නොබැඳි රටක්
කාටවත්ම බයත් නෑ
ආත්ම ගරුත්වයක් ඇති රටක්
කාටවත්ම ණයත් නෑ
කියන දේ, ඇහෙන දේ
අදහන දේ මාරයි
අඬන්න, හිනා වෙන්න
තැනකුත් නෑ, වැඩකුත් නෑ
මිනිස්සු මැරුණත්
අලි මැරුණත්
වගා පාලුවුණත්
වන විනාශ වුණත්
***********************************************
පාලකයො ජේෂ්ඨයි
පාලනය ශ්‍රේෂ්ඨයි
අපි මාර උත්කෘෂ්ඨයි
2045 හේ,
අමරණීයයි!
ණය නැති රටක් ~ බය නැති හෙටක්
බය නැති රටක් ~ ණය නැති හෙටක්
සිඟමන් යදින රටක් ~ අවමන් විඳින හෙටක්
අවමන් විඳින රටක් ~ සිඟමන් යදින හෙටක්
බොහෝ කොට අන්තවාදයට සහ අවස්ථාවාදයට උචිත වන පරිදි පිටිය සැකසූ රටක සෞභාග්‍යමත් පිතිකරණයක් හෝ පන්දු යැවීමක් බලාපොරොත්තු විය හැකිද? එබඳු විටෙක සෞභාග්‍යමත් තරඟයක් වෙනුවෙන් විනිසුරුවන්ට සහ තරඟ තීරකයන්ට කළ හැක්කේ කුමක් ද? කළ යුත්තේ කුමක් ද?
අස්ථාවාදී දේශපාලකයෝ සහ අවස්ථාවාදී රට වැසියෝ තමන්ගේ පුද්ගලික ලාබ වාසි සඳහා රටත් තම සහෝදර ජනයාත් බිල්ලට දුන්හ. තවදුරටත් දෙමින් සිටිති. මේ පිළිබඳ විචාර විවේචන ගෙනෙන අනෙකුත් සියල්ලෝ ඒ වරද නිවරදි කිරීමේ අරමුණෙන් ඒකරාශී නොවනතාක් ඔවුන් කරන්නේද කර ඇත්තේද ඒ අවස්ථාවාදය පෝෂණය කිරීම පමණි. එවිට මේ රටේ ජයග්‍රහණය වෙනුවෙන් නිර්මාණය වෙන ස්වර්ණමය අවස්ථා ඉතිහාසයේ වර්තමානයේ සේම අනාගතයේද එක් එක් වර්ගයේ පටු අවස්ථාවාදයන් තුළ අපතේ යනු ඇත.
ක්‍රමයක වෙනස නම් මේ අවස්ථාවාදය පුද්ගල, පක්ෂ, කණ්ඩායම් වලින් බැහැර කොට රට වෙනුවෙන් භාවිත කිරීම ය. එබඳු කැපකිරීමකට දායක වීමට තරම් අවංක නොවන පිරිස බහුතරය වන තාක් ඒ අවස්ථාවාදයේ සාපයෙන් ගැලවීමට බහුතර රට වැසියාට ඉඩ නොලැබෙනු ඇත.
වර්තමාන පාලකයාට ඒ පිළිබඳ සැබෑ උවමනාවක් තිබේ නම් එහි සමාරම්භය සනිටුහන් කිරීමේ හැකියාව ඔවුන්ට තිබිය යුතුය.
තවදුරටත් වංචාව හා පැළැස්තර ඇටවීම් තුළ තම පුහු මාන්නයන් හා බල තණ්හාව දිගේලි කිරීම ඔවුන්ගේ අවශ්‍යතාව නම් තවදුරටත් පරණ හරකා කණුවක බැඳගෙන සිටිය හැක.
තමන්ගේ පටු අවස්ථාවාදය රට වෙනුවෙන් කැපවන ලෙසට ප්‍රතිව්‍යූහගත කරණයට අසමත් වන තෙක් වෙනත් කිසිඳු ප්‍රතිව්‍යුහගත කිරීමකින් අසමත් රාජ්‍ය සමත් කිරීමට හැකි නොවනු ඇත.
