියෙන් රතු වෙති,
කනටම වැදුණත්, නැතත්
රතු පලස් උඩ
රතු ඇපල් කන
රතු දෙතොල් ද
රතු කමිස ඇඳ
රතු මලක් ගෙන
පෙම් කරත් ද
නැතිද නව රතු අරුත්
"....෴........."
සොයා ඒ අරුත්
රතු වෙන්න ඔබත්...

ඔබට දිවුරා කියන්නම්.. මටම ජන්දය දීපන්...

ඔව්, අපි තමයි මේක හදන මිනිස්සු.. අපිට, මට ඡන්දෙ දෙන්න. මම යි පොර රට රකින.. මමයි මිනිහා ... අපි කොරා, කව්ද අපිට කොරන්නේ, කොරල බලමු.. මේක අපේ රට..... අපේ ලේ කකියනවා, රෑට නින්ද යන්නෙ නෑ.. කවදද රට ගොඩ නැගෙන්නේ.... මේක හදන්න අපිට ඡන්දෙ දෙන්න.

හිස් තැන් - (👄 දනකවි)

හිස්තැන් මහතැන්ය - මහතුන්  දැන් බොස් ය
පොෂ් තැන් උස්තැන්‍  ය - උස් තැන් දැන් පුස් ය
පුස්තැන් අපමණ ය - උස් තැන් දැන් හිස් ය
හුන්තැන්‍ අවතැන් ව - හිත් පිත් එක්තැන් ය

🎶 ගා ගා රී නි රි සා 🎶

එනිසා
හැමදා
සමරා
ගහමරා
කියමූ...හා හා...
ගා ගා රී නි රි සා

🇱🇰 🇱🇰 🇱🇰

කාලය ගෙවෙයි
ආලය තේරෙයි
හෙටට හැත්තෑවයි
පෙම නුඹට බාරයි

සාධාරණ මිනිස්සු - රජම නොවෙති!(රජ/මජර/ජාගර-චින්තන පරදවන යුක්තිය සොයමු)

උඩරට ගිවිසුමෙන් පසු ඉංගිරිසිංගෙන් රට මුදාගන්න තිබුණු අවස්ථාවන් ගිලිහෙන්නට හේතුවුණු ප්‍රධාන කරුණක් වූයේ අධිරාජ්‍ය විරෝධි කැරලිවල නායකත්වය ගැනීමට රාජ උරුමය ඇත්තෙක් නොසිටීමයි, අදටත් මිනිස්සු රාජ උරුමය නැතත් රාජ ලීලාව ඇති මිනිස්සුන්ව හොයනවා රට ගොඩ නගන්න.. ඒක හරිම විහිළුවක්. තමන්ගෙ දාස මානසිකත්වයෙන් ගොඩ එන්නට තමන්ටම ඇති නොහැකියාව නිසා රාජ ලීලාවට හේත්තු වෙලා තමන්ගෙ හීන මානය වහගන්න හදනවා. බොරුවෙන් මුළාවෙන් මිදෙනවා වෙනුවට ඒක සාධාරණීකරනය කරගන්ඩ කතාවක් ගොතනවා. රටේම ඉදන් රට කන මදාවි රැළ එලවනව වෙනුවට රාජ ලේ ඇත්තෝ රට රැකගන්නකම් බලාන හිටියොත් වෙන්නෙ වත්ත බදදට දී ඇස්සට දත නියවන්නට පමණයි.
රජ වරුන්ටත් වඩා භයානක රාජ ලීලාවට ඇදගත්ත රාජ රාජ ප්‍රතිරූපධාරීන්. විජ්ජාකරුවන් ඉන්ද්‍රජාලිකයන් වගේ ප්‍රතිරූපයෙන් රගන ප්‍රතිපත්තියක් නැති ඔය මිනිස්සුගෙ අන්තිම ඉලක්කය තම වාසිය විතරයි. ඇත්ත මේකයි. තම වාසිය පමණක් හිතන, ඒක සාධාරණීකරණය කරගන්න හදන, පොදු යහපත නොතකන, නොහිතන කාටත් දිනකදි විදවන්නට වේවි. ඒක සහතිකයි. යුක්තිය වෙනුවෙන් බොරුව විදවිය යුතුමයි...!

