එවිට ජනයා මායාවට වඩා යථාර්තයට ළංව සිතනු ඇත.

ප්‍රතිරූප - බැලුම් බෝල

පිමිබීම - පිපිරීම

පොහ් ::

කලාවෙන් ඥානනය යනු බැලුම් වනාහී පිපිරෙන දෙයක් බව ඒත්තු ගැන්වීම මිස පිම්බිය යුතු දෙයක් ‍බව ඒත්තු ගැන්වීම නොවේ. මිනිසෙකු ගැන හැබෑ කලාකරුවෙකුගේ වගකීමද එයමයි. තමා පිම්බෙන තරමට පිපිරීමට වඩා සමීප වන බව ඔවුන්ට කියාදීමයි.

කටවහන් හොම්බෙන් යන්න ඔබ

කටවහන් හොම්බෙන් යන්න ඔබ පා සිඹින රටපාලුවෝ...............

ආදරණීය අපේ වැඩිහිටියන්ට ජයවේවා!!!

සරම් ඇදන්
ඔලුවෙන් හිටන්
වැඩ පෙන්නන්න හදන
කොයි කවුරුත් පරෙස්සමෙන්
හුරේ එකටත් හූවටත් වඩා
ඔය මහත්තුරු කොයි
කවුරුත් වයසයි දැන්
අනාගතේට අපගේ
වැදගත් වැඩිහිටි
පරපුරක් ඕනෑ
හත්දෙයියනේ!
පෙන්නන්න එපා
ළමයින්ට වැඩියෙන්
වැඩිහිටියන්ට පමණයි
කියා මෙතරම් උණුවෙන
හදවත්, අපත් රට වෙනුවෙන්
ඇති කෑදරය ගෙන ආදරය සේ
උනුත් යාවී නොමගටම රැවටීමෙන්
පින්සිද්දවෙයි ඔය සද්ද නවතන් තවත්
වහගන්න බැරි නම් මහගන්නවත්
සිදුවෙයි මුසාබස් දෙසන ඔබලා
ගේ මුඛත් උම්බෑ වගත්
මණ්ඩුක කටත්

කටවහන් හොම්බෙන් යන්න ඔබ පා සිඹින රටපාලුවෝ...............

ආදරණීය අපේ වැඩිහිටියන්ට ජයවේවා!!!

මගේ පර ම පැතුම එයයි... එම ගට මා විසි කරන්න...

අපේ  නායකතුමාට ජයවේවා!!!

බඩේ ගොයියන් දිනේවා
අපේ මහරජ දිනේවා
සදාකාලික නොවූ ලෝකේ
අමර ‍සුවසෙත සැදේවා

නීතියත් නුඹ නුඹම වේවා
රීතියත් නුඹ නුඹම වේවා
සදාචාරය කලාගාරය
මහාභාරය නුඹම වේවා

පිනත් මතු මතු ලැබේවා
කළගුණත් මතු ලැබේවා
මහදනා දණහිස් ගෙවෙන තෙක්
නූඹේ දෝලා යටින් යේවා

අපහටත් මතු ලැබේවා
දන්සලුත් තව තැබේවා
ධර්මයත් රකිනා තරම් ඔබ
ඒ ධර්මෙන්ම රැකේවා

දරු මුණුපුරන් දිනේවා
අප නුඹට කර දෙවත්වා
සදාකාලික නොවූ ලෝකේ
සදාකාලික රජෙක් වේවා

ප්‍රසිද්ධ ජනමාද්‍යයෙන් අවස්ථා නොලැබෙන අමූලික සැදහැති දනාගේ කෘතඥ්නඥතාව පළකිරීම පිණිස වේ.

මම ගමේ බයියෙක්!!!

මේ ගසේ බොහෝ පැණි දොඩම් තිබේ

පැහිල ඉදිල බිමට නැමිල බරවෙලා අතූ 

මල්ලිටයි මටයි ගෙඩි දෙකක් ඇතී 

වැඩිය කඩන නරක ළමයි හෙම නොවේ අපී

කඩේ යන ගමන් ...ද

කඩේ යන ගමන් පල්ලි පන්සල් යන්නට අප කල්පනා කරන්නේ නැත. කඩේ යන්නේ බඩු ගන්නට බලාගෙනය. පන්සලට යන්නට වෙන්නේ ගන්නා දේ දෙන්නට බලාගෙනය. එනිසා අප සාමාන්‍යයෙන් නම් කඩේ යන ගමන් පල්ලි පන්සල් යන්නේ නැත.

නමුත් පන්සල් යන ගමනේ කඩේ යන එක වෙනම ගමනකි. හදුන්කූරු ටිකක්.. තෙල් ටිකක්..නැතිනම් පහන් තිරයක් ගැනීමට පන්සලට යන ගමන් කඩේ යෑමට අපට සිදුවේ.

පාට පක්ෂ වෙනුවෙන්ම රට යට නොකර රට වෙනුවෙන් පාට පක්ෂ හා සන්ධාන වීම යනු පන්සල් යන ගමන් කඩේ යෑමක් කොට ගත ‍යුත්තේ පොදු මහජනයාය. එය අවස්ථාව හා අවදිය අනුව විවිධ වශයෙන් විය හැකිය.

රටක ප්‍රතිපත්ති, නීතිය, සදාචාරය, සාධාරණත්වය ගැන මහජන හැගීම් නැවත නැවත අලුත් කොට ගත හැක්කේ ඒ හරහා පමණි. සළකන මොහොතේදී රටට ඒ කාරණා වල අවශ්‍යතාවයේ තරම කොතරම්ද ඔබටම හැගෙන්නේ නම්.. එවිට ඒ මොහොතේ පාලකයෝ හැකි පමණ රාජ්‍ය මැදිහත්කමෙන් පවා වරප්‍රසාද මුදාහැර සාමාන්‍ය මිනිසාගේ මතය දියාරු කරන්නටද සපුරා ප්‍රතිවිරෝධී මත හදන්නටද කරන කටයුතු අවබෝධ නොවී නොතිබෙනු ඇත. අද අප රට ගැන හොදින්ම දන්නේ මෙහි සජීවී ඔබත් මමත්ය. ප්‍රතිපත්ති පිළිබද මහජනයාගේ හැගීම් නිවට වූ කලට නැවත පාලකයන් බලයෙන් මත්වන්නෝය.

එබැවින් ප්‍රතිපත්තිමය බලපෑමට පාලකයා යටත් කොට ගන්නට ලැබෙන අවස්ථා ළාමක කරුණු මත අප කිසිවිට අත් හළ යුතුද?. එවැනි බල කිරීමකටවත් සූදානම් නොමැති ජනතාවක් කොතරම් කලක වත් රටකට බලපෑම් සහගත වන්නේත් නැති. ඉදින් එහෙව් ජනතාවක් නම් දෙන දේ කා වෙන දේ බලා හිදීමක් පමණකි හැමකල... එහෙව්වෙක් හරියට රාජකීය ජෝතීෂ අරට්ඨකීවෙණ්ඩු පරෙුමාල් කෙනුකුගේ ග්‍රහබල ගුණ්ඩු කතාවක මායාවට හසුවුනු අහිංසක මෝඩයෙක් වීම වැළැක්විය හැකිද? එසේ මෝඩයෙක් නොවී වරප්‍රසාදිත ගැත්තෙක් වීමටද සමහරු කැමතිය. නමුත් පරාජයටත් වඩා නිවට දුර්මත ගැනීම කොතැනත් අභිමානයක් නොව හීනමානයක්ද වන්නේය.

අන්දන්නට හදන තරමක් බොරු වපුරන කළක මුළාවේ නොවැටී අපි ඇත්ත වෙනුවෙන්ම පෙනී සිටිමු. ඇත්ත හදුනාගන්නට තරම් වත් ඉඩක් අප තුළ වෙත්නම් .. එතැනට යාමට හැකි කමක් අපට ඇත්නම් මත්තටද රටට වරදින්නට හේතුවක් ඇද්ද???.. පල්ලි පන්සල් කෝවිල් මස්ජිද වෙත යන ගමනේ විතරක් හැමදා කඩේ යමු..
ජය වේවා අප හැමට.

පුරුෂ තුනම හෙලුවෙන් මද???