චුයිංගම් වුණාට පස්සෙ රට
ආස්වාදය හැපෙන තරමට
හවයක් වෙලා විසිවෙන හෙට
කෙළපිඩක් විට පඩික්කමකට
ඉන්දියාව සතුටු කරන්න උන් හැමදා දේශපාලනය කළා.
ක්‍රිකට් වලින් ඒක වහන එක අපේ උන් ටිකකට නතර කළා.
well done ~ හොඳට ම කළා
අභිමානය හා අවමානය අතර ඇත්තේ එක අකුරක වෙනසකි. අතීතයේද වර්තමානයේද අනාගතයේද කියා එහි වෙනසක් නැති.
රටක් හැටියට ෆේල් වෙලා, කප් එකකින් හරි විලි වහගන්න හැදුවට ඒක අමාරුයි.
දැන් අපිට වහගන්න තරම් දෙයක් නෑ , මේ තාක් වහගෙන හිටියෙත් ඉන්දියානු ආධාරයෙන්.
ඇත්තටම කරන්න තිබුණෙ රටේ මහ පුටුත් එක්ක ක්‍රිකට් එකත් රනිල් දිනේෂ් ඇතුළු පිරිසට බාර දෙන එක.
මේ රටේ හැම කෙළියක්ම කිරීමේ අනුහස ඇත්තේ රට කාපු උන්ට පමණයි.
අපි රනිල්ගේ වලිගේ එල්ලී තවදුරටත් අහසේ ම රැඳෙමු ! ඉන්දියා, චීන, ඇමරිකා ect.. දෙව් ලෝ පතමු !
ඒ පාඩමත් ඉගෙන නොගන්නට තරම් අපි more තකතීරු නම් මේ අවස්ථාව ක්‍රිකට් ක්‍රීඩාවටත් ක්‍රීඩකයන්ටත් පවරා අස්ථාවර ක්‍රිකට් වෙනුවෙන් හෙට අස්ථාවර රටත් ඉන්දියාවට or වැඩි ලාබයට දන් දෙමු !
ගරු ලොකු පුතා ඇතුළු දුවාදරුවන් විසින් තමන්ට දෝසි කෑම පිණිස තම මව නොහොත් ලක් මව බන්දේසියක නොතබා ශල්‍යාගාරයේ දීම අවයව වශයෙන් වෙන්දේසි කිරීමට නියමිතය.
පරයින් කරමින් හුරතල් !
අරිමින් කුණු කානු කටවල් !
වගුරමින් අශූචි ගොඩවල් !
හැදුනේ කොහේද රටවල් ?
පාලකයන් බලෙන් ඇතී
නායකයන්ට ඉඩක් නැතී
පිස්සුවට තැනක් ඇතී
සුදුස්සන් ගෙදර යතී
විප්ලවයකට ඉඩක් ඇතී
අවසානයට පණක් මදී
හොඳ එකාගෙ හොඳත් වැඩී
නරක එකා විනත් කටී
පාරෙවත් නීතියක් බැරී
තදබදයෙන්ම කැපෙයි ඉරී
කහ ඉර ඇතත් නැතත් සොරී
මැරි මැරි ඉපදුණත් ජොලී
හොරු බදාගෙන හොරු
දියුණුවට යයි රට මරු
රජා රකිමින් රජ බඩු
දනන්ට කියයි අවනඩු
නීතිය පොතට සමානලු
කෙරෙන විට අසමාන ලු
දුගියට බෙදා මනිබඩු
ඡන්දය හිඟති රජබඩු
සැබෑ දියුණුව ඊසි ද
වංචාව සමඟ ලේසි ද
රැක දුෂිතයන් පේළිය
මෙහෙම යං මේ ක්රේසිය
ගින්දරත් දෙන්නම් දැල්වෙන්න
ඔබ කැමති විදිහකට ඇවිලෙන්න
අපි කීවොත් මිස නිවෙන්න
පිච්චචෙන තුරුම ඇවිලෙන්න
ඇවිලෙන්න, එපා නිවෙන්න
ඇවිලෙන්න එපා, නිවෙන්න
නිවෙන්න එපා, ඇවිලෙන්න
නිවෙන්න, එපා ඇවිලෙන්න
රටට ජාතික නැටුමක් හඳුන්වාදීමේ වටිනාකම පැහැදිලි වන්නේ මෙවැනි අවස්ථා වලදී ය.