හැටට හැටේ බෑන්ඩ් 🎶 චූන්... (🍭 ලොli ද POප් 🍭)

පෙරාපු රත්තරන්ද ඉස්තරම්
මනුස්සකම් ගිණිගණන්
විනෝදකම් පෝලිමෙ එනවා

ඒවට ගෙවන්න මට ඇති තරම්
හොයාගන්න සල්ලි දැන්
තව තව මං වලි කනවා

රටතොට යන හැටියට යන
ජීවිත අපෙ පොදිබැදගෙන
ජය ටැඹ නගින්න වෙනවා

ඒකට ගැලපෙන්නට මට
සමාජයේ වැජඹෙන්නට
තව අය මඩින්න වෙනවා

උත්ඝෝෂණ වැඩවර්ජන
සම්භාෂණ ඕන දෙයක්
එකටෙක කරන්න වෙනවා

අද රජ වෙන හෙට බලු වෙන
බව දැනුනත් ඕන දෙයක්
ඒක නිසා කරගෙන යනවා

දෙල් උනදා ඔය හැමදේ
පොල් කරන්න ඕන තරම්
බඩු අපි ලගම තියෙනවා

උගත මනා ශිල්ප දමා
මතු රැකෙනා එහෙම තමා
මුළු නිදහස නවා ගන්නවා

ජී විතේ ජීවිතෙ
ජීවක මමයි ජීවිතේ
යනදා එනකම් අපි දෙවන ජීවිතේ

පා ඩුවේ පාලුවේ
ඉන්නට බෑනෙ යාලුවේ
නොදැනම යනකම් අපි ලැබුව ජීවිතේ

(අ)සිරිමත් 🇱🇰 ලංකා-thinking center in the country

සිරිමත්‍ ය දිරිමත්‍ ය
ඒ රටේ මිනිසුන්
සවිමත්‍ ය බලවත් ය
ඒ රටේ මිනිසුන්
ඔදවත්‍ තෙදවත්‍ ය
ඒ රටේ මිනිසුන්
අසිරියකි අසමසම
ඒ රටේ මිනිසුන්

කවුරුන්ද වින කළේ
ඒ වගේ මිනිසුන්ට
සෙළවුනේ බිය වුණේ
ඒ රටේ මිනිසුන්ද
එක එකා තරගයෙන්
භින්න වුණෙ මිනිසුන්ද
අසිරියත් මරිසියත්
පටලැවුණෙ එතැනින්ද

සිංහයෝ ගත යුතුය
පිට උඩට මිතුරන්
තරණ කළ යුත්තේය
ගග සිටින කිඹුලන්
එතැනදිත් පිල් බෙදී
නොවීයන් සතුරන්
පැරදවිය යුත්තේම
රටේ පොදු සතුරන්

වංචාව දූෂණය
නියගයද පරදන්
පරිසරය මිනිස්සුද
සිරිමතුන් කරපන්
නිවට ගති සතුරුවන
දියුණුවට නසපන්
අසිරිමත් අසමසම
සිරිලකක් හදපන්

මෙතෙක් කතාව-

දෙවියන් කවදත් ආදරේ කළේ අසරණ දුප්පත් මිනිසුන්ට. මේ නිසා අසරණ දුප්පත් මිනිසුන් නිතර දෙවියන්ගෙ මන්දිරය ඉදිරිපිට රැස්වුනා, කන්නලවු කළා, අනේ! අපිට පිහිට වෙන්න. මේ නිවෙස පාරේ හිටි හැමෝම වගේ බොහොම පොහොසත්තු. ඔවුන්ට මේ අසරණ දුප්පතුන් ගේ අදෝනා මහත් හිසරදයක් වුනා. පාරෙ තොටේ නිදහසේ ගමන අපහසු වුනා. ඔවුන් කල්පනා කළා මේ කරදරයෙන් මිදෙන මගක්. ඔවුන් රැස්වුනා මහ හෝටලයක, මධුවිත තොලගාමින් කතා වුනා මේ ගැන.. අවසනදී ඔවුන් තීරණක් අරගත්තා. ඒ දෙවියන්ට හාත්පස විරුධ ගති ඇති දෙවියන්ගේ මලණුවන් මේ කාරණයට අතරමැදි කරගන්න.. දෙවියන්ගේ මල්ලී ගත් තීරණය කුමක්ද? දෙවියන් අහක බලාවිද? දුප්පතුන්ට අත්වන ඉරණම කෙබදුද? අද එතැන් සිට!..