 :)

ගල් මුල් අරන් - වදිති පන්සල්.......................................................................මැ‍රය‍ෝ

පොලු කඩු අරන් - මහපාර උඩසිල්.........................................................දෙසනපාලුවෝ

දන්සල් ගිහින් - පුදති පින්පෙත්.........................................................සැදති පොදු දනෝ

අපි හොරු අරන් - සමග හෙලුවෙන්.................................................අපි‍ නොදැන වී රටම

උත්තම, මධ්‍යම, ප්‍රථම වශයෙන් එන කිනම් පුරුෂයකට අයත් වන ස්ත්‍රියද ඇතුළුව සියල්ලෝ පාට කණ්නාඩි පැළද ඒ ඒ පාටින් පෙනෙන සමාජයට නම්බු දීම අද අප රට පිළිබද වන සරලම විග්‍රහයයි. කුමන පාටකින් බැලුවත් තමාගේ  හැර අනෙක් හැම දෙනාගේම නිරුවත අද හොදින්ම අනෙකාට පෙනෙන්නේය. එබැවින් හෙට දවසේ ජනතාව තේරුම් ගත යුත්තේ තමාගේ දේශපාලකයාට රෙදි ඇන්දවීමට පෙර තමන් රෙදි ඇද ගැනීමේ වටිනාකම නොවේද? එනම් අපගේ සුළු හෝ නිවැරදි ප්‍රතිපත්තිමය ස්ථාවරය රටකට කොතරම් නම් වටිනවාද යන්න ගැඹුරින්ම වටහා ගැනීම නොවෙද? නිතර පාට කන්නාඩිය මාරු කරනවාට වඩා බුද්ධිමත් ජනයාගේ වගකීම එයමයි සිතමි.

අසත්‍ය භංගවේවා...! පැතුම සත්‍ය වෙනුවෙනි...

බොරුකාර ‍දේශපාලන ත්‍රස්තවාදය භංගවේවා
වන්දනාකාර අමූලිකශ්‍රද්ධා මුග්ධවාදය භංගවේවා
අඩක් වහන සත්‍ය හංගන මුරකාවල් පුපුරාවා
යුක්තිය වෙත මගක් හැදෙන තැනකට රට එසවේවා.............................................................................................................!

ඡන්දය ඔබ ගන්න අයිතිය අපට දෙන්න

අපේ යෝජනාවන්ට ඇහුම් කන් දීමට ඔබ සූදානම්ද? මේ යෝජනා යනු අපේ සද්භාවික පුරවැසි අයිතිය බැව් සළකන්න.

එක එක පිලට චෝදනා කරනවාට වඩා මෙලෙස යෝජනා කිරීමට අප කැමතිය.

 

මෙහිදී හැමදෙනාගේම ප්‍රමුඛ අපේක්ෂාව හා ප්‍රාර්ථනය වන රට රැකිම ගැන අප අසන්නේ නැත. එය ඇසිය යුතු හෝ එකගවිය යුතු දෙයක් නොවේ. හැම පුරවැසියාගේම අනිවාර්ය යුතුකමකි. එම පරම යුතුකම පාට පක්ෂ අනුව විග්‍රහ වන එකක් නොව හැබෑවටම පොදු මහජනයාගේ යුතුකම හා වගකීමයි. එය වෙනුවෙන් පෙනී සිටිය යුත්තේ පාට පක්ෂ බදා නොව රට ජාතිය දෝතින් වැළද ගෙනයි. එබැවින් අප මෙහි සළකන්නේ ඉන් ඔබ්බෙහි ඇති අපේක්ෂාය.

 

මෙලෙස ඉදිරිපත් කෙරෙන සියලු කරුණු ප්‍රධාන කොටම දේශපාලකයන්ගේ යුතුකම්ය. අපගේ යුතුකම ඔවුන් වෙනුවෙන් ඡන්දය නම් මෙය සැළකිය යුත්තේ අපේ පොදු සද්භාවික අයිතිය ලෙසයි.

 

1.දේශපාලන භේද නොතකා සමානාත්මතාවයෙන් සියලු ජනතාවට එකසේ සළකන්න.
සියලු ජාතීන් ලාංකිකයන් ලෙස සමානය. ජාති ආගම් කුල භේද මත ඔවුන් පීඩාවට පත් කරන සුළුතරයක් හැරුණු විට නිරන්තරයෙන් අප කොයි කව්රුත් පීඩාවට පත්වන්නේ ප්‍රධාන වශයෙන් දේශපාලන භේද භින්නතාවයෙනි. ඒ ඒ පක්ෂ පාට ලබාගන්නා බලය මත පාක්ෂිකයන්ට සැළකීමත් අන්‍යන් නොසළකා හැරීමත් රටේ සාමාන්‍ය ස්වභාවයක් බවට පත්ව ඇත. සුදුස්සාට සුදුසු තැනත් දේශපාලකයන්ගේ ඇගිලි ගැසීම් වලින් තොරව පොදුවේ මහජනයාට සමානාත්මතාවයෙන් සැළකීම සියයට සියයකින් තහවුරු කිරීමට ඔබ එකග වනවාද?

 

2.දේශපාලන භේද නොතකා තරුණයා හා ඉදිරි පරපුර වෙනුවෙන් හැබෑ සංස්කෘතික හා සමාජීය චින්තනයක් බිහිකිරීමට මං සකසන්න.
තරුණයා හා කුඩා දරුවා නංවන්නට කටයුතු කරන්නේත් හුදු දේශපාලන අරමුණු ප්‍රමඛ කරගනිමින් බව අපි නිරන්තරයෙන් දකිමු. තරුණයන් වෙනුවෙන් ඇති ආයතන දේශපාලනික සටන් භූමි බවට පත් කරගෙන ඇත. දරුවන්ගේ සංස්කෘතික හා සමාජීය චින්තනය වර්ධනයට අවශ්‍ය දේට වඩා ඒ වැඩසටහන් තුළද ප්‍රමුඛ කරන්නේ දේශපාලන උවමනාවන්ය. ඒ අනුව ඔබ පිළිගන්නේ රටේ ඉදිරිය වෙනුවෙන් හැබෑ ජාතික සංස්කෘතික හා සාමාජීය චින්තනයක් අනවශ්‍ය බවද?..... එනිසා සරලව කියන අයුරෙන් දේශපාලනයන් උදෙසා කඩේ යන්නෙකු බවට තරුණයා පත් නොකළ යුතුය. ඔහුට රට වෙනුවෙන් පෙනී සිටින්නෙකු බවට පත්වීමට අවශ්‍ය නිවහල් භාවයත් ස්ථාවරයත් සකසා ගැනීමට උදව් කළ යුතුය. එ් අරමුණෙන් තරුණයා හා ඉදිරි පරපුර වෙනුවෙන් ක්‍රියාවට නංවන වැඩපිළිවෙලවල් සියල්ල දේශපාලන අරමුණු වලින් තොරව නිදහස් ජාතික ක්‍රියාවලියක් බවට පත්වීමට ඉඩ හසර විවර කළ යුතුය. සියයට සියයක් ඔබ ඒ සදහා එකග වනවාද?

 

3.දේශපාලන භේද නොසළකා නීතිය හා පුරවැසි අයිතිවාසිකම් සුරකින්න.
ඡන්දය මුල්කොට ගෙන පුරවැසියාගේ අයිතියාසිකම් ගැන සමහරවිට දේශපාලකයා කතා කළත් එය නිමාවන්නේ මේ කතාකරන අයිතිවාසිකම් තුට්ටුවකට මායිම් නොකරමින්. නීතිය මෙන්ම සාමාන්‍ය මිනිහාගේ සුරක්ෂිත භාවයත් දේශපාලකයන්ගේ බලපෑම් සහගත ක්‍රියාකාරීත්වයෙන් සපුරා මුදවා හල යුතුයි. යම් පක්ෂයක් හෝ පාටක් නියෝජනය කරන්නාවූ පමණින් කිසිවෙකුට සුවිශේෂ වරප්‍රසාද හිමි නොවිය යුතුයි. ඔබ ඒ සදහා පුර්ණ වශයෙන් අප හා එකගවනවාද?

 

4.රට ජාතිය පෙරටුව තබා දේශපාලනය ‍තවත් එක් ලාබදායී ව්‍යාපාරයක් වෙමින් යන ස්වභාවයෙන් එය මුදවා ලන්නට කටයුතු කරන්න.
දේශපාලකයාට තම පක්ෂ පාට අනුව දැක්මක් මෙන්ම අරමුණුද තිබිය හැකියි. නමුත් දේශපාලනය පවතින්නේ මහජනයා උදෙසා නම් ඒ අරමුණු කිසිවිටකත් මහජනයා වෙත අයුතු බලපෑම් හෝ අසාධාරණයන් කරපින්නන ඒවා විය නොහැකියි. එමෙන්ම දේශපාලනය හරහා මහජන නියෝජිතයන් වීම යනු ඔවුන්වෙත අමුතු අායුධ දීමක් හා ඒ ආයුධ රිසි සේ භාවිතයකට අවසර පතක් දීමක් විය නොහැකියි. ඔහුගේ කාර්ය භාරය රට පෙරට ගෙනයාමට අප වෙනුවෙන් රට නිරෝජනයයි. එනිසා දේශපාලනය තම ආර්ථිකයන් ගොඩනගා ගැනීමේ සහයෝගී ව්‍යාපාරයක් වීම සපුරා නැවැත්විය යුතුයි. ඔබ ඒ සදහා අප හා එකගවනවාද?