මහජනතාවගේ ආතතිය ජාතික වශයෙන් කළමණාකරණය කිරීමට අමතරව එයින් අපට අත්කර ගත හැකි ධනාත්මක තත්වයන් ගණනාවකි.
1. සීරුවට වඩා පහසුවෙන් වින්දනය කළ හැකි වීම.
2. හඬට එහා සකල ශරීරයෙන් ජාතික අභිමානයට උපහාරය දැක්විය හැකි වීම.
3.ස්ත්‍රී පුරුෂ භාවයට අත නොතැබිය හැකි විධායක බලය අබිබැවිය නොහැකි වීම.
4. ඔපෙරා, ජන ගී, බයිලා, කපිරිඤ්ඤා ආදී ගායන ශෛලීන් මෙන්ම විවිධ භාෂා ආර තුළින් හානි කිරීමට නොහැකි වීම.
5. "නැව ගිලුනත් බෑන් චූන්" අනියම් අර්ථයෙන් නොසැලෙන, ශක්තිමත්, සැහැල්ලු, ජවසම්පන්න, අභිමානවත් ජනතාවක් බව ප්‍රකට කිරීමට හැකිවීම.
(බංකොලොත් භාවයේ සිට ලෝක බලවතෙකු දක්වා ~ ගෞරවයෙන් සුබ පැතුම්!)
හිසට බඩට හා යටි බඩට පහර දීමෙන් විධායකය ව්‍යවස්ථා දායකය හා නීතිය ශක්තිමත් වේ ලු. මරා දැමීමෙන් රට සංවර්ධනය වේ ලු. හොර මැර ජඩ කම ප්‍රවර්ධනයෙන් ලෝක බලවතෙකු බවට පත් වේ ලු.
ලක්වාසී ජනතාව වෙත, කරුණාවෙන් දන්වන වග නම් !
මගේ පුටුව නිතරම රත් කරන්නේ ඔබේ රටේ මහ ජනතාවයි. එය මෙලොව කිසිවෙකුටත් රහසක් නොවෙයි. පසුගිය වසර දෙක තුනක කාලය තුළ මගේ කාර්යාල අසුන කී වාරයක් නම් අලුත්වැඩියා කරන්නට සිදුවුණි ද ! එය මගේ භවනේ තත් කාලීන වාර්තාවක්. හේතුව ඔබ රටේ මහ ජනතාවගේ නිමා නොවන ප්‍රශ්න හා ගැටළුයි.
බීරි අලින්ට කරන වීණා වාදනය නවත්වා ලන්නට මා ඔබලාට කොපමණ උපකාර කර ඇතත් ඔබලා නැවත නැවතත් කරන්නේ එයමයි. දැන් මට සිදුවී ඇත්තේ ඔබට උපකාර කිරීම පසෙකලා මගේ වැඩක් බලා ගැනීමට පමණයි. අත්දැකීමෙන් වුව පාඩම් නූගන්නා පිරිසක් වෙනුවෙන් වෙහෙසීම නිශ්ඵල හා නිෂ්ප්‍රයෝජන කාර්යයක් බව දැන් මට වැටහී තිබේ. නැතහොත් මාද ඔබ මෙන් බීරි අලින්ට වීණා වයන වාදකයෙක් ලෙස පෙනී යන්නට ඉඩ තිබේ. එබැවින් තව දුරටත් ඔබගේ ගැටළු වෙත මගේ සාතිශය කණගාටුව ප්‍රකාශ කිරීමෙන් පමණක් සැහීමට පත් වීමට සිදුවන බව කාරුණිකව ප්‍රකාශ කරමි.
ස්තූතියි,
මීට
ශක්‍ර දේවේන්ද්‍ර
(ස. ලො. අධිපති)
Wednesday, June 28, 2017