බොරුවට මැරෙමි, ඇත්ත මරමින්(18/36/72+++කුකවි)

අට පහ නොදනිතත්
සිස්ටම් එක දනිත් මං
දරුව පහ සමත් නම්
ඒකම වේය මගේ නිවනත්

මං ගෲෂා නොවේ
Sms දරුවට ඕනේ
ඒ නිසයි ඇද්දේ
අල්ලන්නට තරු වලිගේ

අපේ ගොනා දීපල්ලා
ලණුව අතේ තබපල්ලා
නාස් ලණුව කපපල්ලා
තරුණ අපිට නවපල්ලා

අප්පොච්චිලා පොට්ටu වෙනකොට
මොට්ටු tv පුප්පවනකොට
පිට්ටු සේරම තට්ටු වෙනකොට
බොරුව වෙනුවෙන් නොමැරි කොහොමද?

හිත්...

රවන්න ගොරවන්න
ඔරවන්න ඕනත් අපි
නීති හදන්න
රකින්න වෙනස් කරන්න ඕනත් අපි
නො දන්නවනම් දැනගන්න
දන්නවනම්
පටන් ගන්න
වෙනස්කරන්න
කලුපාට

කාලකණ්නින් භංග වේවා, පළමුව, දෙවනුව, තෙවනුවත්

ජන්ද වෙනුවෙන්
රටම චූන් කරන
කොන්දක්
ප්‍රතිපත්තියක් නැති
නිර්ලජ්ජිත
නිවට සත්තු
තොලොංචි වී යේවා!

කණුව ගලවපන්, ලණුව අතටගන් (හරකා නිදහස් කොරන නව වසරක්!)

රතු ගොනා
නිල් ගොනා
කොළ ගොනා
මොන ගොනා
පසුපසින් දැක්කුවත්
නොගලවා ඔය කණුව
ගොන් බදින එකම තැන
කැරකෙන්නෙ එකම වට
ඒ නිසා ගලවපන්
ලණුව නොව
කණුව ඔය

උ ගත නු ගත දෙගත ගතං..

අකුරු අහුලන්න
වචන අමුණන්න
ව්‍යාකරණ මිරිකන්න
බසේ රස ගන්න
පොතෙන් පැණිබොන්න

බඹාට කෙටූ ....

ඩිජිටල් අවිහිංසකකම
චයිනීස් නිවන
ප්රිමියම් හෘද සාක්ෂිය
බිට්කොයින් ජීවිතය

පොඩ්ඩක් ඉස්සුනා - හොදටම ගැස්සුනා - ඇතුළත තිරිසනා - නොදැනම හිනැහුණා

එ්වා අපිට නොතේරේ
ඇඩ්රිනලින්ට තේරේ
බසය ස්වභාවේ
මනරංජනය භාවේ

පොල් සහ තල් කිතුල්
කීරි කීරී නැතිය තල තෙල්
ගාගෙන අත ඉදුල්
කෑවේ අපිත් ඔය බත්

බඹර කැරකෙනවා
බබා නළවනවා
බබී නැළවෙනවා
ඔන්න ඔහෙ යන විදිහ යනවා

බටහිර අහසේ පීනික්ස්

මුල් නොකැඩුණු සරු ගස් යළි දළු දමයි
මල් නොපිපුණු ගස් වල යළි මල් පිපෙයි
පල්ලම එන්නේ කන්දක් නැගි විටයි
මල්ලව ගති දන්නෝ යළි නැගිට එයි

මං පරණ සේපියන් මිනිහෙක්

මුල අමතක මිනිසුන්ගෙන් ඵලක් නැත
වාසියට මුල් හොයන මිනිස්සු අගේ නැත
අනුන්ගේ පානෙන් එළිය බලා උඩට ගිය
ඔය බොරුවේ කෙළවර උඹ වැටෙනු ඇත