 

බෙහෝ කොට සමාන්‍ය මහජනයා ලෙස අපට දැනෙන හැගෙන සරලම අවස්ථා හා ඔබට අප සමග සපුරා එකගවන්නට හැකිනම් එය සිදුවන්නේ හැබෑ සද්භාවය ක්‍රියාවේ යෙදවීමේ අරමුණෙන් නම් අපට පිල හෝ පක්ෂ වටින්නේ නැත. නමුත් ගැටළුව... ඉතිහාසයේ සිට ඉදිරිපත් වූ මේ කිසිවකට කිසිදා ප්‍රමඛත්වයක් හිමි නොවීමයි. තව දුරටත් ඔබේ දේශපාලනයත් එවැන්නක් නම් මේ රටේ අනාගතය ගැන සුරංගනා කතා වලින් කිසිදු ඵලක් සිදු නොවේවි. යථාර්තය එයයි.

 

මීට,
ස්වාධීන තරුණයා.......................................................................................................................................................................................................................................

අහිංසකයි... රටක් වටී

උවමනාවට වඩා අහිංසක වන අපේ උදවියව අයාලේ යැවීම පහසුය‍.

බුද්ධිමත් කපටියෙකුටත් හැගීම්බර අන්තවාදියෙකුටත් අපේ මිනිසුන් ඩැහැගැනීම සැබවින්ම පහසුය.

නමුත් ඒ මොහොතකටයි. ඊ්‍ළග මොහොතේ හරිදේ තේරුම් ගන්නට තරම් මොළයක් අපේ අයට ඇත. වැරදුනු තැනත් වැරදුනු හැටිත් මොහොතකින් තේරුම් ගැනීමට තරම් බොහෝ අය නුවණක්කාරය

එහෙත්,

ඉන් පසුව කුමක් කළ යුතුද?? එතැනදී අපේ අය බොහ‍ොමයක් අහිංසකය. රටක් වටින අපේ අය එතැනදී තීරණයක් ගැනීමට නොහැකිව බලා සිටී. හැගීම් බොහොමයක් හදවතේ සැරිසරන්නා වූ විටද තර්කයන් කිහිපයක් බුද්ධීය ආක්‍රමණය කරන්නා වූ විටද මිනිස්සු ගොළුවෙති. අපේ අයටත් එහෙම වෙති.

නමුත්,

තීරණ නම් ගත යුතුය. වරදින්නට පුළුවන, හරියන්නට පුළවන. හොදින් සිතා බලා තර්ක කර ගත යුතු හා හැකි හොදම තීරණය ගැනීමට තරම් කොන්දක් තිබිය යුතුය. එපමණක් නොවේ. ඒ තීරණයේ වගකීම දැරීමටත් ශක්තියක් එතැන්හිම ඇතිකර ගත යුතුය. මන්ද සමහර තැන අපේ අය ලකුණු වැටෙන දේ මිස කැපෙන දේ වගකීම දරන්නට අකමැති වන නිසාය. දියුණුව ඇත්තේ එතැනය. 

කවුරුන් හරි කියාදෙන දෙයක් මත හෝ තමන්ට වැ‍ටහෙන නිසා පමණක් හෝ කළ හැකි හෝ නොහැකි නිසා පමණක් අපි හරි දෙයක් පිළිබද අවබෝධයක් නොලබමු. වැටීම හා නැගිටීම අතිශය වැදගත්ය. නැගිටින්නට නම් වැටීමක් තිබිය යුතු සේම නැගිටීමක් නැති නම් වැටීමක්ද නැතිය. එබැවින් වැටි වැටී නැගිටීමක් ගැන කෙසේවෙතත් වැටුණු විට නැගිටීමක් පිළීබද හැගීමක් අපට තිබිය යුතුය.

රටක් ජාතියක් ‍නොව පුද්ගලයෙකු ඉදිරියට යන්නේත් එලෙස නොවේද? 

අහිංසක ලෙස රටක් වටින ලෙස ඉදිරියට යන්නට අප කොයි කාටත් සවිය ලැබේවා... දරුණු විය යුතු තැන රුදුරු නොවී නොසැලෙන ස්ථාවරයෙන් දරුණු වන්නටත් සවිය ලැබේවා...(සැළකිය යුතුයි.. මේ දරුණු වීම යනු නොසැලෙන ස්ථාව‍රයම, ආත්ම විශ්වාසයම මිස අනෙකක් නොවේ)

දූපතක අපි - ............. පෙර කිවයුතුම ටිකකි.

දූපතක වැසියෝය අප. ඒ දූපත් වාසී කම ලජ්ජාවක් වගේ දැනෙන්නේ උපතින්ම හරි පස්සේ හරි ටිකක් ඉංගිරිස් වලින් කටදිව තෙමෙන්න ගත්තාමද? ඉංගිරිස් තුන්වේල ජීර්ණය නොකරන මට නම් නොතේරේ. දූපතක නිසා අතීතයේ සිට කොතරම් උවදුරු වලින් අප ආරක්සා වෙන්ට ඇතිද? ඒ දූපතේ අහුකොන් වල තිබූ දෙයින් අපි කොතරම් නම් පෝෂණය වෙන්ට ඇත්ද? අම්මා තාත්තා මට නම් සුඛෝපභෝගී විදිහට සුරක්ෂිතව කන්නට බොන්නට දුන් නිසා මට ඔය අහු කොන් වැඩක් නැතේ යයි කෙනෙකු කියන්නටද පුළුවන. අනේ මේ දූපත් රට අදටත් බොහෝ දෙයින් වටින්නේ අපටය. අපේ මෝඩ කමට අපි එහිම ලැග එහිම මියෙත්වා.. මෙහි උපන් නිසා කටදිවේ ගෑවී හදවතේත් බුද්ධියේත් ගැඹුරටම කතාකළ සද්ධර්මය උරුමයක් කොට ගත හැකි වීමම අප ලද වාසනාවක් වේවා. ඒ ධර්මයේ කොනක් හෝ අල්ලා ගත් නිසාම විශ්වය ගවේෂණය නොකොටම තමන් තුළින් විශ්වයම වටහා ගන්නා හැටි වටහා ගත් නිසාම මගේ මානසිකත්වය දූපත්ම වේවා.. ඒ මෝඩකම නිසාම පස්වලින් ගොඩ කර දූපත මහද්වීපයක් හෝ අර්ධද්වීපයක් කරනවාට අපේ කැමැත්තක් නැත. අප කීවේ අප වැනි තවත් ගණනකට ගතහැකි අය ඉන්නා නිසාය. 

කලිසම කමිසය ඇන්දාට ඉංගිරිස් වචන කීවාට අපි අපේ රටේ වැදගත්කම ඉහටත් උඩින් අවබෝධ කර ගෙන ඇත්තෙමු. කාට නොවටිතත් අපට අපේ රට වටින්නේය. ජාතියක් ආගමක් මුල්කොට ගෙන අන්තගාමීවන්නට අපට උවමනා නැති සේම පිට පොට පටලවා ගත් සරමත් නොඅදින හෝ රාත්‍රියට දවටා ගන්නා අයගේ කතා අපට උවමනා නොවෙති. පාලකයන්ගේ වරද නිසා අපේ කමත් අපේ දෙයත් අපේ රටත් කියන්නෙහි අර්ථය සාමාන්‍ය මිනිහාට විටෙක පැටලුනාට ඔහුට ජන විඥානය ඇත. ඔහුගේ හිතේ හෝ ජානවල කොනකින් අවතරණය වූ ඒ ආවේණියේ කොටස් ඇත. 

ලෝකෙන් උතුම් රට අපේ රටයැයි අප කියූවේ ආර්ථික විද්‍යාව වැනි තිරශ්චීන විද්‍යා දර්ශක වලින් නොවේ. සද්ධර්මය පිහිටි රට නිසාය. එහෙයින්ම පාලකයාගේ වැරදි හෝ පාලනයේ වැරදි හෝ කාළගුණ දේශගුණ විපර්යාස හෝ රටේ මිනිහාගේ යම් කොනක් අල්ලා ගෙන සමස්ථ රටේ ගලායාම හෝ පැවැත්ම ගැන ඒ අනුසාරයෙන් අගතියට දෙසන්නට අප සූදානම් නැත. වැරදි ඇත්නම් ඒවා නිවැරදි කර ගැනීමට අපේ ඇහැකින් බලනවා විනා තිරශ්චීන විද්‍යා ඇසෙන් බැලීම හෙනම ගොබ්බ වැඩකි. මන්ද ද‍හමෙන් පෝෂණය වූ මහ ඉතිහාසයක් ඇති රටක් තම අනාගතය දෙස බැලීමට රබර් ඇසක් භාවිතාව විහිළුවක් වන බැවිනි. 

ආරෝග්‍ය පරම ලාබය නම් සතුට පරම ධනය නම් පළමුව අප ලද යුත්තේ ඒ ආරෝග්‍ය හා ඒ සතුට නොවේද? සමහරුන්ට මේ දෙකම ගන්නට බටහිර විද්‍යාව හා ආර්ථික විජ්ජාව නැතුව බැරිය. මෙහෙම කිව්ව සැනින් සමහරු හාස්‍යට කට අරින්නේ සල්ලි නැතිව හුස්ම ගන්නේ වත් කොහොමද කියා දෙසමිනි. සල්ලි නැතිව තවමත් හුස්ම ගැනීමේ හැකියාව නිරෝගී අයට තවම මෙහේ තිබෙතත් මුදල් නැතිව ජීවත් වීමට නම් නොහැකි බව කොතැනටත් වගේම මෙතනටත් අදාළ වේ. ඉතින් මුදල් හොයන මග පළමුවට ගෙන අර දූපත් කියාගන්නා මානසිකත්වයට පයින් ගසා.. යන රැල්ලේ ගණිකා වෘත්තිය පවා නීතිගත කරමින් සූදු කැසිනෝ පමණක් නොව ආර්ථික වාසි ගෙනෙන ඕනෑ දෙයක් කර පින්නාගෙන අපි ‍යමුකෝ මරු ගමනක්... ධර්මයවත් අහවල් එකක්වත් මක්කෙටැයි.. ඔය දියුණුයි කියන රටවල් වගේ අපිත් යමු මහා ගමනක්..නිර්මාණය වේවි හොද සංස්කෘතියක්..අලුත් රස්සාත් නිර්මාණය කරන්නට තරමේ තවත් ප්‍රශ්නත්... විනාශ වේවි අපේ කියන හැම දෙයක්ම... ඒත් කමක් නැහැ අධිවේගී ගමනක්ම යමුකෝ හෙමින් නොයා. ආපස්ස බලන්නේ නැතිව.. අපේ මිනිස්සුන්ගේ ෆාස්ට් ෆෝවඩ් ගතිය අඩු නම් සියලු විලි ලජ්ජාව එකවිට නසා‍ගෙන අපි යමු අාර්ථිකයේ විතරක් නොවේ විනාශයේත් කෙළවරටම.. එනිසා...................................

කියන දේත් විග්‍රහත් උගත් බුද්ධිමත් භාවයෙන් අගතැන්පත් වූවත් විෂය හා පූර්ණව බද්ධ වූවත් අපේ ක්‍රමයේ වටිනා දේ අපි දැනුවත්ම මෙන්ම නොදැනුවත්වත් අපේ සංස්කෘතිය තුළ ව‍ාගේම අපේ ජාන ‍ව‍ාගේම හිතේත් හැංගී ඇති බවත් ඒවා සඵලදායී පමණට නිරවුල් කොට ගත හැකි හා යුතු බවත් අපි තේරුම් ගැනීම වැදගත්. අනුන් පෙන්වන පහසු හා සරල මාර්ග බුද්ධියට හොදට ගෝචර වූ පමණින් හිතට බොහෝ සේ සිත්ගත් පමණින්ම යපහතක් සපුරා උදා නොකරන බව අපේ දූපත් මානසිකත්වය  තුළ අප ඉගෙන ඇත. 

උගත් බුද්ධිමත්හු දෙසුවාට හැම දෙනාගේ කල්පනාව ඒ උගත්බුද්ධිමත් රටාව ‍නොවේ. එමෙන්ම හැගීම් බරවම දෙඩුවාට එයත් හැමගේ රටාව නොවේ. බොහෝ දෙනා මේ දෙතැනින්ම මධ්‍යස්ථ වූවන්.. ඔවුන්ගේ අදහස අප පරිණාමය වෙන්නට කලින් පරිණාමය අපි විසින් සිදුකර ගැනීම නොවේ. අකලට මේරීම යනු පරිණාමයක් නොවේ. ඩාවින්ගේ පරිණාම වාදයට අනුව උචිත උන්නතිය කියා කියන්නේද කාලයක් යන වැඩකි. එබැවින් අද උචිතයි කියා පේන දේ හෙට නූචිත වන්නටත් අද නූචිතයැයි පෙනෙන දේ හෙට උචිතවන්නටත් බලපාන පරිසරයත් ධර්මයට අනුව අප දන්නා නියාම ධර්මත් බලාහිදී. එබැවින් විද්‍යාවට වඩා එහා ගැඹුරු නියාමයන් දන්නා අප සරල විද්‍යාව හමුවේ වෙව්ලන්නේ ඇයි?? ධර්මය නොදන්නා කමින්ද?? එහි අදහස සරල විද්‍යාවට ගැරහීමක් නොවන බව උගත් බුද්ධීමත් මතධාරීහු තේරුම් ගනිත්වා.. එබැවින් ඒ විද්‍යාවට‍ අදාළවම වර්ධනය හා විකසනය සුදුසු තැන සුදුසු විට උනාවේ.. අප විසින් බලහත්කාරයෙන් සිදු කර ගැනීමට යා යුතු නැත. එයින් කියවෙන්නේ නිහඩව බකංනිලාගෙන සිටිමක් ගැන නොවන බව හැබෑ බුද්ධිමතුන් තේරුම් ගන්නවා ඇත. 

මේ එළඹ ඇත්තේ කාලයක් තිස්සේ රැස්වූ අවබෝධයකින් රටට ගැලපෙන මාර්ගය හදනා අපේ ගමන යාමේ කාලයක් මිස ලොකු හෝ බලවත් යැයි හංවඩු කොටා ගත් රටවල් දෙස බලා මගුල්ගමනේ හැඩ පෙන්වා දික්කසාදයවෙත යන ගමනක් නොවේ. 

එබැවින් රටට හැබෑ බුද්ධිමත්හු පහළවේවා. උගතුන් පිළිබද අංශමාත්‍ර වූ අනියම් හැගීමකින් තොරව මෙසේ ප්‍රකාශ කරන්නේ උගතුන්ගේ මහිම දකින විට උගත් පමණින් අර්ථයක් හැබෑවට ජීවිතයට ළංකර නොගත් බව දකින නිසා පමණි.‍ අපත් නන්නත්තාර නොවී රස්තියාදුවකින් ජීවිතයේ යම් හෝ යහපත් මාර්ගයක් තේරුම් ගත් හෙයින් මෙසේ කියන්නට ‍කරුණු යෙදී ඇත. නමුත් අපත් සමගත් ඉන් පසුවත් බිහිවූ පරම්පරාවේ කතාව බොහෝ සෙයින් උගත් පන්නයට බර වූවාට හරවත් පන්නය ඇමරිකන් හෝ බටහිර ෆෝමැට් රටාවෙන් නිවට කර ඔද්දල් කරවූ බව අපි දන්නෙමු. එයින් පෙන්වන්නේ බටහිර හෝ ඇමරිකන් විරෝධයක් නොව කරුණු සිදුවූ අයුරුය. එයට අපේ රටේ උගත්තුද බොහේ සෙයින් දායක වූහ. නමුත් හැබෑ බුද්ධිමතුන්ගේ වාසය තවමත් මේ රටේ ඇති බැවින් අපේ චින්තනයට යමක් එක්වුනි. ඔවුන් හැමට පින්සිදු වේවා. 

අමුඩය නොඇන්දත් සරමම පටලවාගෙන නොහිටියත් අප‍ේ කියන දේශපාලන හෝ විවිධ සමිති සමාගම් නියෝජනය නොකළත් අපේ කියා කෙරෙනා සියලු නරකත් හොද ලෙස දකන්නටත් මා සූදානම් නැත. එය වෙනමම දෙයකි. අපේ මිනිසුන් නිවරද වන්නට ඕනෑ එතැනින්ය. අපේ කියා කවුරුන් හෝ අපට පටලවා දුන් වැරැද්දත් අර උගත්කමෙන් වල්මත් වුනු අදහසුත් වෙනමම අප විසින් හදුනා ගත යුතුව ඇත. එය එතරම් පහසු දෙයක්ද නොවේ. අලුත් සංස්කෘතියක් නිර්මාණයට අපේ වැඩිහිටියන් පටන් ගත යුත්තේ ඒ නිවැරදි අවබෝධයට පාර කැපීමෙන් මිස කුඩා දරුවන්ට උගන්වන කවි කතාවක කොනක් අල්ලා නොගෙන බව ඉතා ‍වැඩිහිටියන් කෙරෙහි ගෞර‍වයෙන් මෙන්ම අවධාරණයෙනුත් කිව යුතුව ඇත. නැන්දාත් මාමාත් ගතවෙන කාලය ගැන වගකීම් සහගතව නොහිතා දුන්කොළ නැට්ටේ එල්ලුනොත් විදවීම යනු ඇත්තේ පඹගාලක පැටලෙන අනාගත පරපුරටය. ලංකා මාතා කියා මවකගේ දරුවන්සේ හැදෙන ඔවුන් එක වරම ලෝක අම්මා නොහොත් ලොකු අම්මා ගේ ඇසුරට යැවීම හිතනවාට වඩා පහසුවෙන් හා සරලව ගත්තොත් අපටත් ඇමරිකාවට සේම දෙවිපිහිටය. බටහිර බොහෝ රටවලට සේ දෙවිපිහිටමය. දෙවි පිහිටද සද්ධර්මයේ සරණද යන්න ජාති ආගම් වාද වලින් තොරව රටේ සමස්ථය සමග ඉදිරියට ගැඹුරෙන් හිතන්නට අවැසි අයට සිතිවිලි පහළවේවා...

යමක් කී පමණින් අප එක් කෙළවරක තබා නොසිතන්න. මමද ඔබද අපි සාමාන්‍ය වැසියෝම වෙමු. රජ හෝ බමුණෝත් එලෙසම වෙළෙන්දෝත්, ශුද්‍ර හෝ වෙනයම් කොට්ඨාශයකටත් ධර්මය එකමය. ප්‍රතිපත්තියෙන් අගතැන් නැතත් දැනෙන හැගෙන සත්‍ය කීමට එය බාධාවක්ද නොවේ. එබැවින්ම අප/ මා විසින් ..................... පෙර මෙසේ ලියන්නට අදහස් කරන ලදී.

මොන ආර්ථික මග ගත්තත් ධර්මය අමතක කළ තැන් සිට එ් දියුණුවේ පූර්ණත්වයක් නැති බව නම් අපටත් ඒ මග යෑමට සිදුවුවත් පළමුව කිව යුත්තකි. බුද්ධිය සමග ශ්‍රද්ධාව එක්ව ප්‍රඥාව ගැන අප තේරුම් ගත යුත්තේත් දෙසිය යුත්තේත් එනිසාය.

මුනිවර නිහඩතාව

‍මෝඩයන් ඉදිරියේ 

මුනිවරයෝ නිහඩවූහ

උගත්හු ඉදිරියේද 

මුනිවරයෝ නිහඩවූහ

මෝඩයෝ මුනිවරයා නිකමෙකියි කීහ

උගත්හු අව්‍යාජ නම් මුනිවරයෝ නිහඩ නොවෙතියි කීහ

මුනිවරයෝ සිනාසුනහ

නොතේ‍රුම් කමින් හිස පිරී අැත්තන්ගේ හිසේ වෙනත් යමක් දැමීමට ඉඩක් නැත

දැනුමෙන්ද හිස සපුරා පිරී ගියේ නම් ඒ හිස් තුළත් වෙනත් යමක් රදන්නේ නැත

එබැවින් නිහඩවීමයි සුදුසු පිළියම

මුනිවරයෝ උගත්කමින්වත් මෝඩකමින්වත් හිස සපුරා නොපිරුනු තැනැත්තන්ට කීහ 

එ‍විට බුද්ධිමතුන් ?? කෙනෙක් හට ප්‍රශ්නයක් විය

හැබෑ බුද්ධිමතුන් කිසිවකින් කිසිවිට කුස සේ හිස පුරවා නොගන්නා අයයි මුනිවරයෝ කීහ

ඔවුන් හැමවිට උත්සාහ ගන්නේ දැනුමට හෝ හැගීමට වහල් නොවන්නටයි 

එබැවින් ඔවුහු හැමවිට දෙසීමට වඩා ඇසීමට රුචිවෙති

ඇසීමට වඩා ධාරණයට රුචි වෙති

ධාරණයට වඩා අවබෝධයට රුචි වෙති

අව‍බෝධය ඔබේ හිසේ හෝ මනසේ ඉඩ පැහැර නොගන්නා බැවින් ඔවුන්ගේ හිසේ හැම විටම නිදහස පවතී 

...........................

හැගීමට වහල් වීම යම් වරදක්ද දැනුමට වහල් වීමද එවැනිම වරදකි. නිවරද වන්නේ අදාළ තැන දැනුමටත් අදාළ තැන හැගීමටත් තැන දීමය. කොතරම් නිවැරදි වුවත් දැනීමට වඩා හැගීම වටිනා තැනදී එය යටපත් කිරීමට යාමත් කොතරම් බලවත් වුවත් හැගීමට වඩා දැනුම වටිනා තැනදී  එය යටපත් කිරීමත් නොකළ යුතුය. මන්ද මිනිසා හැගීම මෙන්ම දැනීම අතින්ද සමබර සත්වයෙක් නොවුන හොත් තවදුරටත් මිනිසෙකු ලෙස ඇති පැවැත්ම නැති වී යන නිසාය. එබැවින් හැගීම් වැඩීම ගැන දැනුමෙනුත් දැනුම වැඩීම ගැන හැගීමෙනුත් විමසා බැලීමේදී දැනුමේ වටිනාකම නිසා හැගීම බැහැරලීමත් හැගීමේ වටිනාකම නිසා දැනුම බැහැරවීමත් වැළැක්වීමට නම් ඇතිවිය යුත්තේ එකගතාව මිස වාදයක් නොවේ. 

වඩා වටින්නේ දැනුම නොවේ.. සමස්ථ ප්‍රතිඵලයයි.

වඩා වටින්නේ හැගීම නොවේ .. සමස්ථ ප්‍රතිඵලයයි.

යමක සමස්ථ ප්‍රතිඵලය තීරණය වන්නේ කුමක් පදනම් කරගෙනද?  

ලෝකය පිළිබද විස්තර වන්නේ නියාම ධර්ම පහක අනුසාරයෙන් නම් ඒ නියාම ධර්ම පහට ඔය සමස්ථය යටය. ඒ පහම සමස්ථයට අදාළය. ඉදින් සමස්ථයේදී නොදන්නා බොහෝ සාධක, පාලනය කළ නොහැකි සාධක බොහෝ වෙද්දී යම් දැනුමක් හෝ යාන්ත්‍රනයක් මත නැතිනම් එක් නියාම ධර්මයක බැදුනු විද්‍යාවක හෝ චිත්තය හා බැදෙන හැගීමක එල්ලී පමණක් විග්‍රහ කෙරෙන අපේ කතා අතිශය ගැඹුරකින් බැලූ විට කොතරම් බොදළදද? ළාමකද?

එවැනි ළාමක කමක සිට සද්ධර්මය දෙසූ මුනිදුන්ගේ නිහඩතාව දශමයකින් හෝ ගැඹුරෙන් වටහා ගැනීමට හැකිනම් දාහක් දේ අපමණට දොඩවන මෙබදු ක‍ලක අපටම අවශ්‍ය විට නිහඩතාව සොයන්නට සිත්දේවි. සිත්වේවි. නිහඩතාව අැවසි තැන නිහඩවිය යුතු බව තේරුම් ගනීවි.

කොනක්! ඉමක්!

යම් ලක්ෂ්‍යක සිට වමට අදිනු ලබන රේඛාව එම ලක්ෂ්‍යයේ සිට ගත්කල වමටය. එම ලක්ෂ්‍යයේ සිට දකුණට අදිනු ලබන රේඛාව එම ලක්ෂ්‍යයේ සිට ගත්කල දකුණටය. මේ දෙකම සරල රේඛාවන් ලෙස ඇද නැතිව ඇන්දා නම් අවසන එකම රේඛාවකි. 

මේ අතිශයඩිංග තේරම් ගන්නට නොහැකිව මිනිස්සු වම හා දකුණ අතර මහා මත භේදයක් හදා ගනිති. වමට ඇති රේඛාව යම් තාක් දිගද දකුණට ඇදි එක යම් තාක් දිගද දෙකම එක් කළ විට මහා රේඛාවකි. 

රේඛාවන් ගණනක් ඒ මේ අත අැද එක එක හරහා ඇද බැලූ විට එතැන ඇත්තේ අමුතුම කලාවකි. මේ රේඛාවන් සරල රේඛාවන් නම් එය මෝස්තරයක් සේ විය හැකියි. එ්වා සරල නොවන රේඛා නම් ඒ ‍තුළ මෝස්තරයකට එහා දෙයක් වුව ‍දැකිය හැකි වනු ඇත.

කලාව සරල රේඛාවලින් විස්තර කළ නොහැකිය. සරල රේඛා ඔස්සේ පමණක් කලාව පැවැත්විය නොහැකිය. නමුත් මේ රේඛා සියල්ල ඉතා සියුම්ව බිද දැමුවහොත් සරල රේඛාවක් තැනිය නොහැකිද? 

කැමරාව හදන තිත්.. එයින් හැදෙන රේඛා කොටු .. ඒ ‍ඔස්සේ හැදෙන විවිධ වූ දේ..

සියල්ල අවසන පොඩිපට්ටම් කොට එකම රේඛාවකට දැමිය ‍නොහැකිද? 

විදුලිය බල්බය හරහා ගොස් ආලෝකය දී ඉස්ත්‍රික්කය හරහා ගොස් තාපය දී පංකාව කරකවා සිසිල දී තවත් කොයි කොයි නම් තැනකට ඇදී යත්ද? කොපමණ දේ ලබා දෙත්ද? විදුලිය නමින් සියල්ල කරන්නේ එකපසු පස ඇදනෙ ඉලෙක්ට්‍රෝන ධාරාවක් විසින්යැයි සාපෙළ අවදියේ කියා දී ඇත.  

හිත හිතිවිල්ලෙන් හිතිවිල්ල අද්දවා මොන මොන දේ හරහා ගොස් අප කොතැන නතර කරාවිද? අපි හිතට අනුව යනවාද? හිත අපිට අනුව යනවාද? හිතට තිතද? තිතට හිතද?

කලාව මේ සියලු ‍තිත් ‍හිත් හා රේඛා එකතු වුනු තැනක්ය. කලාව මිනිහා හරහා මේ සියලු තිත් හිත් හා රේඛා විවිධ නිමැවුම් බවට පත් කරයි. සංකල්පනා හිතෙන් තිතෙන් හෝ රේඛාවෙන් පටන් ගෙන හිත ගත් ලෙස නිමැවෙයි. තිතක් තබා තවත් තිතක් තබා අතරමැදි රේඛා නිමැවෙයි. හිතත් මේ ‍තිත් රේඛාත් කලාවක් හදයි. විටෙක සියල්ල පැටලී යයි. 

පැටලීම තුළ ‍අපූර්වත්වයක් ජනිත වී අපූර්ව අනගි විශිෂ්ඨ දේ බිහිවෙයි. තවත් විටෙක සියල්ල එකටෙක මනාව ගැලපෙයි. එසේ එක්වී ගැලපී ශ්‍රේෂ්ඨ හෝ අති ශ්‍රේෂ්ඨ දෙයක් බිහිවෙයි. 

විශිෂ්ඨ කලාවද? තිතද? රේඛාවද? හිතද?

මේ සියල්ල දෙස බලා තවත් පසෙකින් බුද්ධිය විචාරන්නේ ඒ ප්‍රශ්නයයි.

අම්මාගේ දැක්ම.. කණගාටුව.. හා ප්‍රවේශම.

තාත්තාගේ දැක්ම හරි වටිනා මගක ඇත. ඒත් මේ දැන් කතා කරන්නට යන්නේ අම්මාගේ දැක්ම ගැනය. මොනදේ නැතිවුනත් කළ යුතුදේ(නිවැරදි දේ) කිරීම හා ඒ වෙනුවෙන් කැපවීම අම්මාගේ දැක්ම විය. ඇත්තෙන්ම සමහරතැන තාත්තාගේ දැක්මද අබිභවා යහපත් ප්‍රතිඵල ගෙන ඒමට අම්මාගේ දැක්ම ඇත්තෙන්ම මහෝපකාරී විය. කළ යුතුදේ වෙනුවෙන් වෙහෙසී එය හරියට කරන අම්මාගේ දැක්ම රටේ දැක්ම වූවා නම් මට නිකමට සිතේ. ජඩ පුතුන් දාහකට වඩා එවැනි කීපදෙනෙක් වුව මාතෘෘ භූමියට තව තවත් පහළ වේවා. අම්මාගේ දැක්ම ඉදිරියට ගෙනේවා...

කණගාටුයි යන්න මේ දිනවල බොහෝ සේ ඇසෙන්නේය. 18 ගැන කණගාටුයි. සහය දුන්නට කණගාටුයි යනුවෙන් කියවෙන්නේය. කුඩා දරුවන් අඩු තරමේ තරුණයින් වත් අඩු තරමේ අවංකවම වැරදුණු උදවියවත් මෙහෙම කියනවා නම් ඉවසීම මෙන්ම සමාව දීමටද වටී. දැන දැනම වරද කර නැවත නැවතත් වැරදි කරමින් නිරන්තරයෙන් සමාව ඉල්ලන්නෝ අපර ක්‍රමයේ මහත්වරුන්ය. එබන්දන්ගේ කූටත්වයන් හදුනාගෙන සැබෑ කණගාටුව හදුනා ගැනීම මෙබදු කලෙක අතිශයින් වැදගත්යැයි මට සිතේ. අනාගතයේදීත් එබදු කණගාටුවන්නන් ගැන දැන් දැන්ම ඉගි ළුලවෙත්වා...

උෟරන් කැකුණ තලන විට හබන් කුකුළන්ට ජය මගුල් යනුවෙන් කතාවක් මා අසා තිබේ. මතකයේ හැටියට කතාව කීවා හරිය. වාසියට එක එකා පිල් බෙදෙද්දී වාසිය යන්නේ පිල්ලේලාටය. මහ වුන් එක එකාගේ බොටුවෙන් අල්ලද්දී කුඩා දරුවෝ දිව යන්නේ නන්නත්තාරේය. සිනාසෙන්නේ අසල්වැස්සෝය. උදව්කරනාවාට වඩා තරගකරන අසල්වැසියන් නම් සිනාසෙන්නේ හිත යටින්ය. එනිසා මොන උෟරන් මොක තැලුවත් කොටුව අයිතිකාරයා ගොවිපළ ගැන වගකියන්නට ඕනෑය.‍ උෟරන් මෙන්ම කුකුළන් ගැනත් වග කියන්නට ඕනෑය. එබදු වගකීමක් දරන්නට නම් ගොවිපළ හිමියා හොද පරිචයක් ඇත්තෙකු විය යුතුය තම කාරිය ගැන. එබදු ගොවිපළ නඩත්තු කරුවෝ බහුලවෙත්වා...

සියල්ල අපට ඕනෑ හැටියට සිදු නොවුනත් අපි බලපෑම් කරගත යුත්තේ සියල්ල සඵලදායීව සිදුකරගැනීමටය. එනිසා ආකාසෙට බැණ නොනගා අතට ගන්නේ කුඩයද තොප්පියද යන්න හොදින්ම තීරණය කිරීමට මේ කාලයයි. අහස දෙස නෙත් යොමන්න. අව්වද? වැස්සද? නැතිනම් නරියගෙ මගුලද? .. මොන මගුලක් වුවත් අවමගුලක් නොකර ගන්නට වගකීමක් ඔබටත්  මටත්  හැම රටවැසියෙකුටමත් නුදුරේම ඇත. ඉන් අනතුරුවත් ඇත.

අවර පදම > මන (උස්+පහත්)

මිනිස්සු වන අපේ ජීවිතේ පදම අහුනොවුනු කල ජීවිතේ අවර පදමට යනව අපි දන්නෙම නැතිව. එහෙම වුනාට පස්සෙ අවර පදම වුනත් රසයි කියනව අපි කව්රුත් පදම නොදැනම. එතකොට අහන දෙය තමයි පදම දන්නේ මොකාද? වගේ ප්‍රශ්නයක්. කිසිවක් උයන්න කරන්න නොදන්නව වුනාම රොටියක් පුස්සන එකත් සම්බෝලෙයි, පරිප්පුයි බතුයි හදාගන්න/උයාගන්න පුළුවන් එකත් මහ ලොකු දෙයක් කියල ‍දැනෙනව වගේ ජීවිතේ ගැන කිසිවක් නොදන්නව වුනාමත් දන්න දේ ගැන මහ ලොකුවට දැනෙනව. හරියට ජීවිතේම අතැඹුලක් වගේ ගානට හිතෙනව වයස විසිපහ යන්නත් කලින්ම. අපිටත් එහෙම නොදැනුනා නොවේ වගේම කරන කියන දෙයින් බොහෝ දෙනාටත් ඒ හිතිවිලි ඇති බව පේනව. පට්ට පල් රස්තියාදු ගානට ටෝක්ස් දිදී අභූත රූපයෙන්, විකාර රූපයෙන් දෙසන ගොඩක් දේ තුළ තියෙන්නේ පදමත් අවර පදමත් අනා ගැනීම මිස වෙන මොකක්ද? ඒ දෙක බේරුම් කරල දෙන එක කිසිම කෝකියෙකුට ලේසි දෙයක් නොවෙයි මේ කාලේ. එතරමට ජීවිත පදම්, අවර පදම් වෙලා. හැබැයි පදම් වුන ජීවිත තුළින් සමහර විට මේ පදම ගැන අදහස් අල්ල ගන්නත් අපි උත්සාහ කරනව. හැබැයි ඒ සියල්ලම තුළ තියෙන්නෙ හරි පදමමද? ප්‍රශ්නයක්. චීන කෑම වල පදම චීන පදම. ජපන් කෑම ජපන් පදමට. අද ජාත්‍යන්තරී කරන මානසිකත්වයක් ඇතුළෙ රස්තියාදුවන අපේ ජීවිත වල පදම ජාත්‍යන්තර පදම. ඒ නිසාම පාසලෙන්, දහම් පාසලෙන් ජීවිතේ පදම ගැන වැටුනු පදනම අදට වලංගු නැති කරගන්නෙ අපි විසින්මයි. මේ පරිසරයෙ ඒකට ඉඩක් නෑ. තාක්ෂණය ඇතුළෙ ජීවිතේ ගලා යනව, නිකං සර්කිට් බෝඩ් එකක තියෙන තවත් එක කන්ඩෙන්සරයක් ගානට. හැට හැත්තෑ ගණන් වල ඉපදුණු උදවිය ජීවිතේ ගැනත් මේ ජාත්‍යන්තරීකරණය ගැනත් අපූරු දේශනා පවත්වනව එයාලගෙ පදමෙන්.. හැබැයි අද දරුවා පදම්වෙන්නෙ වෙන විදිහකට. ඒ පදම ඇතුළෙත් තියෙන්නෙ අර වගේම ජීවිතයක්. හැබැයි අර ගහෙන් කොළෙන් හුළං සැරෙන් හැදුනු ජීවිත පදම අද ගන්න තියෙන්නෙ වායු සමීකරණයෙන් පරිගණකයෙන්?? මේක තුළ ලොකු කතාවක් නෑ, කාලේ වෙනස විතරක් කියා කියන අය හිටියට අපිට ආපස්සට යන්න බෑ කීවට මේ දරුවාටත් වඩා ඔය පරම්පරා අතරේ හිරවුනු අපේ හිත් සම්පූර්ණයෙන් කන්ඩෙන්සර්, ඩයෝඩ නොවුනු නිසාම හදාගන්න හුගාක් අමාරුයි. මේක ලංකාව. ලංකාවෙ සංස්කෘතිය හරියට ඇගට වැදුනු මිනිස්සුගෙ සංවේදීතාවය අසීමිතයි. ඒක ඇතුළෙ ඇමරිකන් ක්‍රමයට  ක්වික් ෆෝමැට් එකක් දෙන්න ගියොත් බිහිවෙන්නෙ අසමජ්ජාතියෙක් විතරයි. කාටද පුළුවන් නැහැ කියල අභියෝග කරන්න. අපි මේ පොළොවේ අවුරුදු විස්සක් තිහක් සාමාන්‍ය උදවිය අතරෙ හොද කටුවක් කාපු අය. ජීවිතේ හරිම දෙයක් හොයාගන්න උත්සාහ කරපු අය. ඔය කවුරු කවුරුත් දෙසා බාන, පත පොතේ තියෙන දේ විතරකින් ජී‍විතේ දිහා බලන්න උත්සාහ කරපු අය‍ නොවෙයි. දෙන දේ කාල වෙන දෙයක් බලාගෙන ඉන්නවට වඩා, පේන දේ අවුල් නම් ඒ අවුලම කිය කිය ඉන්නවට වඩා යමක් හිතන්න උත්සාහ කළ අය. අපිටත් ඒකට අයිතියක් තියෙනව.  මොකද එක එක දේට අර්ථ කතන සපයන පරණ අයට දැනුනු ‍දේවල්ම වෙනස් ලෙසකින් අලුත් පරම්පරාවට දැනුනු හදවතේ සංවේදී බවක් තිබුන යම් කාලයක් දක්වා. දැන් නම් ඒකෙ සංවේදී බවත් ඒ පරම්පරා තුළම මොටවෙලා. සල්ලි හම්බකරගෙන ජීවිතේ විදින එක පමණක් යථාර්තය වෙලා. වෙන‍ මොනවද? ඉර හදත් විහිළුවක් විතරයි. පුලුවන් නම් ඒවයෙ ශක්තීන් වියෝජනය කරල තවත් ඩෙවල් එකක් හදාගන්න බලමු. ඒ සංස්කෘතිය ඇතුළෙ රොබෝලා, සහ සජීවීකරණය වුනු මිනිස් සත්තු. අපි හිතමු ඒ ඒ පදම එහෙමයි, ජාත්‍යන්තර පදම මෙහෙමයි, අනාගතේ පදම ‍එහෙමයි කියල. අද කතා කරන අභුත රූපය තේරුම් ගන්න ඇහැකි අයත් ඉන්න නිසා එහෙව් අයත් තේරුම් ගන්න යමක් වෙච්චාවේ. මනුස්ස‍යාගේ සත්‍ය දැකීමේ ඥානයේ අවර පදමයි මේ. ඒ උත්සාහයේ කතා හමාර උනාවේ. ඉතිරිය එක එක විදිහෙන් පෙනෙන දෙයින් යමක් වටහා ගැනීමේ ගැඹුරු විදර්ශනාව පමණයි. හිතන්න එපා අපි දන්නවා කියා. අපි බොහෝදෙනා තාමත් නොදන්නා නොගැඹුරේ ජීවිතේ විදිනවා යැයි කියමින් අත පත ගාන්නවුන් පමණයි.

ජීවිතේ විදවන එක ගැන සමහරු සමහරුන් වෙනුවෙන් දුක්වෙනවා. ජීවිතේ විදිනවයි කියන එකේ සීමාවක් නැතිවා ව‍ාගේම විදවනවා කියන එකෙත් සීමාවක් නෑ. ඒනිසා මං ජීවිතේ විදින විදිහත් තවත් කෙනෙක් ජීවිතේ විදවනවද කියන එකත් තීරණය වෙන්නේ අප‍ේ සීමාවන් තුළ නොවෙයි. ඒ ඒ පුද්ගලයා කොපමණ සතුටකින් ඉන්නවාද කියන එක තුළ. හැබෑ සතුට තියෙන්නෙ අව්ව තැපීම තුළද අව්ව තපින්නෙ නැතිව කුඩයක් යට ඉන්න එක තුළද කියල අපිට කියන්න බෑ. වැස්සට තේමීම ‍තුළද නොතෙමී ඉන්න එක තුළද කියල අපිට කියන්න බෑ. බය වගේම බය නැතිවීමද සතුට කියන්නෙ කියල කියන්න බෑ. කට දැවිල්ල හැදීමද කට දැවෙන්න මිරිස් නොකන එක තුළද කියල ත් අපිට කියන්න බෑ. හැබෑ සතුට ලැබෙන්නෙ ඒ මොහොතේ මොනව කිරීමෙන්ද එතන සතුටක් විදීමක් තිබේවි. ඒ වගේම ඒ සතුට කොච්චර කල් පවතීවිද කියන්න පුළුවන් ඒක කොච්චර කාලයක් භුක්ති විදින්න පුළුවන්ද කියන එක මත. ඔය සේරම ජීවිතය පවතින වෙනස් වන කාල සීමාවේ. අද සතුටු වෙලා හෙට දුක් වෙනවද, හැමදාම එකම සතුට විදින්න පුළුවන්ද, හෙට මැරුණත් අද සැප කරානම් ‍ඒක ජොලිද, මෙතැනින් එහා මොකුත්ම දෙයක් නැතිද? තමන්ගෙ මට්ටම තම්මැට්ටම කියල විතරක් තේරුම් ගැනීම සෑහේද? තම තමන්ගේ කල්පනාවට අවබෝධයට අනුව එහෙම හැසිරෙන්නත් විදින්න හෝ ජීවිතය විදවන්නත් අයිතිය තමන් සතුයි තමා. ඒත් මනුස්ස ජීවිතයේ පදම හරියට කැලේ මාරු වුනත් කොටියගෙ පුල්ලි මාරු නොවෙන ලෙසින් තිබෙන බවත් සිහියේ ති‍බුනොත් ව‍ටීවි. ජාත්‍යන්තරයේ වුනත් මිනිස්සු මිනිස් නමින් එක තැනකට එන්නේ මේ පදම නිසානේ. ඔය පදම අවර පදමින් වෙන් කරල ගැඹුරින් හොයා ගන්න පුළුවන් නම් හරි වටිනව. මම නම් රස්තියාදුව ශුද්ධ කරගෙන ටික ටික ජීවිතේ පදම හොයාගන්න හදනව. උනන්දුව ඇති අය ඒ පිළිබද තවත් වීරිය කරත්වා. සියල්ලන්ගේ ප්‍රඥාව වැඩේවා.. අපේත්! ජයවේවා.

කලියුගය මැද්දෙන්.. ගම න

පොඩ්ඩන් අකාලයේ ලොකු කරවන්නට අන්ද   න

ලොක්කන් අාතල් පිණිස පොඩ්ඩන් සේ අදි   න

දේශපාලනයේ රස වින්දනය පුළුල් කෙරෙමින් ය   න

අපි අපි අතරේ බය නැති මං ඔයාගෙ කන අල්ල   න

වැඩි ඈතක් නොගොස් ආපසු කැලෑ වදින්නට සිදුව   න

දැන නොදැන දෙකෙන්ම ගොඩයන්නට තියෙ   න 

අවසන් හුස්ම නොදැනීම වැටෙ   න

හරි අපූරු ලෝකයේ හරි අපූරුවට ගතවෙන කාල ගම   න

a වර්ගයේ ස්නායු ඇත්තේ අපට විතරද?

ඊයේ කදුකරයේ නාය ගියේය. තුන්සියයක් පමණ පොළවයට සැගවෙන්නට ඇතැයි ආරංචි මාර්ග සදහන් කළේය. මෙහේ ඉඩම් වලින් වතුර ගලනවාට විරුද්ධව කුඹුරු වල සේ මාර්ග හරහා වතුර බදින්නෝය. වැට මායිම් කණුවට නැහෙන්නෝය. ආණ්ඩුවෙන් දෙනවා නම් දමිළ පුවත්පත වුව ගන්නට හදන්නේ දෙමළ අකුරක් වත් නොදන්න උන්ය. තවමත් මේ කිසිදෙයක සැළකිය යුතු වෙනසක් ඇති බවක් නොපෙනේ. තේරෙන සිංහලයෙන් කීවොත් ස්නායු පද්ධතියක් තියෙන්නේ අපට විතරය කියා හිතන තරමට අනෙකා ගැන තමන් උපමාවට ගෙන සිතීමේ ධර්ම උගනීම මෙහේ සමහරෙක් තවම උගෙන නැත. එනිසා රටේ නායකයාගේ ස්නායු පද්ධතියත්, මැති ඇමතිලාගේ ස්නායු පද්ධතියත්, ඉහළ පන්තියේ ධනවතුන්ගේ ස්නායු පද්ධතියත්, මධ්‍යම වෙළද ප්‍රජාවගේ ස්නායු පද්ධතියත්, මධ්‍යම පාන්තිකයාගේ ස්නායු පද්ධතියත්, ගම් බලවතුන්ගේ ස්නායු පද්ධතියත්, සාමාන්‍ය වැසියාගේ ස්නායු පද්ධතියත්, සෘණ ගණනින් සාමාන්‍ය වැසියන් වන අයගේ ස්නායු පද්ධතියත්.. ආදී වශයෙන් රෝග නැතිවත් පංති භේද අැති ස්නායු පද්ධති වර්ගකිරීමක් සමහර තැන්වල තවමත් අපට නැතිද???? a වර්ගයේ ස්නායු...

අවධානම එන්නේ අඩ‍බෙර ගසමින් නොවේ. ඉතින් අවධානම් හදුනා ගන්නා තැන්වලදී ඒවාට කල්තබා විකල්ප සෙවිය යතු සේම ඒවා ක්‍රියාත්මක කළ යුතුය‍. ඒ තන්හිදී අර අදාළ  ස්නායු පද්ධතීන්ට දැනෙන පරිදි කරනු ලබන සන්නිවේදනයද වැදගත්ය. තවමත් එකම භාෂාවෙන් කරන සන්නිවේදනය වුව ඒ භාෂාව කතාකරන ජනයාටත් එක ලෙසින් ග්‍රහණය නොවන තැන මේ සන්නිවේදන ක්‍රමය ගැනත් දෙවරක් සිතිය යුතු නැතිද. ආපදාවන් හීදී පමණක් නොව ඕනෑම කටයුත්තකදී තවත් විධිමත් හා ක්‍රියාශීලී වීමක් අපට අවශ්‍ය නැතිද? එහිදී බඩගින්න සේම ස්නායු පද්ධතියත් රෝගී නැති තැන කාගේත් එකාකාර බව ගැඹුරෙන් තේරුම් ගැනීම අපට වඩා නිවැරදි ඉසව්වකට පියනැගීමට හේතුවක් වනු ඇත.

රටකට අවශ්‍ය මියගිය ‍මිනිසුන් වෙනුවෙන් ශෝක වන්නට පිරිසක්ද, මියෙන්නට පෙර මිනිසුන් ජීවත් කරවිය හැකි ශක්තිවන්තයින් හා වීරිය වන්තයින්ද? එනිසා විනාශයක් වෙන්නට පෙර කෙසේ හෝ බේරාගත හැකි දේවල් කල්ඇතිවම බේරා ගැනීමට උපරිම වෙහෙස නොදා විනාශයට පසු හේතු පෙන්නා වුනු දේ සාධාරණීකරනය කරන කැත පුරුද්ද දැන්වත් නතර කර ගැනීමට කාලය පැමිණ ඇත.

කාලය අභිබැවීම

කාලය අභිබැවිය හැකිද? 

 යා යුතු වේගය

කාලයේ වේගයෙන්

කාලයේ වේගය කොපමණද?

හොයාගන්න

හොයාගන්න..., කොහොමද?

හිට්ටවගන්න

හිට්ටවගන්න...., මොකද්ද?

හිත

මොකක්?

නවත්තන්න හිත

ඒ කොහොමද?

අංගුලිමාල නවතගත් විදිහට

මං මිනී මරුවෙක් නෙවෙයි!

මං බුදුරජුනුත් නොවෙයි.!

.......................................!

ඔබ මොන මරුවෙක්ද?

මට තේරුනේ නෑ..

තේරුම්ගන්න 

බෑ...

අල්ලගන්න

බෑ...

අතාරින්න

?...?...?.....මට තේරුනා!..... කාලය මරන්නෙක්.. කල්මරන්නෙක්

තවත් කල් මරනවද?

නෑ.. මං පටන්ගන්නවා

මොකක්ද?

කාලය අභිබවන්න..

සත්‍ය

උගන්නන

ඉගැන්නෙන

දැකුම් සත්‍ය

ඔලුවට ‍ඔබා ගෙන

කතා කරති අ සත්‍ය

නූගෑන්වූ 

ඉගැන් විය නොහෙන

පරම සත්‍ය

තමා තුළින් වැටහී

අවබෝධ කරත් 

නොකියති අ සත්‍ය

කාගේ වත් වලිගය අල්ලා ගෙන දෙව්ලොව යා නොහේ. දෙව්ලොව ගැන අවිශ්වාසයෙන් දෙව් ලොව යා ද නොහේ. නමුත් වැදගත්ම දේ දෙව්ලොව තබා  මෙලොව දී අනුන්ගේ වලිග අල්ලාගෙන නොමග නොයාමයි. සියලු මුග්ධත්වයන් ශුද්ධ කරගෙන ලෝකය දෙස බැලීමට තමාම උගෙනීමයි. තැන නොතැන රස්තියාදු ගැසූවද නන්නත්තාර නොවී රස්තියාදුව ශුද්ධ කරගත්තෙක් වීමයි. නිරවුල් රට වැසියෙක් වීමයි.

කණකොකා ගී කියන අපේ සාදයට එන්න

ඇත්ත ගැන හිතමින් 

බොරු කිව්ව අය

කිව්ව බොරු වහගන්න 

ඇත්ත කිව්ව අය

දැන්? සත්‍ය කතාකරයි 

කණකොකා ගී කියයි

ඡන්දයක් අත ලගයි

අපි හෙට දිනනවමයි

අපේ ක්‍රමයට කතා නොකර සිස්ටම් එක වෙස්ටන් කරා නම් හරිම ෂෝක්

අර සිස්ටම් එක

ඒකට වඩා හොද වෙස්ටන් එක

වෙනස් කරානම්

සිස්ටම් එක

අනේ හරිම ෂෝක් අපේ සිවිල් සොසයිටි එක..